Кинигэни ааҕыы ситимэ салҕанар

Аныгы интернет, техника үөдүйбүт кэмигэр кинигэни ааҕыы биллэ мөлтөөн эрэрэ кистэлэҥ буолбатах. Литература уонна кинигэни ааҕыы хас биирдии киһиэхэ үтүө сабыдыаллаах, билии-көрүү ыырын кэҥэтэр туһалаах дьарык буоллаҕа. Кэмиттэн кэмигэр ааҕыыны пропагандалыыр, литератураны киэҥ эйгэ дьүүлүгэр таһаарар үлэлэр ыытыллаллара кэрэхсэбиллээх дьыала.

Балаҕан ыйын 12 күнүгэр П.А. Ойуунускай аатынан литэрэтиирэ түмэлигэр «Закружилась листва золотая» диэн бэрт сонун дьаарбаҥка-быыстапка кинигэни, литератураны сэргээччилэри муста. Бу тэрээһин биллэр блогер Айсена Сыроватская көҕүлээһининэн ыытылынна, ырыа-тойук, үҥкүү доҕуһуолланан дьону болҕомтотун тарта. Улуу суруйааччыбыт тэлгэһэтигэр дьон тоҕуоруһа мустан араас хайысхалаах маастар кылаастарга (остуол оонньуутугар, кэрэ хартыыналары кырыйыыга, витражка), book-crossing кинигэни атастаһыыга сэргээн, умсугуйан кыттыстылар. Биллэр суруйааччылар Гаврил Андросов, Николай Винокуров – Урсун, Иван Мигалкин, Николай Курилов о.д.а. айар үлэлэрин билиһиннэрдилэр, ирэ-хоро кэпсэттилэр, илии баттааһыннаах кинигэлэрин атыылаатылар. Ыалдьыттар поэзия аптаах эйгэтигэр уйдаран хоһооннору аахпыттарын интэриэһиргээн иһиттибит. Бу тэрээһиҥҥэ маҕыстырааннар, устудьуоннар сылдьан элбэҕи биллибит, талааннаах дьону кытта алтыстыбыт.

Мустубут дьон бука бары сынньанан, күннээҕи түбүктэри умнан, саҥа күҥҥэ күүс-уох ылынан сүргэбит көтөҕүллэн тарҕастыбыт.

«Book-crossing»-ҥа киирбит кинигэлэри атастаһыы сыл устата ыытыллар. Аахпыт кинигэлэрбитин атын дьоҥҥо сүбэлиирбит кинигэни ааҕыы кэҥиирин биир көрүҥэ. Кинигэни ааҕыы ситимин быһымыаххайыҥ, пропагандаҕа кыттыһыаххайыҥ!