Дарина Оконешникова, 3 куурус

Быыстапка аһыллыытыгар сырыттыбыт

Алтынньы 23 күнүгэр Саха норуодунай поэта Петр Николаевич Тобуруокап төрөөбүтэ 100 сылыгар аналлаах «Күндүттэн күндүнү – олоҕу туойбутум» диэн Е.Ярославскай аатынан музейга быыстапка үөрүүлээх аһыллыытыгар ХИНТуоКИ Литературнай салаатын 1-2 к. устудбуоннара сылдьыбыппыт. Быыстапка арыллыытыгар Үөһээ Бүлүүттэн Петр Николаевич биир дойдулаахтара, биллиилээх артыыстар кэлэн тэрээһини олус киэргэттилэр. 

Быыстапкаҕа таптыыр суруйааччыбыт олоҕо киэҥ хабааннаахтык сырдатыллыбыт, ол курдук тутта сылдьыбыт малын, кинигэлэрин, хоһооннорун, суруктарын илэ харахпытынан көрдүбүт. Мин саамай сөҕө-махтайа көрбүтүм диэн - Петр Николаевич Тобуруокап бэйэтин илиитинэн суруйбут хоһооннорун саһарбыт илиистэрэ буолаллар, поэт рукопиһын көрөн олус үөрдүм. 1954 с. табаарыһыгар Мастыырапка анаабыт хоһоонун сэргии аахтым. Буочара кыраһыабайын бэлиэтии көрдүм.

Быыстапка олус интэриэһинэй. Сылдьыбыт дьон поэт туһунан элбэҕи билбитэ буолуо дии саныыбын. Быыстапканы тэрийбит дьоҥҥо махталбыт улахан.

Екатерина Гладкина, 4 куурус

«Ыҥыра, ымсыырда турар ырам» кинигэ сүрэхтэниитэ

Саха дьоно-сэргэтэ таптаан ааҕар поэта Петр Николаевич Тобуруокап быйыл алтынньы 25 күнүгэр төрөөбүтэ 100 сылын туолла. Бу өрөгөйдөөх күнү көрсө Дьокуускай куоракка тэрээһин бөҕө ыытылынна. Олортон биир сүрүн, бэлиэ тэрээһининэн саҥа кинигэ сүрэхтэниитэ буолла.

«Саха народнай суруйааччылара» серияҕа Петр Николаевич айымньылара 3 томунан бэчээттэммиттэрэ. Оттон быйыл, поэт үбүлүөйдээх сылыгар, бу серияҕа 4-с том таҕыста. «Ыҥыра, ымсыырда турар ырам» кинигэҕэ суруйааччы тыл, поэзия туһунан анаарыылара, ону тэҥэ ахтыылара киирдилэр. Хомуйан оҥордулар поэт кыыһа Любовь Петровна Тобуруокаба, бииргэ төрөөбүт быраата, биһиги учууталбыт Николай Николаевич Тобуруокап уонна күтүөтэ Дмитрий Федосеевич Наумов. Кинигэ сүрэхтэниитэ алтынньы 26 күнүгэр Национальнай библиотекаҕа ыытылынна.

Кинигэ сүрэхтэниитигэр кэлбит дьон Петр Тобуруокап туһунан, кини дьиэ кэргэнин, айар үлэтин олус истиҥник сэһэргээтилэр, дириҥник ырыттылар. Тэрээһини Саха Өрөспүүбүлүкэтин суруйааччыларын сойууһун бэрэссэдээтэлэ, саха народнай поэта Иван Мигалкин иилээн-саҕалаан ыытта. Суруйааччы чугас дьоно, үөрэппит оҕолоро, биир дойдулаахтара, талааныгар сүгүрүйээччилэр сааланы толору олорон таптыыр поэппыт туһунан сылаастык аҕынныбыт, саҥа кинигэтин тула кэпсэттибит. Ыччат кыттыбыта биһигини ордук үөртэ, ол курдук саха гимназиятын үөрэнээччилэрэ уонна устудьуоннар кыттыыны ыллылар. Ырыа-тойук аргыстаах, хомус тыаһа доҕуһуоллаах, хомоҕой хоһоон хоһуйуулаах, бэртээхэй көрсүһүү буолла. Кэлбит дьон саҥа сүрэхтэммит, буруолуу сылдьар кинигэни атыылаһан, үөрэн-көтөн тарҕастылар.

Яна Артемьева, 2 куурус

Литературнай десант саҕаланна

Саха норуодунай поэтын Петр Николаевич Тобуруокап төрөөбүтэ 100 сылын бэлиэтиир үбүлүөйдээх күннэринэн литературнай салаа 2-с куурсун  устудьуоннара коррекционнай интэрнээт-оскуолаҕа литературнай десаҥҥа баран кэллибит. Коррекционнай оскуола үлэһитэ Игнатьева Зоя Петровна Петр Тобуруокапка аналлаах биэчэргэ ыҥырбыта. Ыҥырыытын иһин улахан махтал. Бу тэрээһини интэрнээт-оскуола оҕолоро бэйэлэрэ иилээн-саҕалаан ыыттылар. Петр Николавевич Тобуруокап олоҕун уонна айар үлэтин туһунан кэпсээтилэр. Оҕолорго анаан суруйбут «Чыып-чаап», «Табахсыт Ванюша»  уонна да атын хоһооннорун аахтылар. «Күөрэгэйдиин көрсүһүү» диэн ырыатын жиэст нөҥүө ыллаатылар. Поэт олоҕун, айар үлэтин туһунан викторина буолла. Биһиги эмиэ кытынныбыт. Литературнай биэчэргэыалдьыттар ааттарыттан «Хаппытыан» «Өндөрүүскэ тиэтэйбэт» о.д.а. ырыаларын ыллаатыбыт, хоһооннорун аахтыбыт. Оскуола-интэрнээт оҕолоро сэргэхсийэн, үөрэн-көтөн хааллылар. Норуот бүттүүн таптыыр поэта Петр Николаевич Тобуруокап төрөөбүтэ 100 сылын бэлиэтиир үбүлүөйдээх биэчэр олус истиҥник ааспыта. Зоя Петровналыын өссө да атын тэрээһини ыытар былааннаах тарҕастыбыт.