Кулун тутар 25 күнүгэр М.К. Аммосов аатынан Хотугулуу-Илиҥҥи федеральнай университекка билим нэдиэлэтин үөрүүлээх арыллыыта буолан ааста. Устудьуону билим эйгэтигэр көҕүлүүр тэрээһин номнуо 5-с сылын ситиһиилээхтик ыытыллар. Үөрэх сүрүн куорпуһугар дьиэлэнэн олорор ХИНТуоКИ, Филологическай бакылтыат, Юридическай бакылтыат уонна Психология института холбоһон нэдиэлэни өрө көтөҕөллүүлээхтик арыйдылар. Ол курдук, ХИФУ наукаҕа уонна инновацияҕа проректора, научнай-чинчийэр салаа салайааччыта К.К. Кривошапкин, ХИНТуоКИ дириэктэрэ Г.Г. Торотоев, Юридическай бакылтыат деканын солбуйааччы Р.Р. Ушницкай, Филологическай бакылтыат декана Г.Е. Жондорова уонна Психология институтун дириэктэрэ А.И. Егорова тыл эттилэр, билим нэдиэлэтэ саҕаламмытынан устудьуоннары эҕэрдэлээтилэр, ыытыллар араас тэрээһиннэр былааннарын билиһиннэрдилэр, бука барыбытыгар ситиһиилэри баҕардылар.

         Сыл ахсын ыытыллар тэрээһин чэрчитинэн биһиги институппутугар устудьуоннарга, маҕыстырааннарга уонна оскуола үөрэнээччилэригэр анаан араас таһымнаах уонна хайысхалаах олимпиадалар, сэминээрдэр, экскурсиялар, куонкурустар, ону тэҥэ научнай-практическай кэмпириэнсийэ ыытыллыаҕа.