Аммаҕа Юрий Борисов олоҥхотунан музыкальнай-хореографическэй испэктээк турда

Олунньу ый 18 күнүгэр Амматааҕы Ф. Потапов аатынан Норуот айымньытын дьиэтигэр Юрий Борисов «Баһырҕастаах аттаах Баабый Баатыр» олоҥхотунан музыкальнай-хореографическай испэктээк премьерата буолла.

Испэктээги «В.Г. Короленко аатынан туспа предметтэри дириҥэтэн үөрэтэр Амма 1 №-дээх орто оскуолата» уонна «Сир симэҕэ» Россия көрдөрүүлээх ансаамбыла кыттыһан, бырайыак быһыытынан оҥорон туруордулар. Бырайыак салайааччыта Н. Тылбыкова; туруорааччы режиссер, худуоһунньук, сценограф М. Ефимова; фольклор С. Харитонова; муусука: В. Татаринов, К. Карманов; көстүүм: А. Федорова; декорация: Н. Гаврильева, Л. Окороков, С. Захаров.   

Испэктээги илэ хараҕынан көрбүт, эт кулгааҕынан истибит Юрий БОРИСОВ кэпсиир: «Испэктээк икки төгүл турбутугар саал тобус-толору этэ. Режиссер М.В. Ефимова араас уоту-күөһү, спецэффектэри туһанан, испиктээк үрдүк таһымнаах буоларын ситиһиэн ситистэ. Сүрүн оруолларга Амма 1 №-дээх орто оскуолатын 8 «Б» кылааһын үөрэнээччилэрэ оонньоотулар. Оҕолор олус эппиэтинэстээхтик, кыһамньылаахтык сыһыаннаспыттара өтө көстөр. Дьиҥинэн, бу оҕолортон хайалара даҕаны олоҥхону толорбот. Ол гынан баран, киһи сүрэҕин ортотунан киирэр гына ыллаан-туойан, оонньоон көрдөрдүлэр. 2024 с. Аммаҕа Өрөспүүбүлүкэтээҕи Олоҥхо Ыһыаҕа ыытыллыахтаах. Маныаха, бу тэрээһин улахан кылааты киллэрбитэ саарбаҕа суох. Хас биирдии испэктээккэ онньообут оҕо, бу оҕо төрөппүттэрэ, оскуола учууталлара, уһуйааччылара, испиктээккэ көрөөччү буолбут дьон бука бары олоҥхо туһунан тутаах өйдөбүллэри ыллахтара, истэригэр иҥэриннэхтэрэ. Түмүктээн эттэххэ, олус үрдүк таһымнаах тэрээһин буолла. Түгэнинэн туһанан, бырайыак ааптара Ньургустаана Николаевна ТЫЛБЫКОВАҔА, туруорааччы режиссер Марианна Васильевна ЕФИМОВАҔА, учууталларга, уһуйааччыларга, кыттыбыт оҕолорго бука барыларыгар истиҥ махталбын биллэрэбин!».

Санатар эбит буоллахха, бу олоҥхону Юрий Борисов 2007 с. Өрөспүүбүлүкэтээҕи лицей-интернакка үөрэнэ сылдьан айан-тутан, суруйан кэбиспитэ. Онтон 7 сыл буолан баран, 2014 с. Олоҥхо научнай-чинчийэр института туспа кинигэ быһыытынан таһаарбыта. Кинигэ тахсыбыта 9 сыл буолбутун кэннэ, аны испиктээк быһыытынан улахан сыанаҕа ситиһиилээхтик, үрдүк таһымнаахтык турда.

Е. БУБЯКИН хаартыскаҕа түһэриилэрэ: