Новости

Саха норуодунай суруйааччытын аатынан бириэмийэ олохтонно

  • 7 Декабря 2017
  • 741

Саха норуодунай суруйааччытын аатынан бириэмийэ олохтонно

Ахсынньы 5 күнүгэр М.К. Аммосов аатынан ХИФУ-ка норуот суруйааччыта, поэт, прозаик, тылбаасчыт Сэмэн Тиитэбис Руфов төрөөбүтэ 90 сылыгар аналлаах «Күөн туттабын сахабынан, Түҥ былыргы саҥабынан...» диэн литературнай киэһэ ыытылынна. Тэрээһиҥҥэ кыттыыны ыллылар: суруйааччы кыргыттара Руфова-Слепцова Т.С., Иванова Е.С., уола Руфов Г.С., кийиитэ Руфова Н.Н., сиэннэрэ Коля Слепцов уонна Б.П. Руфов, ХИФУ устудьуоннара, үлэһиттэрэ, чинчийээччилэр, суруйааччылар уонна С. Руфов айар үлэтин сэҥээрээччилэр, биир дойдулаахтара.

ХИНТуоКҮ дириэктэрэ Г.Г. Торотоев үбүлүөйдээх киэһэҕэ мустубут дьону эҕэрдэлээтэ. С.Т. Руфов олоҕун уонна айар үлэтин туһунан сырдаттылар: б.б.д., саха литературатын кафедратын профессора Башарина З.К., Саха Сирин суруйааччыларын ассоциациятын бырабылыанньатын бэрэссэдээтэлэ, Саха Өрөспүүбүлүкэтин Духуобунаска академиятын академига Сидоров О.Г., Саха Өрөспүүбүлүкэтин суруйааччыларын сойууһун чилиэнэ, «Күрүлгэн» уус-уран альманах эрэдээктэрэ А. Гуринов-Арчылан. Сэмэн Тиитэбис тылбааска үлэлэрин туһунан сырдаттылар: б.б.х., дассыан Васильева А.А., Намнааҕы педагогическай колледж бибилэтиэкэрэ, нууччалыы-сахалыы тылбаас магистра Байанаева П.Д., НСТ 3 куурсун устудьуона Игнатьева З.В. Тэрээһиҥҥэ устудьуоннар поэт хоһооннорун аахтылар, киэһэни ырыанан киэргэттилэр. Маны тэҥэ омук сириттэн кэлэн үөрэнэ сылдьар устудьуоннар бэйэлэрин тылларынан английскайдыы уонна ньиэмэстии хоһооннору ааҕан иһитиннэрдилэр.

Бу күннэргэ үнүстүүппүтүгэр С.Т. Руфов киэҥ хабааннаах айар үлэтин, олоҕун туһунан литературнай викторина ыытыллыбыта. Ол түмүгүнэн кыайыылаах аата ааттанна: ЛҮ-17 бөлөх устудьуона Артем Осипов суруйааччы туһунан элбэҕи билэрин көрдөрдө, өйдөбүнньүк бэлэх тутта. Киэһэбит саамай долгутуулаах, үөрүүлээх түгэнинэн С.Т. Руфов оҕолоро аҕаларын аатынан бириэмийэ олохтоон биир бастыҥ устудьуоммутугар туттардылар. Бириэмийэ үөрэххэ, общественнай үлэҕэ ситиһиилэрин иһин ЛҮ 4 куурсун устудьуонугар Кэрэчээнэ Борисоваҕа ананна.

Литературнай киэһэттэн бука бары элбэҕи билэн, үөрэн-көтөн тарҕастыбыт. 

 
 
 
 
 
 

Автор: Анна Аманатова, «Ийэ тыл» пресс киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).