Амма Эмиһигэр устудьуоннар биир дойдулаахтарыгар Ороһуоспа күн үгэс буолбут дьоро киэһэни бэлэхтээтилэр. Маннык тэрээһин олохтоох ыччаты сомоҕолуур, төрөөбүт түөлбэҕэ тапталы иитэр.

Аммаҕа Эмис нэһилиэгэр устудьуоннар төрөөбүт түөлбэлэригэр Ороһуоспа күн «Сүллүүкүн – шоу» диэн ааттаах ураты бырааһынньыгы бэлэхтээтилэр.

Култуура уонна искусство коллеһын устудьуона Айтал Соловьев туруоруутунан, ХИФУ устудьуоннара Василий Уваров көрү – нары көҕүлээһининэн уонна тэрийсиитинэн, сэргэх ыытааччылар Диана Петрова, Ньургун Тихонов салайыыларынан сахалыы тыыннаах ырыа, тэтимнээх үҥкүү, көр – күлүү киэһээтэ тэрилиннэ. Роберт Федоров, Лариса Журавлева, Егор Захаров, Роман Зебров эҕэрдэ ырыалара, Арьяна Захарова үҥкүүтэ көрөөччүлэр ытыстарын дохсун тыаһынан доҕуһуолланан истэ.  ХИФУ история факультетын ыччаттара күндү ыалдьыт буоллулар. Талааннаах хомусчут Егор Никифоров көрөөччүлэр куттарын тутта. Үҥкүүлэри Дарина Васильева туруоран эрчимнээх эдэр саас эйгэтин олохтоото. Музыканан Екатерина Захарова аатынан култуура киинин исписэлииһэ, биллэр аранжировщик Василий Татаринов – Хоту Уолан киэргэтэн көмө буолла.  Олохтоох фермер, урбаанньыт Галина Бубякина устудьуоннарга спонсор быһыытынан көмөлөстө, махталын эттэ уонна ырыанан эҕэрдэтин тириэртэ.

«Эмис нэһилиэгитэн төрүттээх университет, педагогическай колледж, индустриальнай политехническэй колледж, музыкальнай колледж 17  устудьуоннара уонна история факультетыттан 5 ыалдьыт устудьуон бэйэбит кыахпытынан кэнсиэр туруордубут. Түмүккэ бары Эмис Өрөгөйүн ырыатын күргүөмүнэн толордубут. Бэйэбит туохха дьоҕурдаахпытын, тугу ситиспиппитин төрөппүттэрбитигэр, эбэлэрбитигэр, эһэлэрбитигэр тиийэ бары кэлэн астына көрдүлэр. Маннык тэрээһин төрөөбүт түөлбэбитигэр тапталы күүһүрдэр, барыбытын түмэр, сомоҕолуур. Үлэһит буоллахпытына, ыраах да, чугас да сырыттахпытына тапталлаах Эмиспит сайдарыгар күүс, көмө буола туруохпут», – диэн этэр Мииринэйдээҕи политехническэй институт устудьуона Авдей Тимофеев.

Ааптар: Алтана Артемьева