Сэтинньи 7 күнүгэр литературнай музейга Платон Алексеевич Ойуунускай төрөөбүтэ 125 сылыгар аналлаах "Умнуллубат мөссүөннэр сыдьаайдара" диэн литературнай киэһэ буолан ааста. Манна Ойуунускайы кытта тэҥҥэ алтыспыт, айбыт-туппут Алексей Елисеевич Кулаковскай, Анемподист Иванович Софронов, Максим Кирович Аммосов курдук улуу дьон ааттара, олохторо-дьаһахтара ахтылынна.

Тэрээһин "Тыыннаах тыл" куруһуок чилиэттэрэ Былатыан Ойуунускай хоһооннорун уус-ураннык ааҕылларыттан саҕаланна. Улуу дьон хаартыскаларын саха тыйаатырын артыыстара тыыннаан көрдөрбүттэрэ ыалдьыттар сэҥээриилэрин ылла.

Бу күн ытык дьоммут тутта сылдьыбыт малларын туһунан кэрэхсэбиллээхтик билиһиннэрдилэр: Өксөкүллээх Өлөксөй "Потапову Егору Егоровичу от Алексея Елисеевича Кулаковского. 1917 г." диэн анал суруктаах муос үрүүмкэтэ, Анемподист Иванович Софронов-Алампа дьиэтигэр турбут, кини таптала Дунньа кэрэ сэбэрэтин көрүммүт сиэркилэтэ уонна Былатыан Ойуунускай кириэһилэтэ.

Варвара Борисовна Окорокова билилиэгийэ билимин дуоктара, ХИФУ бэрэпиэссэрэ Былатыан Ойуунускай туһунан кэпсээтэ. Саргылаана Гольдерева-Саргы Куо Ойуунускайга анаабыт хоһоонун аахта. Елена Слепцова–Куорсуннаах "Син биир буолбаат?!" анабыл хоһоонун дорҕоонноохтук ааҕан көрөөччүнү долгутта.

Литературнай биэчэр түмүгэр тэрийээччилэр кыттааччыларга махтал суруктары туттардылар. Варвара Борисовна монографиятын бэлэх уунна. Музей историятыгар хаалар гына уопсай хаартыскаҕа түһүүнэн тэрээһин түмүктэннэ.

Туяра Протасова, ЛҮ-16 бөлөх устудьуона

«Ийэ тыл» пресс-киин

Уус-уран ааҕыы сүүмэрдиир түһүмэҕэ буолла

Прошел отборочный тур конкурса чтецов

Сэтинньи 9 күнүгэр М.К. Аммосов аатынан Хотугулуу-Илиҥҥи бэдэрээссийэлии үнүбэрсиэт устудьуоннарыгар саха сэбиэскэй литэрэтиирэтин төрүттээччи, Саха судаарыстыбаннаһын тэрийсибит, ХХ-с үйэ саҥатыгар олох-дьаһах чыҥха уларыйыытын оҥорсубут уһулуччулаах политическай диэйэтэл, лингвист-учуонай Былатыан Ойуунускай төрөөбүтэ 125-сылыгар аналлаах «Үс саха төрүөҕэр, үөрүүлээх күнүгэр мин ырыам ылланыа, мин аатым ааттаныа» диэн хоһоон ааҕыытыгар күрэх бастакы түһүмэҕэ буолан ааста. Күрэҕи саха литэрэтиирэтин хаапыдырата тэрийэн ыытта. Ол курдук, үнүбэрсиэт араас үнүстүүттэриттэн, бакылтыаттарыттан уопсайа 26 устудьуон кыттыыны ылла. Дьүллүүр сүбэ маннык састааптаах үлэлээтэ: бэрэссэдээтэл Айсен Лугинов - П.А. Ойуунускай аатынан саха академическай драматическай тыйаатырын артыыһа, Егор Николаев - "Хатан" сурунаал сүрүн эрэдээктэрэ, Татьяна Васильева, Саргылаана Егорова - саха литэрэтиирэтин хаапыдыратын дассыаннара. Тэрээһин саҕаланыытыгар Матрена Попова киирии тылы эттэ. Кыттааччылар долгуйаллара харахха быраҕыллар, сорохтор сахалыы таҥас кэппиттэр, муусука доҕуһуоллаахтар эмиэ бааллар. Тэрээһин бэрт таһымнаахтык ааста. Хоһоон ааҕыытын иккис түһүмэҕэ сэтинньи 16 күнүгэр күнүс 16 чаастан СӨ национальнай художественнай музейын быыстапка саалатыгар буолуоҕа.

Дьүүллүүр сүбэ быһаарыытынан иккис түһүмэххэ аастыылар:

По решению жюри на второй тур прошли:

1.     Борисов Семен, ИЯКН СВ РФ, ЛТ-16, 3 к.

2.     Бушуев Иван, ИЯКН СВ РФ, ЯО-18, 1 к.

3.     Винокуров Арсен, ИЯКН СВ РФ, ОРМ-17, 2 к.

4.     Владимирова Иляна, ФЛФ, РЯЛ-18, 1 к.

5.     Геворгян Майя, ФЛФ, ПФ-18, 1 к.

6.     Гоголева Софья, ИЯКН СВ РФ, ПО-МХК-17, 2 к.

7.     Донской Михаил, ФЛФ, ОЖ-18, 1 к.

8.     Иванов Петр-Добун, ИЯКН СВ РФ, ПО-САО-18, 1 к.

9.     Колесов Максим, ГИ, 1 к.

10.                       Лубина Татьяна, ЮФ, 4 к.

11.                       Осипов Артем, ИЯКН СВ РФ, ЛР-17, 2 к.

12.                       Парникова Сандаара, ИЯКН СВ РФ, СП-18, 1 к.

13.                       Попова Виктория, ФЛФ, ОЖ-17, 2 к.

14.                       Попова Яна-София, ФТИ, ЭО-17, 2 к.

15.                       Портнягина Уйгулаана, ИЯКН СВ РФ, ЛТ-15, 4 к.

16.                       Старостин Иван, ПИ, М-ПМО-18, магистрант 1 года обучения

17.                       Тоскина Даяна, ИЯКН СВ РФ, ЛР-18, 1 к.

Мария Винокурова, ЛҮ-17 бөлөх устудьуона

«Ийэ тыл» пресс-киин

«Суруйааччы остуолугар» суруллубут суруктартан...

Билим бэстибээлигэр Былатыан Ойуунускай үбүлүөйдээх сылынан литэрэтиирэ хаапыдырата «Суруйааччы остуола» диэн фотозона оҥорбута. Остуолга 60-70-с сылларга киэҥник туттуллубут бэчээттиир массыҥка, бөрүө баара уонна саамай көстөр миэстэҕэ Ойуунускай боруонса суруйар мала турбута. Түгэнинэн туһанан, бу сыаналаах малы уларсыбыт Б.Ойуунускай аатынан литературнай музейга улахан махталбытын тиэрдэбит. Уонна Ойуунускайга суруллубут суруктартан аҕыйаҕы таһаарабыт.

Улуу Убайбыт үбүлүөйдээх сылынан уруй- айхал буолуохтун!

Хабырыыл Торотуойап,

2018с. Балаҕан ыйын 22 күнэ.

Убайбыт барахсан суруйан көрүүм дуу?Аныгы кэммит тэтимэ алыһын да түргэн. Сайдыы кэллэ Сахабыт сиригэр. Уларыйыы, хамсаныы үйэтэ үүннэ. Сахабыт норуотугар саҥа өйү-санааны киллэрэ сылдьыбыт. Кэскиллээх буоларбыт бэйэбититтэн тутулуктаах. Эрэллээхпит сарсыҥҥы күҥҥэ!

Иван Сивцев,

22.09.18

Убайбыт Былатыан дорообо!

Биһиги Хотугулуу-илиҥҥи бэдэрээссийэлии үнүбэрсиэт саха салаатын устудьуоннара эйиэхэ илдьиппитин, махталбытын тириэрдэбит! Билиҥҥи үйэҕэ туох барыта баар буолла! Киһи сайдарыгар, үүрэнэригэр услуобуйа барыта баар. Баара суоҕа киһи сүрэхтээх уонна баҕалаах буолуон наада.

Эн үлэлээбит үлэҥ, норуоккар оҥорбут үтүөҥ, сыраҥ мээнэ хаалбата. Сахабыт сирэ, төрөөбүт дойдубут сириэдийэ сайдар.

Тоскина Даяна, Николаева Сардаана, Емельянова Влада

22.09.2018 сыл

Былатыан Ойуунускай - үөскээн эрэр үгэспитин олохсутуу ситимин салгыы туппут, тэҥҥэ сайыннарсыбыт, күн бүгүҥҥэ диэри ааттана турар көстүүлэри олохсуппут чулуу киһи. Чулуута, улуута бэрт буолан кини олорбут олоҕо, айар нэһилиэстибэтэ куруук биир көдьүүс көнө, судургу буолбатах. Ити - бэйэ олуҕун кэм-кэрдии иннигэр толук ууруу буолар. Ойуунускай - саха дьоло үрдүүрүгэр төрөөбүт, кини соргулаах олоҕун бэйэтин нөҥүө аһырдыбыт, курдары (олохтору, айымньылары нөҥүө) ылыммыт, ылаттарбыт киһи.

Рустам Каженкин,

22.09.2018