Олунньу 8 күнүгэр Төрөөбүт тыл уонна сурук-бичик күнүгэр аналлаах декада чэрчитинэн «Поэзия хонуута» үгэскэ кубулуйбут хоһоону хомоҕойдук ааҕыы күрэҕэ буолла. Күрэххэ барыта 17 устудьуон кытынна: медицинскэй, психология, горнай уонна биһиги үнүстүүппүтүттэн уран тылы таптааччылар муһуннулар. Кыттааччылар Өксөкүлээх Өлөксөй, Алампа, Ойуунускай, Күндэ, Муса Джалиль, Ольга Киевская, К. Туйаарыскай, Куорсуннаах, Сэки уонна бэйэлэрин хоһооннорун истээччини долгутар гына иэйиилээхтик аахтылар. Күрэҕи культурология хаапыдыратын дассыана Марк Николаевич Егоров олус сэргэхтик ыытта. Дьүүллүүр сүбэ чилиэннэринэн саха литературатын хаапыдыратын бэрэпиэссэрэ, б.б.д. В.Б. Окорокова, саха тылын хаапыдыратын сэбиэдиссэйэ, дассыан б.б.х. Д.И. Чиркоева уонна былырыыҥҥы күрэх кыайыылааҕа Горнай үнүстүүтүн 3 кууруһун устудьуона Эдуард Лукин буоллулар.

         Дьүүллүүр сүбэ чилиэннэрэ күрэх туһунан санааларын үллэһиннилэр. Бэрэпиэссэр В.Б. Окорокова: «Хоһоон ааҕа диэн анаан-минээн кэлбит оҕолортон үөрэбит. Бу устудьуоннар төрөөбүт тылларыттан атын эйгэҕэ үөрэммиттэрин да иһин, уус-уран өйдөрө-санаалара, дууһалара хоһоон ааҕарга тардыһар эбит диэн олус долгуйабыт, кэрэхсиибит».

Дассыан Д.И. Чиркоева: «Хоһоону киһи ылла да мээнэ кыайан аахпат, киһи бэйэтигэр ааҕара да олус уустук. Онтон дьоҥҥо тириэрдэр гына ааҕарыҥ диэн ол улахан дьыала, киһи сүрэҕинэн-быарынан баҕаран туран ааҕыытыттан тахсар. Биһиэхэ быйыл икки бэйэтин хоһоонун аахпыт устудьуон баар - ол Ньургун Гаврильев уонна Мичил Герасимов. Бу эмиэ улахан кыайыы. Биллэн турар, дьүүллүүр сүбэҕэ үлэлииргэ эн бэйэҥ санааҥ диэн суох буолуохтаах, элбэх киһи санаата, сыанабыла булгуччу кыттыһыахтаах, быйылгы күрэх уустук буолла, кыттааччылар бары да олус талааннаахтар, чаҕылхайдар».

         Ол курдук, быйылгы күрэх кыайыылаахтарынан буоллулар:

Кылаан чыпчаал – Валентина Андреева, АБ ХИООТуоКҮ ЛТ-16 бөлөҕүн устудьуона (Куорсуннаах «Саха дьылҕата»).

Бастакы миэстэ – Афанасьев Эр-Хан, Медицинскэй үнүстүүт ЛД-101-1 бөлөҕүн устудьуона (Муса Джалиль «Варварство»).

Иккис миэстэ – Арсен Винокуров, АБ ХИООТуоКҮ ОРМ-17 бөлөҕүн устульуона (Сэки «Биллибэт саллаат саҥата»).

Үһүс миэстэ – Ньургун Гаврильев, АБ ХИООТуоКҮ СС-15 бөлөҕүн устудьуона ( «Көмүс»диэн бэйэтин хоһооно)

Үһүс миэстэ - Ксенофонтова Кристина АБ ХИООТуоКҮ СП-15 бөлөҕүн устудьуона (А.И. Софронов – Алампа «Сайын»).

         Түмүктээн эттэххэ, «Поэзия хонуута» хоһоон күрэҕэ үрдүк таһымнаахтык ааста, хас биирдии кыттааччы олус бэлэмнэнэн, ис сүрэҕиттэн иэйиилээхтик аахта. Онон кыттааччылар, көрөөччүлэр бары даҕаны поэзия алыптаах эйгэтигэр тиксэн, олус дуоһуйан-астынан тарҕастыбыт. Кыттааччыларга инникитин да үрдүк ситиһиилэри баҕарабыт, ийэ тылларыгар, уус-уран литератураҕа болҕомтолоро өссө күүһүрдүн, тапталлара уҕараабатын!