Устудьуоннар сүлүөттэрэ

Ньукуолун таҥара күнүн көрсө Хотугулуу-Илиҥҥи норуоттар тылларын уонна култуураларын үөрэтэр үнүстүүт быйыл аан бастакытын туристическай сүлүөт тэрийэн ыытта.

Маннык тэрээһин урут сервис уонна туризм хаапыдыратын эрэ иһинэн ыытыллар буоллаҕына, быйыл бүтүн үнүстүүт көхтөөх кыттыыны ылла.

Кыттааччылар уопсайа биэс араас күрэххэ илин-кэлин түһүстүлэр – “Сайылык Куо”, “Үрүҥ Уолан”, “Туристическай тропа”, “Күөс өрүүтэ” уо.д.а.

Сүрүн тэрийээччи Дина Константиновна Охлопкова, социальнай-култуурунай сервис уонна туризм хаапыдыратын дассыана:

-                 Туртропа тоҕус станцияттан турар. Бу станциялары туризм хаапыдыратын 3-с кууруһун устудьуоннара бэйэлэрэ толкуйдаан тэрийдилэр. Саха үнүстүүтэ буоларбыт быһыытынан “Сайылык куо”, “Үрүҥ Уолан” төрүт күрэстэри тэрийдибит. Түгэнинэн туһанан хаапыдыралар профкомнарыгар махталбытын тириэрдэбит.

Софронеев Айтал, саха салаатын 3-с кууруһун устудьуона, “Үрүҥ Уолан” күрэс кыайыылааҕа:

-                 Мин туртропаҕа уонна “Үрүҥ Уолаҥҥа” кытынным. Туртропа олус интэриэһинэй этэ. Бэйэҕин ойуурга сылдьар дьиҥнээх турист курдук сананаҕын, араас ыарахаттары ааһарга, бастакы көмөнү оҥорорго үөрэнэҕин. Бэйэм “эттээх-сииннээх” соҕус буоламмын, миэхэ саамай ыарахан түһүмэҕинэн тугу да хамсаппакка сыыллан ааһыы этэ. Онтон-мантан иҥнэн, хамаандам баалым көҕүрэттим диэн хомойбутум. Ол эрэн барыта үчүгэйдик ааспыта. Төһө да миэстэлэспэтэрбит, олус астынныбыт, күлэн-үөрэн бириэмэбитин атаардыбыт. Ол саамай улахан кыайыыбыт.

Дайаана Тоскина, литературнай үлэһит 1-кы кууруһун устудьуона, “Сайылык куо” күрэс кыайыылааҕа:

-                 Биһиги куоракка үөрэнэр буоламмыт, куорат кирдээх салгынынан тыынабыт. Онон айылҕаҕа тахсыы олус туһалаах. Сүлүөт чөл олоххо, чэгиэн буоларга угуйар. Институт бүттүүн тахсан сомоҕолоһор, бодоруһар. Ол олус үчүгэй. “Сайылык куо” күрэс олус интэриэһинэйдик ааста. Хас биирдии кыыс бэйэтин хаһаайка быһыытынан сатамньытын, эт-хаан өттүнэн сайдыытын, талаанын, толкуйун көрдөрдө. Сайылык Куо тас дьүһүнүнэн даҕаны ис киирбэх буолуохтаах. Туохтан да толлубакка, куттаммакка бэйэҕин көрдөрүөхтээххин. Оччоҕуна эрэ киһи кыаҕа арыллар. Кэрэ куолар күрэстэрэ кэрэҕэ, сырдыкка угуйар суолталаах уонна чөл олоххо сирдиир.

Ити курдук уһуйааччылар, устудьуоннар астына-дуоһуйа сынньанан, оонньоон-көрүлээн, хас биирдиибит сүргэтэ көтөҕүллэн, айылҕалыын ситиммитин бөҕөргөтөн, күүс-уох ылан кэллибит.