- 7 Декабря 2017
- 658
«ЧОЛБОННОРГО» ЫАЛДЬЫТТЫЫБЫТ, ЛИТЕРАТУРА САЙДАР САҔАХТАРЫН ЫРЫТЫҺАБЫТ
Ахсынньы 6 күнүгэр үнүстүүт литературнай үлэһит (ЛР) уонна литературнай айар үлэһит (ЛТ) салаатын устудьуоннара түөрүйэни быраактыканы кытта ситимнээн үөрэтии чэрчитинэн “Чолбон” сурунаал эрэдээксийэтигэр сырыттыбыт.
Бу көрсүһүү сүрүн сыала – литературнай кириитикэ туһунан кэпсэтии, эдэрдэри кириитикэҕэ сыһыарыы. Сурунаал сүрүн эрэдээктэрэ Д.Н. Макеев уонна кириитикэ, библиография салаатын сэбиэдиссэйэ И.И. Осипов-Уйбаан Ойуур “Чолбон” сурунаал историятыттан саҕалаан бүгүҥҥү күннээҕи үлэтигэр-хамнаһыгар тиийэ кэпсээтилэр, кириитикэ литэрэтиирэ сайдарыгар ылар суолтатын суруйааччылар айар үлэлэриттэн холобурдаан быһаардылар. Уйбаан Ойуур билиҥҥи кэмнээҕи кириитикэ туһунан санаатын эттэ, кириитик ырытыытын, сыанабылын сүрүн киритиэрийдэрин билиһиннэрдэ. Бу көрсүһүүттэн устудьуоннар билиҥҥи ааптардар тыллара-өстөрө сыппаабытын, бэчээккэ тахсар айымньыны эрэдээксийэлээһин, ааптардары кытта үлэ уратытын туһунан элбэҕи биллилэр.
Онон икки өттүттэн олус көдьүүстээх көрсүһүү буолла: устудьуоннар инники идэлэрин туһунан элбэҕи биллилэр, “Чолбоннор” эдэрдэргэ кириитикэҕэ интэриэһи үөскэттилэр.