"Ааттаах олоҥхоһуттар аартыктарынан, ытык кырдьаҕастар ыллыктарынан" тосхол тула

Бүгүн, сэтинньи ый 24 күнүгэр 16 чаастан "Олоҥхо балаҕана" творческай лабораторияҕа (ХИФУ сүрүн корпуһа, Олоҥхо института) сэргэх тэрээһин буолан ааста. Ол курдук, Юрий БОРИСОВ  "Ааттаах олоҥхоһуттар аартыктарынан, ытык кырдьаҕастар ыллыктарынан" авторскай бырайыагын тосхолун олоххо киллэрии туһунан кэпсэтии, санаа үллэстиитэ тэрилиннэ.

Бырайыак сүрүн сыалынан "Билиҥҥи балысхан сайдыылаах кэмҥэ олоҥхолооһун саха норуотун төрүт идэтин быһыытынан сөргүтүллүөн сөп дуо?" диэн үгүс чинчийээччини, олоҥхону сэҥээрээччини долгутар ыйытыыга хоруйу быраактыка көмөтүнэн көрдөөһүн этэ. Сыалы ситиһэргэ бырайыак маннык соруктарынан салайтарбыта: 1) олоҥхону олоҕурбут ньыманан толорууну киэҥ эйгэҕэ (оҕо аймах, ыччат, аҕам саастаах дьон) көрдөрүү; 2) олоҥхону өйдүүр, сыаналыыр дьоҕурдаах дьон (эпическай аудитория) баар буоларын ситиһии; 3) олоҥхолооһун умнуллан эрэр «уос аһар ырыа», «кутурук салайар ырыа», «атах соболоҥо» диэн төрүт өйдөбүллэрин сөргүтүү; 4) олоҥхону толорууга маастар кылаастары ыытыы (олоҥхо сэһэнэ, ырыата, тута хоһуйуу уо.д.а.); 5) олоҥхоһут (олоҥхону толорооччу) олоҥхолуур дьоҕурун идэ таһымыгар таһаарыы.

Кэпсэтиигэ кыттыбыт ыалдьыттар, чуолаан аҕа көлүөнэ аныгы олоҥхоһута Владимир Дмитриевич ДАНИЛОВ – Бэһэлэйдээх уонна Ньурбаттан кэлбит ыалдьыт, Күндээдэ оскуолатын учуутала Анна Васильевна ПЕТРОВА, санааларын ирэ-хоро эттилэр, бу бырайыак суолтата саха олоҥхолооһунун үгэстэрин сөргүтүүгэ улахан суолталааҕын бэлиэтээтилэр. Маны таһынан, эдэр олоҥхоһуттан "Олоҥхо тиэкиһэ эйиэхэ хайдах кэлэрий?", "Төрдүгэр олоҥхоһуттар бааллар дуо?", "Олоҥхону толоро олорон хайдах-туох турукка киирэҕин?", онтон да атын интэриэһиргиир ыйытыыларын биэрэн тэрээһиҥҥэ көхтөөхтүк кытыннылар.





Бырайыак түһүмэхтэрин түмүгүн туһунан сиһилии манна аах:

2019 - https://www.s-vfu.ru/universitet/rukovodstvo-i-struktura/instituty/niio/news_detail.php?ELEMENT_ID=1...
2020 - https://www.s-vfu.ru/universitet/rukovodstvo-i-struktura/instituty/niio/news_detail.php?ELEMENT_ID=1...
2022 - https://www.s-vfu.ru/universitet/rukovodstvo-i-struktura/instituty/niio/news_detail.php?ELEMENT_ID=1...