Кулун тутар 17 күнүгэр ХИФУ Научнай библиотекатыгар саха народнай поэта, бөдөҥ общественнай деятелэ Семен Петрович Данилов төрөөбүтэ 100 сылыгар аналлаах көрсүһүү буолан ааста. Тэрээһини библиотека үлэһиттэрин көҕүлээһиннэринэн үлэлиир “Интэриэһинэй көрсүһүүлэр кулууптара” иилээн-саҕалаан ыытта.

Көрсүһүү ыалдьытынан саха литературатын кафедратын профессора, филологическай наука доктора П.В. Сивцева-Максимова буолла. Кини «Семен Данилов айар истиилин уратыта» диэн тиэмэҕэ кэрэхсэбиллээх дакылааты оҥордо. Хотугулуу-Илиҥҥи олохтоох омуктар тылларын уонна культуратын институтун литературнай үлэһит салаатын 2 кууруһун устудьуоннара поэт айар үлэтин туһунан кэпсээтилэр, хоһооннорун аахтылар.

Көрсүһүүгэ “Поющая Туймаада” народнай хор Семен Данилов хоһоонноругар суруллубут “Эҕэрдэ ырыата”, “Маҥнайгы хаар” ырыалары толордо. П.А. Ойуунускай аатынан Саха драматическай театрын артыыһа Куприян Михайлов поэт туһунан санаатын үллэһиннэ, ырыа ыллаан көрсүһүүнү киэргэттэ.

Тэрээһиҥҥэ ХИФУ устудьуоннара, преподавателлэрэ, учуонайдар, поэт айар үлэтин сэҥээрээччилэр кытыннылар. Көрсүһүү олус истиҥник, сэргэхтик ааста.