Новости

«Үчүгэйиэн бу сиргэ…» Варвара Потапова төрөөбүтэ 70 сылыгар аналлаах ахтыы киэһэтэ

  • 29 Ноября 2016
  • 3692

«Үчүгэйиэн бу сиргэ…» Варвара Потапова төрөөбүтэ 70 сылыгар аналлаах ахтыы киэһэтэ

Сахаттан маҥнайгы поэтесса Варвара Николаевна Потапова баара буоллар быйыл 70 сааһын туолуо этэ. Бу бэлиэ датаны көрсө суруйааччы үөлээннээхтэрэ, чугас дьоно-сэргэтэ сэтинньи 25 күнүгэр ахтыы киэһэтин  тэрийдилэр.

Варвара Потапова кылгас да буоллар, чаҕылхай олоҕу олорон ааспыта, бэйэтин суолун саха литературатыгар хаалларбыта. Кини ураты иэйиилээх хоһоонноро («Курус санаа генийэ», «Мин – Уһук хоту дойдубун», «Хахыйах ырыата» о.д.а.) ханнык баҕарар ааҕааччыны долгуппут буолуохтаахтар: Мин сибэкки буолбатахпын.

Ол эрэн, оһуор от кэриэтэ,

Сырдык тыыннааҕым бэлиэтэ -

Сылааһы таптыыр дууһалаахпын.

Ол иһин, күүтэбин: хаһан эрэ

Мин хатан эрэр лабаабар,

Өҥө суох бороҥ таһаабар

Күөххэ тапталы дьон көрүөхтэрэ.

Хомойуох иһин, оччотооҕу кэмҥэ В. Потапова ураты көрүүтүн дьон өйдөөбөтөҕө. Ол туһунан В.Б. Окорокова маннык этэр: «Варвара Потапова – бэйэтин кэмигэр өйдөммөтөх, ол эрэн кырдьыксыт поэт. Кини кистэлэҥ поэзията Алампаны, Арбитаны кытта биир тэҥҥэ турар».

Биэчэргэ Саха республикатын суруйааччыларын сойууһун бэрэссэдээтэлэ И.В. Мигалкин, суруйааччы Н.Е. Винокуров-Урсун, поэтесса сиэн балтылара Татьяна Андреевна, Нарыйа Андреевна Антоновалар, ону кытта алтыспыт дьоно, саха салаатын устудьуоннара кытыннылар. Дьокуускай куорат саха гимназиятын уонна 7 №-дээх оскуолатын үөрэнээччилэрэ Варвара Потапова хоһооннорун аахтылар, ХИНТуоКҮ устудьуоннарын «Эйгэ» бөлөҕө моноспектакль көрдөрдө. Тэрээһин истиҥ быһыыга-майгыга ыытылынна, кэлбит дьон бары поэтессаны «Биһиги Варябыт» диэн сылаастык ахтан-санаан аастылар.

 

Автор: Аня Аманатова, Катя Гладкина, «Ийэ тыл» пресс-киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).