Новости

Литературнай десант

  • 6 Ноября 2017
  • 987

Литературнай десант

Бары билэрбит курдук, быйыл алтынньы 25 күнүгэр саха норуодунай поэта, дьон-сэргэ таптаан ааҕар суруйааччыта П.Н. Тобуруокап төрөөбүтэ 100 сылын туолла. Онон сибээстээн биһиги, ЛҮ-15 бөлөх устудьуоннара, Дьокуускай куорат 38 №-дээх оскуолатын 3-с кылааһын үөрэнээччилэригэр кылаас чааһын ыытан кэллибит.

П. Н. Тобуруокап – сахалыы оҕо литературатын классига. Ол иһин биһиги оҕолорго хоһоон аахтыбыт, таабырын таайтардыбыт уонна поэт олоҕун, айар үлэтин кытта билиһиннэрдибит. Кырачааннар поэты уонна кини айымньыларын туһунан сүрдээҕин билэр эбиттэр, бары олус көхтөөхтүк кыттаннар биһигини үөртүлэр.

Аманатова Анна:

- Тэрээһиммит олус интэриэһинэйдик ааста. Мин санаабар, билиҥҥи кэмҥэ оскуола оҕолоругар П.Н. Тобуруокап айымньыларын кылаас таһынан үөрэтиини үксэтиэххэ наада. Бу көрсүһүүттэн көрдөххө, оҕолор сэргииллэр эбит. Онон кинилэр үгүһү билиэ-үөрэтиэ эбиттэр. Оҕолор өйдөрүн-санааларын төрөөбүт литература тыыныгар иитиэххэ наада.

Атласова Мария:

- Мин санаабар, маннык тэрээһини элбэтиэххэ наада. П.Н. Тобуруокап төрөөбүт күнүгэр аналлаах наһаа үчүгэй аһаҕас уруок ыыттыбыт. Оҕолор элбэх билиини ылбыттара буолуо диэн эрэнэбин. Маннык курдук уруоктары алын сүһүөх оҕолоругар эрэ буолбакка, орто оскуолаҕа ыытар эмиэ олус үчүгэй буолуо этэ дии саныыбын.

Бурнашова Уйгулаана:

- Кылааспыт чааһа наһаа интэриэһинэйдик, түргэнник ааста. Биһиги кэпсиирбитин кып-кыра оҕолор үөрэ-сэргии иһиттилэр. Кэпсэтиигэ бука бары кыттыһан, күлэн-үөрэн бириэмэбит биллибэккэ хаалла.

Гладкина Екатерина:

- Оҕолору үөрэтэр кэммитигэр биһиги бары учуутал оруолугар киирдибит. Бу идэ сүрдээх эппиэтинэстээҕин, ол эрэн наһаа интэриэһинэйин эппитинэн-хааммытынан биллибит. Мин санаабар, биһиги сүрүн сыалбытын ситистибит – оҕолор кэпсээммитин сэҥээрэн иһиттилэр, уруокка көхтөөхтүк кытыннылар, ол аата П.Н. Тобуруокап диэн кимин, кини ханнык, туох айымньылардааҕын долоҕойдоругар хатаатылар.

Иванова Айталыына:

- Мин бөлөҕүнэн маннык элбэхтэ сылдьыахпытын наада дии саныыбын. Бэйэбит инники идэбитигэр кэлин туһалаах буолуо турдаҕа. Маннык сылдьан киһи аһаҕастык уонна бэйэтигэр эрэллээхтик саҥара, арылла үөрэнэр. Онон бу кылаас чааһа олус ураты, сонун тэрээһин буолла, тоҕо диэтэххэ, кыра оҕолордуун алтыһыы – бэйэтэ туспа уруок.

Иванова Кристина:

- Оҕо-аймах таптыыр суруйааччыта Бүөтүр Тобуруокап хоһооннорун, айар үлэтин кырачаан үөрэнээччилэр олус болҕомтолоохтук көрдүлэр-иһиттилэр. Биһиги айымньылар сүрүн геройдарын уруһуйдаан илдьэн кэпсээтибит. Оҕолор мэник-мэнигийээннэри көрөн күллүлэр, айылҕа кэрэ көстүүлэрин сэҥээрдилэр. Булугас өйдөөхтөр көрдөөх таабырыннары оонньоон-көрүлээн таайдылар. Үөрэнээччилэр оҕоҕо аналлаах айымньылары истэн туох эрэ сырдык өйдөбүллээх, үтүөҕэ дьулуһар санаалаах хаалбыттара буолуо диэн эрэнэбин.

Суруйааччы айымньыта ааҕылларын тухары кини тыыннаах диэн этэллэр. Чахчы да оннук. Дьон кинини сэргиир, сэҥээрэр буоллаҕына эрэ, суруйааччы аата үйэлэргэ ааттанар. Онон, үүнэр көлүөнэ оҕолоро төрөөбүт литератураларын, суруйааччыларын билэр буолуохтаахтар. Биһиги онуоха бэйэбит сэмэй кылааппытын киллэрсибиппититтэн олус үөрэбит!

 
 
 
 
 
 


Автор: Екатерина Гладкина, ЛҮ-15 «Ийэ тыл» пресс-киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).