Олунньу ый 9 күнүгэр, М. К. Аммосов аатынан ХИБҮ ГУК Билим бибилэтиэкэтигэр төрөөбүт тыл уонна сурук-бичик дэкээдэтин чэрчитинэн Саха Өрөспүүбүлүкэтигэр үрдүк үөрэххэ саха салаата арыллыбыта 85 сылыгар анаан “Аман өс” күрэс ыытылынна. Үгэскэ кубулуйбут тэрээһиммит 2014 сылтан саҕаламмыта. Бүгүн элбэх ыччат сахатын тылын өрө тутан, ыраастык саҥарарга-иҥэрэргэ дьулуһар буолан, күрэхпитигэр 16 оҕо кэлэн ситиһиилээхтик кыттыбытыгар махтанабыт! Күрэх икки түһүмэҕинэн ыытылынна. Иккис түһүмэххэ уон бастыҥ этээччи талылынна. Ол курдук, Аянитов Никита ( ИЯКН), Яковлева Констанция (ИЯКН), Куприянов Арнольд (ПИ), Китаева Алина (ИЯКН), Шамаева Сайыына (ИЕН), Неустроева Роза (ФТИ), Эверстов Мичил (ИЕН), Караваев Родион (ГРФ), Слепцов Руслан (КИТ), Васильев Вячеслав (СУНЦ). Быйыл аан бастакынан СУНЦ 10 кылаас үөрэнээччитэ Васильев Вячеслав кэлэн кыттыбыта сүрдээҕин биһирэннэ.

 Дьүүллүүр сүбэ бэрэссэдээтэлэ, саха тылын хаапыдыратын сэбиэдиссэйэ, тыл билимин хандьыдаата Чиркоева Дария Ивановна олунньу ый 21 күнүгэр дэкээдэ үөрүүлээх сабыллыытыгар кыайыылаахтары ыҥырда. Ол күн хас биирдии кыттааччыга туоһу сурук, наҕараадалар туттарыллыахтара. 

Ыытыллар сирэ: ГУК, Устудьуоннар көҕүлээһиннэрин киинэ (4 этээс, 414 ауд)
Буолар күнэ: Олунньу ый 21 күнэ, 16.00 чаастан