Литературнай оонньуу түмүктэрэ

Билиҥҥи кэмҥэ саха литературатын ыччакка, үнүстүүт устудьуоннарыгар пропагандалааһын, кинилэр билиилэрин тургутан көрүү олус наада. Төрөөбүт тыл кэрэтэ-сүмэтэ уус-уран литератураҕа түмүллүбүтэ саарбахтаммат... Ол курдук, олунньу 12 күнүгэр Арассыыйа Хотугулуу-Илиҥҥи норуоттарын тылларын уонна култуураларын үөрэтэр кыһа Төрөөбүт тыл уонна сурук-бичик күнүгэр аналлаах дэкээдэтин чэрчитинэн үгэскэ кубулуйбут хамаанданан литературнай оонньуу буолан ааста. Оонньууну саха литэрэтиирэтин хаапыдырата уонна ЛҮ-15 бөлөх “Практикум по проектированию литературно-массовых мероприятий” дисциплина дьарыгын иһинэн тэрийэн ыыттылар.

Тэрээһиҥҥэ 1-4 кууруска диэри үөрэнэр билэлиэгийэ, литературнай айар үлэ хайысхаларын устудьуоннара 5 хамаандаҕа арахсан оонньоотулар. Барыта 25 устудьуон саха литературатыгар билиитин тургутта. Оонньуу алта түһүмэхтэн (станцияттан) турар. Классик суруйааччылар айар үлэлэригэр анаммыт боппуруостары саха литературатын хаапыдыратын уһуйааччылара б.б.д., бэрэпиэссэрдэр Сивцева-Максимова П.В., Окорокова В.Б., б.б.х., дассыаннар Семенова В.Г., Архипова Е.А., Егорова С.И. видео-ыйытык быһыытынан биэрдилэр. “Кириитиктэр, учуонайдар, литературоведтар” түһүмэҕи б.б.х., дассыан Григорьева Л.П., оттон фронтовик суруйааччыларга аналлаах түһүмэҕи б.б.х., дассыан Архипова Е.А., Васильева Т.Н. бэлэмнээн оонньоттулар. Быйылгы оонньууга суруйааччы Р.Н. Каженкин литературнай лототунан туспа түһүмэх уонна устудьуоннар артыыстыыр дьоҕурдарын сайыннарар айар түһүмэх эбиллэн оонньуу сонуннук ааста.

Хас биирдии оонньуу, күрэх сыалын сиппитин, үтүө түмүктэммитин бэлиэтинэн кыттааччылар астыныылара, дуоһуйуулара буолар. Оонньуу туһунан бэйэтин санаатын ЛТ-16 бөлөх устудьуона Сандаара Тобонова үллэһиннэ: “Бүгүҥҥү оонньуу олус үчүгэйдик, бэһиэлэйдик ааста. Мин романнарынан боппуруоска эппиэттиир түһүмэҕи сөбүлээтим. Оруобуна сөбүлүүр суруйааччым Иван Гоголев “Хара кыталык” айымньытын көрөн талбытым. Билэр боппуруоһум түбэһэн уустуга суоҕа. Ону таһынан литературнай лото олус интэриэһинэй этэ. Инньэ гынан, олус туһалаах, таһаарыылаах күн ааста. Дэлби күллүбүт-үөрдүбүт, элбэҕи саҥаны биллибит. Тэрийээччилэргэ махталбын тиэрдэбин уонна барыгытын кэлэн иһэр Ийэ тыл күнүнэн эҕэрдэлиибин!”.

 

Онньуу түмүктэрэ:

Хамаанданан оонньууга маннык түмүк таҕыста:

I миэстэ – “Күөрэгэйдэр” (Осипов А., ЛР-17, Иннокентьева А., ЛТ-16, Андросова Т., ЛР-16, Портнягина У., ЛТ-15, Тоскина Д., ЛР-18);

II миэстэ – “Барыыһаптар” (Данилова Н., ЛТ-15, Иванова Ж., ЛТ-16, Борисов С, ЛТ-16, Ксенофонтова Ю., ЯРЯ-18, Потапова Н., ЛР-16);

III миэстэ – “Эрэллэр” (Данилова Ю., ЛТ-15, Тобонова С., ЛТ-16, Местникова Н., ЛР-16, Винокурова М., ЛР-17, Матчитов М., ЯО-17).

Маны таһынан Дьүүллүүр сүбэ дириҥ билиилээх, оонньууга көхтөөх кыттааччылары талан, “Бастыҥ оонньооччу” диэн анал бириистэри туттарда. Ол курдук, быйылгы литературнай оонньуу бастыҥ оонньооччуларынан Артем Осипов ЛР-17, Ася Иванова ЛР-16, Юлия Данилова ЛТ-15, Валя Андреева ЛТ-16, Туяра Протасова ЛР-16, Жанна Иванова АҮ-16 буоллулар. Ону тэҥэ “Бастыҥ ааҕааччы” анал бириискэ С.А. Новгородов алпаабытынан бэчээттэммит тиэкиһи иҥнибэккэ ааҕан, саха салаатын 2 кууруһун устудьуона Сергей Нафанаилов (ЯО-17) тигистэ. Киниэхэ тэрийээччилэр Саха театрыгар испэктээккэ билиэт туттардылар.

Инникитин да төрөөбүт тыл, литература умсулҕана намыраабатын. Куруук үрдүккэ, кэрэҕэ сирдии сырыттын.