Улуу олоҥхоһут Т.В. Захаров-Чээбий 150 сылыгар аналлаах «Уран тыл ууһа, айар тыл аҕата» кинигэ быыстапката.

Сэтинньи 30 күнүгэр ХИФУ учуонай саалатыгар биллиилээх олоҥхоһут Тимофей Васильевич Захаров-Чээбий төрөөбүтэ 150 сылыгар аналлаах “Эпическое наследие в условиях трансформации социокультурного пространства” научнай практическай конференция буолан ааста. 

Тимофей Васильевич Захаров-Чээбий саха бастыҥ олоҥхоһута этэ. Саха дьонугар-сэргэтигэр киэҥник биллибит Өксөкүлээх Өлөксөй, Платон Алексеевич Ойуунускай уонна Максим Кирович Аммосов Чээбийи үрдүктүк сыаналыыллара, киниэхэ сүгүрүйэллэрэ. Чээбий олоҥхотун тылын-өһүн, толорор маастарыстыбатын көннөрү истибит эрэ буолбатахтар, анаан-минээн олоҥхолотон улахан дуоһуйууну ылбыттара. 

Саха народнай поэта Күннүк Уурастыырап П.А. Ойуунускай Чээбий туһунан эппитин бэйэтин ахтыытыгар киллэрбитэ баар: “Этэрэ ырааһынан, тыла ууһунан эһиги Чээбийгит, кырдьык суккуйан түһэн, кэрэ олоҥхоһут этэ. Мин киниттэн ордук тахсыылаахтык этэр олоҥхоһуту истибэтэҕим» - диэн бэрт үчүгэй сыанабылы биэрбит.

Ойуунускай Чээбийи чахчы үрдүктүк сыаналаабытын – 

 «Тоҕус халлаан дьураатыгар 

Тура төрөөбүт 

Дьулусхан субуйа сүүрүк 

Дьураа хара аттаах 

Дьулуруйар Ньургун Боотур” 

олоҥхо киирии тылыттан биһиги билэбит. 

“Үс саха үөскээн-төрүөн тэнийбитин,

Үөһээҥи-алларааҥы үс биис уустара 

Үөскээбит үһүйээннэрин үтүктэн кээспитин 

Эмис Түмэппий курдук 

Этэн дьэргэлдьиттэхпинэ», - 

Чээбий Түмэппий аатын ааттыыр.

ХИФУ Научнай библиотекатын үлэһиттэрэ конференцияҕа «Уран тыл ууһа, айар тыл аҕата» кинигэ быыстапкатын тэрийэн кыттыстыбыт. 

Быыстапкаҕа Т.В. Захаров -Чээбий  үгүс элбэх олоҥхолоруттан, ырыаларыттан соҕотох биир эрэ бэчээттэммит “Ала Булкун” олоҥхото, кини олоҥхолорун ырыппыт чинчийээччилэр, учуонайдар В.В. Илларионов, Е.А. Архипова, Т.В. Илларионова үлэлэрэ уонна биир дойдулаахтарын ахтыылара, ыстатыйалара турдулар.