Сэтинньи 15 күнүгэр Национальнай библиотека историческай саалатыгар «Ыччат дьоҥҥо ыллык ыйааччы – Алампа» диэн саха литературатын төрүттээччилэриттэн биирдэстэрэ Анемподист Иванович Софронов-Алампа төрөөбүтэ 130 сылыгар аналлаах литературнай биэчэр буолан ааста. Биэчэри «Сэргэлээх уоттара» литературнай түмсүү тэрийдэ.  «Ыччат дьоҥҥо ыллык ыйааччы – Алампа» диэн кэпсэтии ыытыллыбыт сүрүн сыала-соруга - кэнчээри ыччаты сайыннарыы, саха литературатын ыччакка пропагандалааһын. Кэпсэтиигэ оскуола оҕолоро, устудьуоннар кэлэн кытыннылар. Биэчэргэ саха литературатын хаапыдыратын доцена, билэлиэгийэ билимин хандьыдаата, «Сэргэлээх уоттара» литературнай түмсүү салайааччыта М.П. Попова, Өрөспүүбүлүкэтээҕи «Кэскил» оҕо хаһыатын суруналыыһа, саха төрүт култууратын чинчиһитэ Анатолий Николаевич Павлов-Дабыл, билэлиэгийэ билимин хандьыдаата, саха литературатын хаапыдыратын сэбиэдиссэйэ, Алампа олоҕун, айар үлэтин анаан чинчийэр учуонай В.Г. Семенова, саха норуодунай бэйиэтэ Иван Васильевич Мигалкин эдэр ыччакка бэйэлэрин санааларын эттилэр, сүбэ-ама биэрдилэр. Алампа сиэн балтыта Мария Егоровна Емельянова кэлэн ыалдьыттаата. Кэлбит ыалдьыттар Алампа мөссүөнэ көстүбүт каадырдарын көрөн астыннылар, бу каадырдар көстүбүт устуоруйаларын кэрэхсээтилэр. Биэчэри култуура кэллиэһин устудьуоннара «Таптал» драматтан быһа тардыыны көрдөрөн, «Хомуһун» бөлөх «Ытык хайалар кэпсэтиилэрэ» поэманы, Айыы Кыһата оскуола үөрэнээччилэрэ «Төрөөбүт Дойду», «Саха ырыата», «Бу тугуй?» диэн хоһооннору ааҕан киэргэттилэр. Маны таһынан Алампа олоҕор, айар үлэтигэр сыһыаннаах оскуола оҕолорун билиилэрин тургутар биктэриинэ буолла. Биктэриинэ түмүгүнэн саамай элбэх боппуруоска сөптөөх эппиэти биэрбит Республикатааҕы лицей 10 кылааһын үөрэнээччитэ Ганя Старостин кыайыылаах аатын сүгэн, В.Г. Семеноваттан “Алампа” диэн кинигэни бэлэх тутта. Олус сэргэх, истиҥ, интэриэһинэй кэпсэтии буолан ааста. Литературнай биэчэр оһуохайынан түмүктэннэ. Оһуохай тылын ХИНТуоКҮ устудьуона Хаарчаана Семенова уонна Республикатааҕы лицей 10 үөрэнээччитэ Игорь Данилов таһаардылар