СВФУ глазами СМИ

ХИФУну бүтэрээччилэр тыа сиригэр үлэлии барар баҕалаахтарын биллэрдилэр
  • 17 Февраля 2021

ХИФУну бүтэрээччилэр тыа сиригэр үлэлии барар баҕалаахтарын биллэрдилэр

Хотугулуу-Илиҥҥи федеральнай университет устудьуоннара суруналыыс, физкултуура учуутала уо.д.а. вакансиялары сэҥээрбиттэрин, Орто Халыма, Булуҥ, Уус Маайа улуустарын бэрэстэбиитэллэрэ кыттыылаах үһүс онлайн көрсүһүүгэ биллэрдилэр. 

Булуҥ улууһа үөрэх эйгэтигэр баар 21 вакансияны билиһиннэрдэ. “Ордук элбэх вакансия Тикси бөһүөлэгэр баар, олор кэккэлэригэр муусука, уруһуй, англия тылын учууталларын миэстэтэ. Биһиги улууспутугар педагогическай кэллэктиип бигэ туруктааҕынан биллэр. Эдэр педагогтары үөрүүнэн көрсөбүт, өрүү методическай көмө оҥорорго бэлэммит. Ону таһынан, биһиэхэ баар чинчийэр ыстаансыйалары кытта бииргэ үлэлэһэбит. Олорор дьиэнэн хааччыйан өйүүбүт, СӨ Үөрэҕин уонна наукатын министиэристибэтинэн биирдэ бэриллэр өйөбүл үп (подъемные) көрүллэр”, — диир Булуҥ улууһун үөрэҕин управлениетын начаалынньыга Виктор Катанов.

“Вакансия үгүс өттө доруобуйа харыстабылын эйгэтигэр баар, чопчу хайысхалаах (узкий профиль), учаастактааҕы терапевт быраастар. Үөрэх эйгэтигэр 19 вакансия баар. Эдэр исписэлиистэри ханнык баҕарар бөһүөлэккэ дьиэнэн хааччыйабыт”, — диэн Орто Халыма улууһун баһылыгын гражданскай уопсастыбаны сайыннарыыга солбуйааччыта Анна Попова иһитиннэрдэ.

Уус Маайа улууһун Дьарыктаах буолууга киинин чахчытынан, улууска 95 вакансия аһыллыбыт. Ол курдук, 18 педагог, 15 мэдиссиинэ үлэһитэ, 3 ойууру харыстыыр, көмүскүүр уонна хат оҥорон таһаарар эйгэҕэ үлэһит наада. “Быйыл биһиги улууспутуттан 17 киһи үөрэҕин бүтэрэр. Эдэр дьоҥҥо санатабын: ханна төрүүгүн – онно туһалааххын. Биһиги хомунаалынай өҥө иһин төлөбүрү толуйабыт, тыа сиригэр үлэлииллэрин иһин эбии төлөбүрү көрөбүт”, — диэн Уус Маайа улууһун үөрэҕин управлениетын начаалынньыга Полина Петрова кэпсиир.

РФ Хотугулуу-илиҥҥи норуоттарын тылларын уонна култууратын институтун бүтэрэр Алексей Андросов ХИФУга Саха сирин ис уонна тастан киирии туризмын уратытын үөрэтэр. “Биһиги университеппыт өрөспүүбүлүкэҕэ саамай ааттаах-суоллах кыһа буолан,  үлэҕэ киирэргэ үчүгэй кыаҕы биэрэр. ХИФУ дипломун тэрилтэлэр ордук сыаналыыллар. Үрдүк үөрэҕи бүтэрэн баран үлэ буларым миэхэ улахан суолталаах, исписээлинэспинэн булбут киһи. Инникитин бэйэм биисинэс арынар баҕа санаалаахпын. Онуоха уопут иҥэринэр ирдэнэр. Саҥа саҕалыырбар үрдүк хамнаска таласпаппын. Мин санаабар, хамнас уопуту кытта тэҥҥэ үрдүүр”, — диэн устудьуон санаатын үллэстэр.

Ыспыраапка: Быйыл Орто Халыма улууһуттан төрүттээх 21, Булуҥ улууһуттан — 19, Уус Маайаттан — 17 киһи үөрэҕин бүтэрэр.


Автор: Эдэр Саас

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).