Төрөөбүт

Төрүт тыл,

Сөрүүн

Сүөгэй курдук,

Сүрэҕи-быары

Сөрүүргэтэр...

(А.А. Иванов – Күндэ)

Хотугулуу-Илиҥҥи норуоттар тылларын уонна култуураларын үнүстүүтүгэр олунньу 6-13 күннэригэр үгэскэ кубулуйбут төрөөбүт тыл уонна сурук-бичик декадата биллэриллиннэ. Быйылгы декада саха биллиилээх суруйааччылара П.А. Ойуунускай төрөөбүтэ 125 уонна А.А. Иванов-Күндэ 120 сылларыгар ананар. Маҥнайгы күҥҥэ нэдиэлэ үөрүүлээх аһыллыыта буолла. Манна үнүстүүт идэлээх сойууһун оҕолоро эҕэрдэ кэнсиэр көрдөрдүлэр, уһуйааччылар тыл эттилэр.

Бу күн бастакы тэрээһин – дьыктаан суруйуута ыытылынна. Бүтүн үнүбэрсиэт устудьуоннара бэйэ билиитин, сатабылын тургутан, холонон көрдүлэр. Уопсайа 153 устудьуон кытынна. Дьыктаан түмүгэ олунньу 13 күнүгэр биллиэҕэ.

Мантан салгыы декада чэрчитинэн араас тэрээһиннэр ыытыллыахтара. Устудьуоннары күрэхтэргэ кыттан иһэргитигэр ыҥырабыт. Төрөөбүт тылбытын үөрэтиэххэ, сайыннарыахха, харыстыахха!

Саха тыла муора курдук баай,

Саха омук тыла үрүйэ уутун курдук сэргэх,

Сир симэҕин курдук сиэдэрэй.

(Амма Аччыгыйа)

«Ийэ тыл» пресс-киин