"Кыһыл ойуун" испэктээк тула кэпсэттибит

Сэтинньи 14 күнүгэр биһиги үнүстүүппүтүгэр Былатыан Ойуунускай "Кыһыл ойуун" айымньытынан туруоруллубут испэктээк тула төгүрүк остуол буолан ааста. Бу күн биһиэхэ үүнэр көлүөнэ театрын артыыстара ыалдьыттаатылар.

Бастаан тылы ыалдьыттарбытыгар биэрдибит. Мария Данилова - СӨ Үтүөлээх артыыската тыйаатыр тэриллиитин уонна билиҥҥи кэмҥэ үлэтин туһунан кылгастык билиһиннэрдэ: "Кыһыл ойуун" айымньы суруллубута төһө даҕаны үйэ кэриҥэр чугаһаабытын иһин, 21-с үйэ дьонугар күүскэ дьайар илбис тыллаах, дириҥ ис хоһоонноох айымньы. Улуу суруйааччы айымньытын сыанаҕа оонньуур, биһиэхэ артыыстарга үрдүк чиэс буолар уонна өйү-санааны уларытар, сайыннарар кыахтаах", - диэн эттэ.

Федот Львов испэктээк сүрүн оруолун толорбут, СӨ Үтүөлээх артыыһа. Кини 28 сааһыттан ыла Кыһыл Ойууну оонньообут. Бастаан элбэх ыарахаттары көрсүбүтүн, уһуйааччыта Афанасий Федоров ыйан-кэрдэн биэрбитин, алҕаабытын туһунан кэпсээтэ. Билигин оонньуу тахсарбар настройданабын, оруолбар үлэбэр курдук сыһыаннаһабын диэн быһаарда. Артыыстар бары испэктээк ис хоһоонунан олус дириҥин уонна тыла-өһө ыараханын, уустугун, ону көрөөччүгэ тиэрдэргэ кыһаллалларын туһунан бэлиэтээтилэр.

Хас да сыл буола-буола, бириэмэ ааһарынан сибээстээн артыыстар оонньуур оруолларын режиссер көрөн уларытан иһэр эбит. Ол курдук, Георгий Бессонов бу испэктээк саҥа туруоруллуутугар Отчут оруолун оонньообут буоллаҕына, билигин Кыһыл Ойуун Кутуруксутун толоро сылдьар. Оттон Владислав Портнягин испэктээкили бастаан көрөөччү быһыытынан саҕалаабыт, ол кэннэ массовкаҕа хас да сыл кыттыбыт, онтон Отчут оруолун толорбут, быйыл Хатан Тэмиэрийэ - уот иччитин оонньообут. Артыыс уолаттар киһи иһиттэр истиэх курдук кэпсииллэр, тыйаатыр кэннэ өссө киинэҕэ уһуллалларын туһунан сырдаттылар, устудьуоннар ыйытыыларыгар үөрэ-көтө хоруйдаатылар. Бу сэргэх кэпсэтии, истиҥ көрсүһүү түмүгэр тыйаатыр уонна ыччат салҕыы бииргэ үлэлэһиэххэ сөптөөҕүн эттилэр. Артыыстар устудьуоннары, уһуйааччылары тыйаатырга ыҥырдылар, сэтинньи ыйдааҕы репертуардарын билиһиннэрдилэр.

Талааннаах артыыстарбытыгар айымньылаах үлэни баҕара хааллыбыт.