Институт языков и культуры народов СВ РФ

 

Поэзия абылаҥар уйдаран

14 Февраля 2019

Университеттааҕы «Поэзия хонуута» уус-уран ааҕыы күрэҕэ Хотугулуу-Илиҥҥи норуоттар тылларын уонна култуураларын үнүстүүтүгэр быйыл алтыс төгүлүн ыытылынна. Бу күрэххэ айар куттаах устудьуоннар поэзия чараас эйгэтин арыйаллар, иэйиилэрин үллэстэллэр.

Василий Сивцев «Поэт идэтэ» хоһоонун ааҕан, «Умсулҕаннаах ааҕааччы» анал аакка тигистэ Айаал Сивцев (ФДОП), бэйэтин айбыт хоһоонун ааҕан, истээччилэр сүрэхтэрин сүүйэн, «Кэскиллээх бэйиэт» анал аат иҥэрилиннэ Ньургун Гаврильев (ЯО-15), «Поэзия абылаҥар угуттуур ураты талаан» анал аакка тигистэ Галина Григорьевна Басылайканова (М-ПХЛ-18).

Сэки “Биллибэт саллаат саҥата” хоһоонун ааҕан, 3 истиэпэннээх дипломант аатын сүктэ Арсен Винокуров (ОРМ-17). Былатыан Ойуунускай “Бу уоттаах бакаалы” хоһоонун ураты истиҥник тиэрдэн, 2 истиэпэннээх дипломант аатын сүктэ Добун Иванов (ПО-САО-18), Варвара Белолюбская-Аркук “Ынчык буолан иҥмитэ” хоһоонун дириҥ иэйиитин арыйан, 1 истиэпэннээх дипломант аатын сүктэ Иван Бушуев (ЯО-18).

“Поэзия хонуута” уус-уран ааҕыы күрэҕин ГРАН-ПРИ-тэ Хотугулуу-Илиҥҥи федеральнай университетын Горнай институтун иһинэн тэриллэн үлэлиир «Дьолуо» айар түмсүүтүгэр тигистэ (салайааччы – културолуогуйа хандьыдаата, дассыан С.С. Протопопов).

“Дьолуолар” – Альберт Старостин (ШПС-17), Сергей Филиппов (ГМ-17), Георгий Прудецкай (ПР-17), Алексей Кривошапкин (ГМ-17), Руслан Ковлеков (ЧС-18), Николай Бурнашев (ПР-17), Денис Семенов (ПР-17), Уйгулаан Старков (ОГР-17), Денис Иванов (ПР-17), Александр Томскай (ПБ-18), Айаал Дьяконов (ПР-17), Павел Скрябин (ШПС-17) – Иван Гоголев «Ийэ тылым» поэматын дириҥ иэйиилээхтик ааҕан, истээччилэри долгуттулар, поэзия долгунугар бигээтилэр, айар куттарын уһугуннардылар. Жюри айар түмсүү уус-уран салайааччыта Семен Протопопов поэманы олоҥхо киэбигэр киллэрэн ураты тыыннаан, истээччигэ дьайар күүһүн таба тирэммитин үрдүктүк сыаналаата.