Муус устар 20 күнүгэр Дьокуускай куоракка сэттис төгүлүн «Библиотүүн-2018» ыытылынна. Бу тэрээһин чэрчитинэн Национальнай бибилэтиэкэҕэ билэлиэгийэ билимин дуоктара, М.К. Аммосов аатынан ХИФУ бэрэппиэссэрэ, Б. Ойуунускай аатынан судаарыстыбаннай бириэмийэ лауреата Варвара Борисовна Окорокованы кытта ырыа-тойук аргыстаах бэрт сэргэх көрсүһүү буолан ааста. Бары билэрбит курдук, Варвара Борисовна үрдүк үөрэх кыһатыгар өр сылларга үлэлии сылдьар, ыччаты литэрэтиирэни таптыырга үөрэтэр, Сахабыт сирин суруйааччыларын ааттарын үйэтитэр, үлэтигэр олус бэриниилээх, эргиччи талааннаах тумус туттар дьоммутуттан биирдэстэрэ.

Дьоро киэһэбит саха сиэринэн «Кылыһах» бөлөх (сал. Л.С. Ефимова) алгыһынан сүргэбитин көтөҕөн аһыллыбыта. Варвара Борисовна учууталлара, бииргэ алтыспыт үөлээннээхтэрэ, чугас доҕотторо, үөрэппит уонна үөрэтэр устудьуоннара барҕа махтал, иһирэх тылларын эттилэр: тыл билимин дуоктара Гаврил Гаврильевич Филиппов, «Күрүлгэн» сурунаал бас эрэдээктэрэ Афанасий Гаврильевич Гуринов-Арчылан, Күлүмнүүр бириэмийэтин лауреата, “Ситим” медиа бөлөх тутаах үлэһитэ Владимир Николаевич Степанов, Россия суруналыыстарын сойууһун чилиэнэ, суруйааччы, “Көмүөл” кинигэ кыһатын бас эрэдээктэрэ Борис Иванович Павлов уо.д.а. Биэчэргэ Варвара Борисовна олоҕун, айар үлэтин туһунан викторина ыытылынна, ыйытыыларга сөпкө хоруйдаабыттарга өйдөбүнньүк кинигэ бэлэхтээтилэр. Элбэх ырыа ылланна, баҕа санаа этилиннэ. Юбиляр-ыалдьыт кинигэлэрин быыстапката сааланы биир гына кэчигирээбитин көрүөххэ астык. Бу баай, дириҥ ис хоһоонноох быыстапка биһиги учууталбыт Варвара Борисовна билиитин, дьоҕурун, үлэһитин туоһута.

Уһуйааччыбыт олоҕун, эдэр сааһын, сөбүлүүр дьарыгын кэпсээн, ыллаан-туойан, күлэн-үөрэн бириэмэ биллибэккэ, ураты истиҥ киэһэ биир тыынынан ааста. Мустубут дьон сылаалара тахсан, сынньанан, дуоһуйан тарҕастылар. Саха дьонугар маннык, Варвара Борисовна Окорокова курдук, чулуу дьону кытта көрсүһүү, кэпсэтии-ипсэтии, санаа атыстаһыы олус наадалаах.