Эдэр саас хас биирдии киһиэхэ умнуллубат кэрэ түгэннэри бэлэхтиир.  Биллэн турар, киһи устудьуоннуур сылларын олоҕун тухары өйдүү-саныы сылдьар, оттон эдэр саас доҕотторо өр кэмҥэ сүрэххэ хаалаллар. 

Сылын аайы биһиги үнүбэрситиэппит үөрэххэ дьаныардаах, спорка ситиһиилээх, чаҕылхай устудьуоннары талан, Москуба уонна Санкт-Петербург куораттарга саҥа дьыллааҕы сынньалаҥҥа ыытар. Ол курдук, быйыл уопсайа 150 устудьуон Россия бастыҥ куораттарыгар күүлэйдээн, дуоһуйа сынньанан кэллилэр.

Хотугулуу-Илиҥҥи норуоттар тылларын уонна култуураларын үнүстүүтүттэн Ороһуоспатааҕы сынньалаҥҥа баран кэлбит оҕолор бэйэлэрин санааларын үллэһиннилэр.

Сандаара Тотонова, СИМК-13:

- Мин саҥа сылым айантан саҕаланна. Россия культурнай столицата Санкт-Петербург кэрэтин сөҕө-махтайа көрдүм. Биһиги историческай сирдэринэн – музейдарынан (Эрмитаж, Художественнай музей, Екатеринискай дыбарыас, Исаакиевскай собор о. д. а.) экскурсияҕа сырыттыбыт. Ону таһынан, А.И. Герцен аатынан үнүбэрситиэккэ уонна СПбГҮ-кэ сылдьан Петербург устудьуоннара хайдах үөрэнэллэрин көрдүбүт-иһиттибит. Түгэнинэн туһанан, тапталлаах үнүбэрситиэппэр уонна бииргэ сылдьыбыт оҕолорбор улахан махталбын тиэрдэбин!

Юлия Васильева, СИМК-13:

- Саҥа дьыллааҕы каникулбун дойдубут саамай кыраһыабай куоратыгар Питерга атаардым. 6 күннээх сынньаламмыт умнуллубаттык, интэриэһинэйдик уонна олус түргэнник ааста! Биһиги бэйэбитигэр элбэх саҥаны арыйдыбыт. Үнүбэрситиэппэр бу курдук кэрэ түгэни бэлэхтээбитин иһин ис сүрэхпиттэн махтанабын!

Христофор Захаров, ПО-СА-15:

- Мин 2017 сылым Санкт-Петербург куоратыттан саҕаланна. 2-с кууруска сылдьан маннык чиэскэ тиксибиппин баччааҥҥа дылы итэҕэйбэппин. Каникул устата элбэх саҥа доҕордоннум, үгүһү биллим, култуура өттүнэн байдым. Күннээҕи программабыт сонунтан сонун, интэриэһинэй буолааччы. Оҕолорго актыыбынай буолуҥ, үлэни таптааҥ диэн сүбэлиэм уонна үнүбэрситиэппэр дириҥ махталбын тиэрдиэм этэ!

Айталина Павлова, ПО-СО-14:

- Биһиги соторутааҕыта Москва куораттан саҥа дьыллааҕы сынньалаҥтан кэлбиппит. Москва куорат туох баар архитектурнай тутууларын, кэрэхсэбиллээх сирдэрин көрөн астынныбыт-дуоһуйдубут. Араас музейдарынан, театрдарынан сылдьан бэйэбитигэр олус туһалааҕы, саҥаны биллибит. Биһиги үнүбэрситиэппит чаҕылхай устудьуоннарга биэрэр кыаҕын мүччү туппакка туһанан хаалыахха, туруоруллубут сыалы ситиһэргэ дьулуһуохха наада!

Айтал Бурцев, ЯО-14:

- Миигин Москва куорат кэрэтинэн абылаата. Кини архитектуратын туһунан киһи этэ да барбат – бэйэтэ аһаҕас халлаан анныгар турар музей курдук. Бу куоракка хаста да сылдьыбытым эрээри, быйыл атын харахпынан көрдүм. Элбэх саҥа доҕордоннум.

Оҕолор кэпсээннэриттэн көрдөххө, бары олус астыммыттар. Чахчы даҕаны, үнүбэрситиэппит устудьуоннары өйүүрэ саамай сөп. Маннык чиэскэ тиксэр киһи ахсааннаах, ол иһин, күндү доҕоттор, үөрэххитигэр кыһаллыҥ, актыыбынай олохтоох буолуҥ, дьоллоох түгэни куоттарымаҥ!