Өрөспүүбүлүкэтээҕи «Куйуур Олоҥхото – 2022» күөн күрэс түмүктэрэ

Кулун тутар 18-19 күннэригэр Мэҥэ-Хаҥалас улууһун I Тыыллыма нэһилиэгэр «Ыччат Олоҥхоһут» Республикатааҕы общественнай түмсүү сыл ахсын ыытар сүрүн тэрээһинин – «Куйуур Олоҥхото-2022» олоҥхону толорор ыччаттар республикатааҕы күөн-күрэстэрин тэрийэн ыытта. Быйылгы куйуур олоҥхото Мэҥэ-Хаҥалас чулуу олоҥхоһуттара Степанов Николай Иванович – Ноорой төрөөбүтэ 125 сылын, Колесов Гаврил Гаврильевич төрөөбүтэ 90 сылын көрсө уонна I Тыыллыма нэһилиэгэ төрүттэммитэ 200 сылын бэлиэтиир тэрээһиннэр чэрчилэринэн буолла.

Бастакы күн, кулун тутар 18 күнүгэр В.П. Ларионов аатынан түмэлгэ экскурсия, тэрээһин үөрүүлээх арыллыыта, олоҥхону олоҕурбут ньыманан толорууну истии түүн үөһүгэр дылы буолла.

Тэрээһин иккис күнүгэр, кулун тутар 19 күнүгэр кыттааччылар бука бары Лүкээрики Эбэҕэ киирэн куйуурдааһын сиэрин-туомун, нэһилиэк түөлбэлэрэ туруорбут 4 хамаандаларын куйуурдааһыҥҥа күөн күрэстэрин көрдүлэр. Сыалаах собо миининэн тото-хана аһаан баран, эбиэт кэннэ салгыы олоҥхону истии салҕанна. Ол кэннэ төгүрүк остуол тула атах тэпсэн олорон аһаҕас санаа атастаһыыта буолла.

Быйылгы, сэттис төгүлүн ыытыллар «Куйуур Олоҥхото» тэрээһиҥҥэ сэттэ улуустан (Амма, Мэҥэ-Хаҥалас, Чурапчы, Хаҥалас, Өлүөхүмэ, Бүлүү, Нам) уонна Дьокуускай куораттан 10 ыччат кыттыыны ылла.  

Күөн күрэс дьүүллүүр сүбэтигэр М.К. Аммосов аатынан ХИФУ профессора Г.С. ПОПОВА – Санаайа (председатель), Өрөспүүбүлүкэтээҕи «Олоҥхо Киинин» сүрүннүүр үлэһитэ У.М. ФЛЕГОНТОВА, I Тыыллыма нэһилиэгин А.М. Алексеев аатынан култуура киинин уус-уран салайааччыта В.В. НИКИФОРОВ уонна М.К. Аммосов аатынан ХИФУ Олоҥхо научнай-чинчийэр институтун научнай үлэһитэ, «Ыччат Олоҥхоһут» өрөспүүбүлүкэтээҕи общественнай түмсүү салайааччыта Ю.П. БОРИСОВ үлэлээтилэр.

Тыҥааһыннаах күрэх түмүгэр, дьүүллүүр сүбэ бу курдук кыайыылаахтары быһаарда:

«Добун Аат» (Гран-При) – Станислав ИВАНОВ, Мэҥэ-Хаҥалас Култуураҕа управлениетын исписэлииһэ.

I истиэпэннээх диплом – Прасковья ЛЕБЕДЕВА (Хаҥалас улууһа, ХИНТуоКИ 1 кууруһун магистрана).

II истиэпэннээх диплом – Яна НЮРГУСОВА (Дьокуускай к., культуролог).

III истиэпэннээх диплом – Анастасия АЛЕКСЕЕВА (Чурапчы улууһа, Олоҥхо Театрын артыыһа).

Анал ааттар:

1. Сэһэн сүнньүн тутар олоҥхоһут – Марфа АММОСОВА (Мэҥэ-Хаҥалас улууһа, АГИКИ 4 кууруһун устудьуона, салайааччы З.А. Стрекаловская).

2. Кылыһах ырыалаах, дорҕоон тойуктаах олоҥхоһут – Михаил ШАМАЕВ (Бүлүү улууһа, АГИКИ 4 кууруһун устудьуона, салайааччы З.А. Стрекаловская).

3. Хомоҕой тыллаах олоҥхоһут – Анна КИРИЛЛИНА (Амма улууһа, Амматааҕы 2 №-дээх оскуола саха тылын уонна литературатын учуутала).

4. Түөлбэ олоҥхоһут – Ньургустаана ЛЕБЕДЕВА (Нам улууһа, Маймаҕа нэһилиэгин «Кыталык» сынньалаҥ киинин уус-уран салайааччыта).

5. Кэскиллээх олоҥхоһут – Надежда АКИМОВА (Өлүөхүмэ оройуона, ХИНТуоКИ 1 кууруһун устудьуона, салайааччы Ю.П. Борисов).

6. Түһүлгэлээх олоҥхоһут – Айталина ВАСИЛЬЕВА (Мэҥэ-Хаҥалас улууһун «Олоҥхо Дьиэтин» норуот айымньытын киинин уус-уран салайааччыта).

Кыайыылаахтар тустаах бириистэринэн, анал дипломнарынан наҕараадаланнылар.

Бырайыак ааптара Г.С. ПОПОВА – Санаайа «Куйуур Олоҥхото-2022» тэрээһин туһунан тус санаатын маннык эттэ: «Олоҥхо утумун тута сылдьар ыччаттар муһуннулар. Үс бэйэ олоҥхолоох ыччат баар. Саҥа биир-икки толорооччу баара. Олор тугунан да солбуллубат үөрэх, уопут ыллахтара. Турукка киирэр диэн хайдаҕын илэ истэр-көрөр дэлэ үчүгэй булуо дуо! Төгүрүк остуолга мустубут санааларын тоҕо тэбээн, түһүлгэбит кэскилин кэҥэттилэр, ахтыбыт, ахтыспыт иэйии толору илгийбитэ инники суолбутун тэлэйдэ! Түһүлгэбит иитигэр киирбиккэ бары барҕа махтал!».

Түмүктээн эттэххэ, бука бары интэриэстээх дьон, тустаах тэрилтэлэр «Ыччат Олоҥхоһут» түмсүү тула сомоҕолоһон «Куйуур Олоҥхото-2022» тэрээһин үрдүк таһымнаахтык ааста.