Бу дьыл 25 күнүгэр Дьокуускай куорат “Адель” банкеттыыр саалатыгар “Кэхтэри билиммэт кэрэ” (“Красота вне возраста”) истилиис Дая Аталларова ааптарскай бырайыагын чэрчитинэн саха Далбар Хотуттарын хомуурунньуга бэчээттэнэн таҕыста. Бу бэрт халыҥ, сиэдэрэй хаартыскалардаах мааны тастаах дьоһуннаах кинигэ үс тылынан – сахалыы, нууччалыы, английскайдыы бэчээттэнэн Новосибирскайтан буойаһынан айаннаан кэллэ. Биир тыһыынча ахсааннаах тираһа барыта 1,5 тонна ыйааһыны үктүүр эбит! Кинигэ сахалыы тылбааһын М.К.Аммосов аатынан ХИБҮ Хотугулуу-Илиҥҥи норуоттар тылларын уонна култуураларын үнүстүүтүн дассыана, тыл билимин хандьыдаата Надежда Анатольевна Ефремова оҥордо.

Бу кинигэҕэ төрөөбүт норуоттарыгар ураты кылааттарын киллэрбит, араас үлэлээх-хамнастаах, араас дьылҕалаах барыта 230 дьахтар: Далбар Хотун олоҕун кылгас ахтыыта идэтийбит фотограф анаан түһэрбит хаартыскатын кытта бэриллэр.

Манна киирбит кэрэ аҥардарбыт олох уустук суолун эттэринэн-хааннарынан билэн, дьахтар үөһэттэн анаммыт үрдүк ыйааҕын толорон, сытыы-хотуу, тулуурдаах, үлэһит, дьиэ кэргэн, алаһа мааны хотуна ааты сүгүөхтэрин сүкпүттэр эбит диэхпин баҕарабын.

Бырайыак ааптара Дая Аталларова бу орто туруу бараан дойдуга “Кэхтэри билиммэт кэрэ” Дьахтар буоларын, кини дьылҕатынан уопсастыба олоҕун кэтээн көрүөххэ сөбүн бэлиэтээн туран, хас биирдии дьахтарга кэрэ кыымын өйдөөн көрөн, таба тутан, чочуйан-тупсаран хаартыскаҕа дьүһүйэр ураты талааннааҕын бэлиэтиэх тустаахпыт. Кырдьык даҕаны, бу Далбар Хотуттар хас биирдиилэрэ сүрэхтэн саҕыллар туох эрэ ураты кистэлэҥи, таайыллыбаты, баай култуураны иҥэринэн сылдьаллара харахха тута быраҕыллар.

Редколлегия үлэтин туһунан кылгастык этэр буоллахха, бу биир сыллаах сыралаах, түмсүүлээх, хорутуулаах үлэ түмүгэ. Сүрүн үлэлэрин таһынан, ылсан туран үлэлэспит суруксут кыргыттар Күннэй Гагарина (эрэдээктэр), Надежда Ефремова (саха тылыгар тылбаасчыт), Сардаана Жендринская (английскай тылга тылбаасчыт) бары СГУ-ну бүтэрбит кэскиллээх ыччаппыт буолаллар. Фотографтар Д.А. Аталларова, М.С. Яковлев, Н.С. Дьяконов, Н.Е. Пешенников, М.Г. Находкин турунан туран үлэлээбиттэрэ тута көстөр.

Кинигэҕэ үөрэхпит кыһатыгар үлэлээбит, билигин да үлэлии-хамсыы сылдьар тумус туттар кэрэ аҥардарбыт: П.Г. Петрова, Н.В. Саввина, Р.И. Томская, М.Е. Винокурова, билигин биһиги кэккэбитигэр суох, ытыктыыр киһибит Л.Р. Кулаковская киирбиттэрэ бүтүн үнүбэрситиэт киэн туттуута буолар. Маннык таһаарыы ыччакка, үүнэр көлүөнэҕэ сырдык олоҕу батыһалларыгар, норуоттарыгар, дойдуларыгар туһалаах дьон буоларга кыһаналларыгар сирдиир, иитэр-үөрэтэр суолталаах.

Саха сирин аатын ааттатар мааны ийэлэр, эбэлэр бука бары тустаах үлэлэрин таһынан, туох эрэ ураты дьарыктаахтарын (хобби), дьоҥҥо-сэргэҕэ көмөлөһөр амарах сүрэхтээхтэрин (меценаттар), олох ыарахаттарын хорсуннук тулуйалларын, биир-биэс харчыта суох күнүстэри-түүннэри түбүгүрэллэрин (общественниктар, энтузиастар), тарбахтарыгар талааннаахтарын, төрүт култуураны тарҕатар чөл куттаахтарын, ыалдьытымсахтарын, оҕомсохторун астына-хайгыы көрдүм.

Түмүкпэр, ааптар Дая Аталларова баҕарбыт баҕа санаата туолуон баҕарабын: бу кинигэ биир эрэ таһаарыынан муҥурдаммакка, салгыы хас да томнаах бүтүн сиэрийэ буоллун.

Дом!