В.Н. Протодьяконов аатынан бастакы анал истипиэндьийэни туттарыы

Ыам ыйын 17 күнүгэр П.А. Ойуунускай аатынан литэрэтиирэ түмэлигэр «Санаанан санааны дабайан...» диэн Саха сиригэр ньургуһун күнүн көрсө сүгүрүйэр киһибит, учууталбыт Василий Никитич Протодьяконов аатынан бастакы анал истипиэндьийэни туттарыы тэрээһинэ буолан ааста. Тэрээһини саха литэрэтиирэтин хаапыдыратын магистраннара ыыттылар. Стипендиат үрдүк аатын үнүстүүппүт киэн туттар, биир чаҕылхай устудьуона Екатерина Гладкина сүктэ. Киниэхэ В.Н. Протодьяконов сиэн балта Наталья Михайловна Слепцова туоһу суругу туттарда, өссө үрдүк ситиһиилэри баҕарда.

Бу күн Василий Никиитиһи үөрэппит оҕолоро, бииргэ үлэлээбит кэллиэгэлэрэ, чугас дьоно истиҥ-сылаас тылларынан ахтан аастылар. Үнүстүүт дириэктэрэ Г.Г. Торотоев В.Н. Протодьяконов оҕолоругар, аймахтарыгар анал истипиэндьийэни олохтообуттарыгар махталын биллэрдэ. Профессордар Г.Г. Филиппов, З.К. Башарина, суруйааччы Н.Е. Винокуров-Урсун, суруналыыс Уйбаан Ушницкай, «Күрүлгэн» альманах эрэдээктэрэ А.Г. Гуринов-Арчылан, кураатардаабыт устудьуоннарын аатыттан ХИФУ дассыана Л.Е. Манчурина о.д.а. Василий Никиитиһи уһулуччулаах учуутал, талааннаах мэтэдьиис, тапталлаах кураатар, мындыр чинчийээччи, кириитик быһыытынан бэлиэтээтилэр. В.Н. Протодьяконов ийэтин кэриэтэ киһитэ, эдьиийэ Татьяна Никитична Полятинская быраатын оҕо сааһын түгэннэриттэн кэпсээтэ, истиҥ ахтыыны оҥордо, хоһоон ааҕан барыбытын долгутта.

Саха литэрэтиирэтин хаапыдыратын дассыана Л.П. Григорьева В.Н. Протодьяконов аатынан саха литэрэтиирэтин кириитикэтигэр анаммыт үлэлэр куонкурустарын түмүгүн иһиттиннэрдэ. Кыайыылааҕынан магистрант Маргарита Иванова буолла.

Тэрийээччилэр В.Н. Протодьяконов олоҕор, чинчийэр үлэтигэр сыһыаннаах биктэриинэни ыыттылар. Оттон “Сэргэлээх уоттара” куруһуок устудьуоннара В.Н. Протодьяконов хоһооннорун аахтылар. А.С. Пушкин аатынан национальнай бибилэтиэкэ баай ис хоһоонноох быыстапканы туруоран кэлбит дьону кэрэхсэттэ. Бэлиэ түгэн Елена Старостина-Хотун Арылы толоруутугар «Ньургуһуннар» ырыанан уонна алаадьылаах үүттээх чэйи иһиинэн, истиҥ кэпсэтиинэн түмүктэннэ.

В.Н. Протодьяконов билиитэ-көрүүтэ, үөрэххэ дьулуура биһиэхэ өрүү холобур буола туруоҕа диэн бигэ эрэллээхпит.