Бэрт соторутааҕыта биһиги институппутугар профессор В.Б. Окорокова көҕүлээһининэн эдэр бэйиэт Дорҕоон Дохсуну кытта сэргэх көрсүһүү буолан ааста. Дорҕоон Дохсун 2013 сыллаахха фольклор салаатын бүтэрбитэ. Быйыл бу салаа магистратуратын 2-с кууруһугар үөрэнэ сылдьар. Суруйар эйгэҕэ 2013 сыллаахха «Сигнал» уонна «Хаппахтаах халлаан» диэн икки ааттаах хоһооннорун кинигэтинэн киирбитэ. Хоһоон суруйарын таһынан, кини бэйэтин айымньыларын олус үчүгэйдик ааҕарынан элбэх истээччи болҕомтотун тардар.
Ол эрээри, бу сырыыга Дорҕоон Дохсун бүгүҥҥү күҥҥэ олоҕун сүрүн суолтатынан буолбут дьарыгын туһунан билиһиннэрдэ. 2013 сылтан биир санаалаахтарын кытта «Барҕа» диэн уолу иитиигэ аналлаах лааҕыры үлэлэтэр. Атын лааҕырдартан уратыта - «Барҕа» сылы быһа үлэлиир биир ситимнээх үөрэх. Үөрэтии түһүмэхтэртэн турар. Хас биирдии түһүмэҕи этэҥҥэ ааспыт уол анал бэлиэни тутар. Холобур, уол оҕо дьиҥ саха эр киһитин киэбин ылар туһуттан булка-алка сылдьан, хаҥыл сылгыны айааһаан, тоҥ сылгы сааҕынан тамнаһан сымса буоларга үөрэнэр. Бу тургутууну ааспыт уолаҥҥа дьөһөгөй бэлиэтин туттараллар. Уолаттар салгыы уус кыһатыгар уһаарыллан, аны уус бэлиэтин ылаллар. Биир биир итинник үрдэллэри баһылаан баран, тиһэҕэр эт атахтарынан үөһэ хайаҕа дабайаллар. Дьэ онно тахсан, алгыс ылан, өйдүүн-санаалыын, эттиин-хаанныын хатарыллан дьиҥнээх эр киһи буоларга туруналлар.
Көрсүһүүгэ кэлбит устудьуоннар уонна республикатааҕы интернат-лицей 10, 11 кылааһын үөрэнээччилэрэ сонун көрүүлэрдээх, онтун уһата-кэҥэтэ барбакка, улахан өйөбүлү эрэйбэккэ олоххо киллэрэн иһэр эдэр киһи кэпсээнин умсугуйан иһиттилэр. Кэпсэтии түмүгэр уолаттар элбэх ыйытыы биэрдилэр, сүбэ-ама ыллылар. Сорохтор бырааттарын «Барҕа» лааҕырга аҕалар баҕалаах тарҕастылар.
Дорҕоон Дохсун - 95 саастаах эбэтин батыһа сылдьан, кини кэпсээнин иҥэриммит, кырдьаҕас дьон мындыр үөрэхтэригэр иитиллибит эдэр киһи. Өбүгэттэн кэлбит ситими бүгүн кини уол оҕоҕо тиксэрэр соруктаахтык үлэлии-хамсыы сылдьара олус үөрдэр.  Кини тыйыс айылҕалаах сиргэ төрөөбүт уол оҕону эр киһилии иитиллиэхтээх диэн бигэ санаалаах.