Олунньу 10 күнүгэр үнүбэрсиэт үрдүнэн ыытыллар “Поэзия хонуута” диэн уус-уран ааҕыы күрэҕэ буолла. Быйылгы куонкуруска барыта 17 устудьуон, ол иһигэр 3 бөлөх, кытынна. Бу бэлиэ тэрээһини ХИФУ профессора К.Г. Башарин «Саха гимнын» уонна Күннүк Уурастыырап «Көмүс киһи» хоһоонун дорҕоонноохтук ааҕан мустубут дьону долгутта. Ону тэҥэ Технология уонна дизайн коллеһын уһуйааччыта С.В. Жукова Варвара Потапова «Үчүгэйиэн бу сиргэ» хоһоонун истиҥник ааҕан киэргэттэ. Кыттааччылартан Эдуард Лукин «Олоххо» уонна Жанна Иванова «Сахам тылыгар» диэн бэйэлэрэ айбыт хоһооннорун аахпыттара истээччилэри кэрэхсэттэ. Бөлөхтөрүнэн ааҕыылар ордук табыллыбыттар: уус-уран ааҕыыны хомус дьүрүһүйэр тыаһа, ырыа-тойук, сиэдэрэй таҥас-сап ордук киэргэттэ. Дьүүллүүр сүбэ чилиэннэрэ - саха литературатын хаапыдыратын дассыана, филология билимин кандидата Л.П. Григорьева, саха литературатын хаапыдыратын магистрана, Саха өрөспүүбүлүкэтин суруйааччыларын сойууһун чилиэнэ, суруйааччы В.И. Гоголев-Уйулҕан, фольклор уонна культура хаапыдыратын магистрана, поэтесса М.Т. Сатанар -кыттааччыларга бэйэлэрин сүбэлэрин, баҕа санааларын эттилэр: “Эдэр дьон хоһоон айара, уус-ураннык ааҕара кэскиллээх дьыала. Хоһоону ааҕарга киһи ис туруга арыллыахтаах. Хайдах ис сүрэххиттэн ааҕарыҥ, уобараһы арыйарыҥ - ол улахан суолталаах». «Дьэ, кимнээх бастыҥ аатын ыллылар?» диэн сэҥээрэр буоллаххытына, биирдиилээн ааҕыга түмүк: Гран-при – Любовь Ефремова, НХК–16 (В. Потапова «Чуҥкуйа чуҥкунуур чуумпубар»). 1 миэстэ – Дмитрий Местников, ПО-СА-13 (С.А. Новгородов «Төрөөбүт соругум»). 2 миэстэ – Светлана Саввинова, ГИ (С. Гольдерова «Үс саха тойуга», сал. С.С. Протопопов). 3 миэстэ – Айтал Софронеев, СС-16 (П. А. Ойуунускай «Уруйа улааттын»). Бөлөҕүнэн ааҕыыга түмүк: 1 миэстэ – «Хомуһун» (кыргыттар) (Алампа «Дьыл түөрт кэмэ», салайаччы Г.С. Попова-Санаайа). 2 миэстэ – Технология уонна дизайн коллеһын коллектива, композиция. Салайааччы Каратаева И.С., Жукова С.В. 3 миэстэ - «Хомуһун» (А.Молокотин, У.Бурнашова, Д. Местников) «Хомуһуннаах тоҕус дорҕоон», салайаччы Г.С. Попова-Санаайа. Мин куонкурус туһунан санаатын үллэстэригэр профессор К.Г. Башаринтан көрдөстүм. Кини: «Оҕолор бары олус үчүгэйдик, үрдүк таһымнаахтык хоһоон аахтылар. Маладьыастар! – диэн астыммытын биллэрдэ. - Сылга биирдэ эрэ буолбакка, ааҕыыны куруук көҕүлээн ыытыахха. Россия уонна Саха Өрөспүүбүлүкэтин гимнын бастыҥ толоруу номинациялаах, бары билэллэрин курдук, улахан премиялаах куонкурус тэриллэрэ буоллар. Гимн дьону - норуоту сомоҕолуур. Түүннэри-күнүстэри эдэр ыччат үүнэ-сайда туруҥ!» - диэн профессор сүбэтин эттэ, алгыһын анаата. Хоһоону уус-ураннык дорҕоонноохтук ааҕыы төрөөбүт тылга тапталы иҥэрэр. Оттон ыччат дьон бэйэлэрэ хоһоону суруйарга, айарга дьулуһаллара, маҥнайгы айымньыларын дьон дьүүлүгэр таһаараллара - бу тылбыт сайдар, литературабыт инникилээҕин туоһута!