Сэтинньи 25 күнүгэр Сахамедиа саалатыгар бары билэр, сөбүлээн ааҕар хаһыаппыт «Эдэр саас» саҥа сыһыарыытын сүрэхтэниитэ буолан ааста. Бу бэлиэ тэрээһини хаһыат төрөөбүт күнүгэр оҥорбуттара урукку-хойукку ааҕааччыны, геройдары, хаһыат араас сыллардааҕы эрэдээктэрдэрин, корреспонденнарын бэйэтин тула тарта, саҥа сонунун үөрүүлээхтик кэпсээтэ.

«Эдэр саас», билэрбит курдук, 23 сыллааҕыта бастакы нүөмэрэ тахсыбыта. Хаһыат маҥнайгы геройдарынан 1990-с сыллардааҕы ыччаттар буолбуттара. Онтон ыла «Эдэр саас» кэрэҕэ угуйа, сырдыкка ыҥыра күн бүгүнүгэр диэри олус сэргэхтик үлэлиир, чуолаан тыа ыччатын көҕүлүүр араас сонун бырайыактары тэрийэн ыытар. Хаһыат ааҕааччытын кытта тэҥҥэ хардыылыыр, саҥа саҕахтары арыйан сайдар, үүнэр. Ол курдук «Эдэр саас» аныгылыы сайт оҥордо, улахан сэҥээриини ылла. Ааҕааччы билигин ханнык баҕарар планшеттан, төлөпүөнтэн еdersaas.ru сыһыарыыны хачайдаан, сонуну билэ, сэргии сылдьар кыахтанна.

Бэлиэ тэрээһиҥҥэ эдэрдэри эҕэрдэлии Ыччат министиэристибэтиттэн, Гражданскай уопсастыба институттарын сайыннарыы министиэристибэтиттэн, Профессиональнай үөрэхтээһин министиэристибэтиттэн, Амма, Таатта ыччаттарын аатыттан лидердэр, ХИНТуоК институттан, өрөспүүбүлүкэ хаһыаттарыттан кэллиэгэлэрэ уонна эрэдээксийэ доҕотторо кэлбиттэр. Бу сайты оҥорон таһаарбыт Станислав Ноевка махтаннылар. Ырыа ылланна, оонньуу оонньонно, «Эдэр саас» кэлэктиибэ кэлбит ыалдьыттарга махтанна.

«Эдэр саас» эрэдээктэринэн биһиги киэн туттар выпускникпыт Надежда Самсонова 2-с сылын таһаарыылаахтык үлэлиир. Онон хаһыат эрэдээксийэтэ «Ийэ тыл» пресс-кииммитин кытта биир санаанан, сүбэнэн үлэлииргэ өрүү бэлэм. Биһиги «Эдэр саастары» сайтара сүрэхтэммитинэн истиҥник эҕэрдэлээтибит уонна бииргэ үлэлэһэр баҕалаахпытын биллэрдибит.