Арассыыйа – элбэх этнос «дьиэтэ». Хас биирдии киһи төрөөбүт дойдутун норуоттарын култууратын, үгэстэрин, биллиилээх дьонун, дьарыктарын билиэхтээх. Итинник сыаллаах Арассыыйаны барытын хабар улахан этнографическай дьыктаан сэтинньи ый 2 күнүгэр быйыл үһүс төгүлүн ыытылынна. Бу тэрээһин 2016 сылтан норуот сомоҕолоһуутун күнүн көрсө Арассыыйа бары субъектарыгар ыытыллар. Дьыктааҥҥа уопсайа 30 ыйытыылаах: 20-тэ Арассыыйатааҕы таһымнаах, 10-на - региональнай. Манна сааһыттан, дуоһунаһыттан тутулуга суох, ким баҕалаах барыта кыттар.

Дьыктаан Дьокуускай куорат үрдүнэн элбэх площадкаҕа ыытылынна. Биһиги дьыктааны ХИФУ сүрүн үөрэнэр куорпуһугар суруйдубут, 424-с улахан аудитория тобус-толору этэ. Тэрээһин аһыллыытыгар юридическай наука дуоктара, ХИФУ юридическай факультетын декана, Саха Өрөспүүбүлүкэтин Судаарыстыбаннай мунньаҕын (Ил Түмэн) бэрэссэдээтэлэ Петр Васильевич Гоголев бырааһынньыгынан эҕэрдэлээтэ, хас биирдии кыттааччыга ситиһиини баҕарда.

Төрөөбүт дойдуга сөҕүмэр тапталы саҕар, биир сомоҕо, доҕордуу буоларга иитэр, хас биирдии омук туһунан билиини хаҥатарга туһалаах, туһулааһыннаах бүтүн Арассыыйатааҕы акция сылын аайы ыытыллар үтүө үгэскэ кубулуйан иһэрэ биһигини үөрдэр. Бу акцияны Удмуртия иилээн-саҕалаан ыытар эбит. Кэлбит дьон бука бары билиилэрин тургутан көрөн, аныгыскытын да кыттарга бигэ эрэллээх тарҕастылар.