Олунньу 9 күнүгэр Төрөөбүт тыл уонна сурук-бичик дэкээдэтин чэрчитинэн икки сылга биирдэ ыытыллар «Аман өс» араатардар күрэхтэрэ буолла. Күрэҕи М.К. Аммосов аатынан Хотугулуу-Илиҥҥи бэдэрээссийэлии үнүбэрсиэт научнай бибилэтиэкэтэ уонна Арассыыйа Бэдэрээссийэтин Хотугулуу-Илиҥҥи норуоттарын тылларын уонна култуураларын үнүстүүтүн саха тылын хаапыдырата тэрийдэ. Дьүүллүүр сүбэҕэ саха тылын хаапыдыратын сэбиэдиссэйэ, билэлиэгийэ билимин хандьыдаата, дассыан Д.И. Чиркоева, научнай бибилэтиэкэ гуманитарнай салаатын сэбиэдиссэйэ А.А. Сосина уонна культурология билимин хандьыдаата, культурология хаапыдыратын дассыана С.С. Протопопов киирэн, бастыҥнары быһаарар уустук үлэни толордулар. Дьүүллүүр сүбэ кыттааччылары үс хайысханан (гуманитарнай, техническэй уонна естественнэй) арааран сыаналаата, кыайыылаахтары быһаарда.

Күрэххэ барыта 18 устудьуон (ПИ, ИЗФИР, ИЯКН СВ РФ, КИТ СВФУ, АДФ, МИ, ИФКИС, ИМИ, ИЕН, ФТИ, ГИ, ИФ, ФЛФ) кытынна. Тыл этиитэ икки түһүмэхтээх: маҥнайгы түһүмэххэ «Төрөөбүт төрүт тыл» диэн тиэмэҕэ эрдэттэн бэлэмнэнэн кэлэн тыл этии; оттон иккис түһүмэххэ ааспыттар талан ылбыт тиэмэлэригэр тута тыл эттилэр. Сыаналыыр сүрүн киритиэрийдэринэн буоллулар: тыл этээччи саҥатын-иҥэтин тиэрдэр ньымалара; талбыт тиэмэтин толору арыйар дьоҕура; тыл этиитин тиэхиникэтэ: таҥаһа-саба, интэнээссийэтэ, дииксийэтэ, этэр тэтимэ, куолаһын дэгэтэ.

         Ол курдук, хас биирдии кыттааччы төрөөбүт тылын дьылҕатын, кэскилин туһунан уонна араас тиэмэҕэ бэйэлэрин санааларын эттилэр. Билиҥҥи тыҥааһыннаах үйэҕэ сахабыт тылын туһугар ыалдьар, киниэхэ сүгүрүйэр устудьуоннар бааллара кэрэхсэбиллээх. Хас биирдии кыттааччы эрдэттэн бэлэмнэнэн кэлбит буолан, бары даҕаны санааларын сайа бэркэ эттилэр, бииртэн биир ордук үчүгэй тыллаах-өстөөх баар буолан истэ. Ол да буоллар, күрэххэ ким эрэ кыайыылаах тахсыахтаах, бэртэн бэрт быһаарыллыахтаах. Онон билсиэҕиҥ, быйылгы “Аман өс” кыайыылаахтарын:

         Гуманитарнай бөлөххө –

1 миэстэ – Юрий Борисов, ИФ;

2 миэстэ – Станислав Олесов, ИЗФИР;

3 миэстэ – Сергей Нафанаилов, ИЯКН СВ РФ 1 куурус;

         Техническэй бөлөххө –

1 миэстэ – Константин Колодезников, ГИ 2 куурус;

2 миэстэ – Алексей Филиппов, КИТ СВФУ 1 куурус;

3 миэстэ – Айаал Васильев, АДФ 1 куурус;

         Естественнэй бөлөххө –

1 миэстэ – Аманатова Айаана, МИ 2 куурус;

2 миэстэ – Виктор Федоров, ИЕН 2 куурус;

3 миэстэ – Никифор Филиппов ФТИ 2 куурус;

         Научнай бибилэтиэкэ гуманитарнай салаатын сэбиэдиссэйэ А.А. Сосина: «Быйылгы сылга университет бары факультеттарыттан, институттарыттан баҕалаах оҕолору барыларын хабаарыбыт бөлөхтөргө наардаан оҥордубут. Биһиги ыччаттар төрөөбүт тылларын бэйэлэригэр иҥэринэн, сүппэтин туһугар үөрэҕиттэн тутулуга суох үлэлэһэллэрин көҕүлээрибит тэрээһиммитин ыытабыт. Кыттааччыларбыт сылтан сыл элбээн иһэллэриттэн үөрэбит уонна күрэх ахсын бэйэбит библиотека аатыттан анал бириистэри туттартыыбыт, онно спонсордаатылар «Бичик» кинигэ кыһата уонна Былатыан Ойуунускай аатынан Саха академическай театра».

         Бибилэтиэкэ анал бириистэрин хаһаайыннарынан буоллулар:

         «Хомоҕой тыллаах этээччи» - Уйгулаана Бурнашова, ИЯКН СВ РФ устудьуона;

«Кэскиллээх этээччи» - Виктория Попова, ФЛФ устудьуона;

«Саха тылын эйгэтин кэҥэтэр санаалаах» - Анастасия Хастаева, ИФКИС устудьуона.

“Аман өс” күрэх төрөөбүт тыл уонна култуура өйдөбүлүн, суолтатын үрдэтэргэ, билиини хаҥатарга ананан ыытыллар. Кыттыбыт устудьуоннар төрөөбүт тылларынан ыраастык сааһылаан саҥарар, тыл этэр, истээччигэ санааларын тириэрдэр дьоҕурдарын тургутан көрдүлэр. Ону тэҥэ төрөөбүт тылларын таптыылларын, тылбыт инники дьылҕатын туһугар долгуйалларын итэҕэттилэр, сахабыт тылын харыстыырга ыҥырдылар. Онон бу тэрээһин олус долгутуулаахтык ааста.