Быйыл үөрэххэ саҥа киирбит устудьуоннарбыт балаҕан ыйын 15 күнүгэр ыытыллыбыт «День Первокурсника» тэрээһиҥҥэ көхтөөхтүк кытыннылар.

Саха тылын хаапыдыратын сонуна:

Иван Егорович Алексеев-Хомус Уйбаан тыл билимин дуоктара, бэрэпиэссэр, Хомус Аан дойдутааҕы тэрилтэтин генеральнай сэкирэтээрэ атырдьах ыйын 31 күнүттэн балаҕан ыйын 9 күнүгэр диэри Кыргыстан Чолпон Ата куоратыгар ыытыллыбыт «Игры кочевников» диэн Аан дойдутааҕы тэрээһин култуурунай бырагыраамматыгар кыттан кэллэ.

Саха литэрэтиирэтин хаапыдыратын сонуна:

Хаападырабыт профессора З.К. Башарина Карл Георгиевич Башаринныын балаҕан ыйын 11 күнүгэр ХИФУ «Сэргэлээх уоттара» култуура киинигэр үгэскэ кубулуйбут «Углов ааҕыыларын» тэрийэн ыыттылар.

Балаҕан ыйын 15 күнүгэр бука бары ытыктыыр киһибит, Учууталбыт Баһылай Никиитис Бырдьахаанап олохтон туораабытын 1 сыллаах ахтыыта буолан ааста. Кэлбит дьон уһуйааччыбытын, үтүө киһини истиҥ тылынан ахтан-санаан ыллылар. Үнүстүүттэн профессордар Г.Г. Филиппов, В.Б. Окорокова Тааттаҕа Чөркөөххө Б.Н. Бырдьахаанап пааматынньыгын туруорууга сылдьан, ахтыы оҥорон, олохтоохтору кытта көрсөн кэллилэр.

Болкулуор хаапыдыратын сонуна:

Балаҕан ыйын 7 күнүгэр үөрэтэр оҕолорбут Доҕордоһуу болуоссатыгар «Доҕордоһуу оһуохайыгар» кытыннылар.

Сорох устудьуоннарбыт регионнар икки ардыларынааҕы научнай-практическай кэмпириэнсийэҕэ ситиһиилээхтик кыттан кэллилэр.

Хаҥалас улууһугар Орто дойдуга Кытай делегациятын кытта улахан көрсүһүү буолан ааста.

Методика хаапыдыратын сонуна:

Хаапыдырабыт сүрүн сонуна - саха литературатыгар10-11 кылаастарга аналлаах үөрэх кинигэтэ бэчээттэнэн таҕыста. Бу учебникка 9 кылаас кэнниттэн саха литературатын историятын кэрдиис кэмнэрин сырдатар чулуу айымньылар киирдилэр. Ол курдук, Өксөкүлээх Өлөксөй «Ойуун түүлэ» поэмата, П.А.Ойуунускай «Кыһыл ойууна» 9 кылааска үөрэтиллибиттэрэ буолан баран, 10 кылааска иккистээн киллэрилиннилэр. Бу айымньылар биһиги норуоппут олоҕун суолун күн бүгүнүгэр диэри ыйан-кэрдэн биэрэр сүдү айымньылар буолалларынан, хайаатар даҕаны саха ыччата төһө кыалларынан кини ис киэбигэр киирэн ааҕар, ырытар кыахтаах буолуохтаах диэн иккистээн киллэрдибит. Биллэн турар, бу айымньылар бүппэт дириҥ ис хоһоонноохтор, онон киһи хаһыстаан да аахпытын иһин саҥаттан саҥаны арыйан иһэр аналлаах. Итиэннэ 11 кылаас учебнигар саха литературатын үөрэҕэр киирбэтэх саҥа ааттар, айымньылар киирдилэр.

Туризм хаапыдыратын сонуна:

Бу нэдиэлэҕэ Бахайскай университетыттан кэпсэтии быһыытынан икки преподаватель үлэлии кэллэ. Кинилэр биһиги устудьуоннарбытын кытай тылыгар үөрэтиэхтэрэ, семестр бүтүүтүгэр тест тутуохтара. Ол тургутууну этэҥҥэ ааспыт оҕолор тохсунньу ыйга Бахайскай университекка үөрэнэ барыахтара. Үөрэхтэрин икки сылыгар манна үөрэниэхтэрэ, икки сылыгар Кытайга. Ол түмүгэр устудьуоннарбыт икки дипломнаах үөрэхтэрин бүтэриэхтэрэ.