Бу дьыл алтынньы 6 күнүгэр биһиги куораппытыгар сүрдээх интэриэһинэй тэрээһин буолан ааста. Ол курдук, ХИФУ РФ Хотугулуу-Илиҥҥи норуоттарын тылларын уонна култуураларын үнүстүүтүн уһуйааччыта, историческай наука кандидата, дассыан Светлана Ивановна Петрова – Уран Хатын “Өбүгэ таҥаһа: бэлиэлэр, ымыылар” диэн ааттаах кинигэтин сүрэхтэниитэ буолла. Саҥа кинигэ – ааптар номнуо онус үлэтэ. Кинигэҕэ иистэнньэннэргэ, саха таҥкаһын сэҥээрээччилэргэ аналлаах туһалаах сүбэ-ама, матырыйаал баар.

Кинигэ сүрэхтэниитигэр Үөһээ Бүлүүттэн, Бүлүүттэн, Тааттаттан, Мэҥэ Хаҥаластан, Хаҥаластан, Намтан норуот маастардара, Светлана Ивановна салайар “Уран иис” түмсүүтүн кыттыылаахтара кэлэн ыалдьыттаатылар. Кинилэр үлэлэрин тэрээһиҥҥэ кэлбит дьон сэргии көрдө. Ордук Наталья Павлова сахалыы истииллээх баайыы таҥастара ыалдьыттар болҕомтолорун тарта.

Светлана Ивановна Петрова кинигэтин, үлэтин туһунан маннык кэпсээтэ:  “Билиҥҥи култуура эйгэтигэр саха таҥаһа олус улахан суолтаны ылар буолла. Араас фестиваллар, куонкурустар, оһуохай, сиэр-туом сайдыыта – барыта таҥаска олоҕурар. Кэнники кэмҥэ таҥас култуурата сүрдээҕин сайынна. Онно биһиги үнүстүүппүт, фольклор хаапыдырата сүрүн оруолу ылан олорор. Тэрээһин туһунан этэр буоллахха, сыала-соруга диэн - дьоҥҥо-сэргэҕэ маастардары билиһиннэрии, үлэлэрин көрдөрүү уонна, биллэн турар, кинигэ атыыта. Манна үнүстүүт оҕолоро көхтөөхтүк кытыннылар.

Миигин 2015 сыллаахха Америка музейыгар Вера Соловьева диэн саха кыыһа ыҥырбыта, “саха ииһин култууратын туһунан лиэксийэ ааҕыаҥ дуо?” диэн көрдөспүтэ. Онно барарбар мин бииргэ алтыһан үлэлиир маастардарым уонна устудьуоннарым үлэлэрин бэлэх гына илдьэ барбытым. Ол быыһыгар Анна Аманатова куруһуокпар сылдьан оҥорбут хабах маатаҕа баар этэ. Ону көрөн дьон олус интэриэһиргээбиттэрэ, бэл, икки үлэни атыыласпыттара.

Лаура Кендаль, Америка музейын Азия сиэктэрин салайааччыта, бэрэпиэссэр, биһиэхэ көмүс бэчээттээх, илии баттааһыннаах махтал суруктары туттарбыта. Маннык суругу 8 киһиэхэ ыыппыттара”.

Бэрэпиэссэр Лаура Кендаль махтал суругун туппут аҕыс дьон иһигэр биһиги үнүстүүт 4 кууруһун устудьуона Анна Аманатова баар. Сурук ис хоһооно маннык:

“Уважаемая Анна Николаевна! Спасибо за пожертвование кошелька (из скотского пузыря). Мы глубоко ценим искусно созданное дополнение к Американскому музею естественной истории, отделу антропологии азиатской этнологии сибирских коллекций.

Профессор Лаура Кендаль, заведующий отделом антропологии, куратор азиатских этнографических коллекций Американского музея естественной истории. Нью-Йорк, США”.

Анна Аманатова, литературнай үлэһит салаа 4 куурус устудьуона: “Мин маҥнайгы кууруска үөрэнэ сылдьан, Светлана Ивановна куруһуогар дьарыктаммытым. Ол иннинэ улаханнык иискэ ылса илигим, ол эрээри иистэниэхпин олус баҕарар этим. Хабах суумка – мин бастакы оҥоһугум. Светлана Ивановна иис бары кистэлэҥнэрин билэр, уопуттаах буолан миэхэ көмөлөспүтэ аҕай. Кини ыйан-кэрдэн биэрэн, суумкабын түргэнник тигэн бүтэрбитим.

Билигин үлэм Нью-Йорк куорат музейыгар экспонат буолан турарыттан наһаа үөрэбин уонна уһуйааччыбар Светлана Ивановнаҕа истиҥ махталбын тиэрдэбин. Инникитин иис бары кистэлэҥнэрин баһылыахпын баҕарабын”.

Уһуйааччыбытын Светлана Ивановнаны кинигэтэ сүрэхтэммитинэн уонна устудьуоммутун Анна Аманатованы Америкаттан көмүс бэчээттээх, илии баттааһыннаах махтал суругу туппутунан өссө төгүл эҕэрдэлиибит!