Алтынньы 25 күнүгэр  саха норуотун тапталлаах поэта Петр Николаевич Тобуруокап төрөөбүтэ 100 сылын көрсө биһиги университеппытыгар араас тэрээһиннэр буолан аастылар. Ол курдук РФ Хотугулуу-Илиҥҥи норуоттарын тылларын уонна культураларын институтугар күнүс 13.00 ч. П.Н. Тобуруокап ырыаларынан-хоһооннорунан бэртээхэй флешмоб ыытылынна. Устудьуоннар уонна уһуйааччылар бу тэрээһиҥҥэ көхтөөхтүк кытыннылар.

Бу күн киэһэ 16.00 ч. Петр Тобуруокап төрөөбүтэ 100 сылыгар аналлаах “Айхал сахам тылыгар!” диэн университет үрдүнэн ыытыллар хоһоон ааҕыытын күрэҕин бастакы түһүмэҕэ буолла. Бу күрэҕи саха литературатын кафедрата уонна ХИФУ научнай библиотеката тэрийэн ыыттылар. Манна университет араас факультеттарыттан, институттарыттан (ГРФ, ИЗФИР, ИЯКН СВ РФ, КИТ СВФУ, МИ,  ФЛФ, ФТИ) барыта 40-ча устудьуон кытынна, Петр Тобуруокап хоһооннорун уус-ураннык аахта. Устудьуоннар кыһамньылаахтык бэлэмнэнэн кэлбиттэрэ дьүүллүүр сүбэни олус үөртэ. Түмүккэ дьүүллүүр сүбэ председателэ Аркадий Новиков аатынан Майатааҕы “Көөчөөн көрө” мини-театр артыыһа Варвара Владимировна Егорова хоһоону уус-ураннык ааҕыы кистэлэҥнэрин кэпсээтэ, сүбэлээтэ.

Күрэх иккис түмүктүүр түһүмэҕэр 18 кыттааччы ааста (https://www.s-vfu.ru/universitet/rukovodstvo-i-struktura/instituty/iyikn/news_detail.php?ELEMENT_ID=81598). Сэтинньи 10 күнүгэр “Айхал сахам тылыгар!” хоһоон ааҕыытын күрэҕин түмүктүүр түһүмэҕэ буолуоҕа. Кыттааччыларга ситиһиини баҕарабыт, оттон сахалыы уран тылы кэрэхсээччилэри хоһоон түһүлгэтигэр кэлэн сылдьаргытыгар ыҥырабыт.