Үөрүүлээх тэрээһиммитигэр бэйиэт кыргыттара Любовь Петровна, Саргылаана  Петровна, суруйааччы күтүөтэ Дмитрий Наумов, саха норуодунай поэта, поэт доҕоро, Үөһээ Бүлүүттэн төрүттээх В.Т. Сивцев, ону таһынан П.Тобуруокап поэзиятын сүгүрүйээччи, биһиги ытыктыыр киһибит Г.Г. Филиппов ыалдьыттаатылар. Маны тэҥэ кафедра уһуйааччылара, араас сылларга бүтэрбит устудьуоннар литература бырааһынньыгар муһуннулар.

Маҥнайгы куурус устудьуоннара уонна магистраннар бэйэлэрин билиһиннэрдилэр, музыкальнай нүөмэрдэрин көрдөрдүлэр. Ону таһынан хас биирдии бөлөх Петр Николаевич айымньытынан эҕэрдэ нүөмэр  көрдөрдө (ырыа, хоһоон, үҥкүү, инсценировка). Литературнай киэһэ түмүгүнэн саамай чаҕылхайдарга диэн,  П.Н. Тобуруокап дьиэ кэргэнэ анал бириистэрин ЛТ-15 уонна ЛР-15 бөлөхтөргө туттарда. Инстраграммҥа анал хештегтээх ыытыллыбыт уруһуй куонкурсугар устудьуоннар икки ардыларыгар маҥнайгы миэстэни Аня Аманатова (ЛР-15), онтон магистраннарга Наталья Тимофеева (МИС-16) кыайан бириистэринэн бэлиэтэннилэр. Маны таһынан дэгиттэр талаанын иһин бирииһи Василий Гоголев-Уйулҕан (МЯЛ-16), “Ураты идеятын иһин” номинацияны Айталыына Иванова (ЛР-15) уонна “Биэчэр сулуһа” диэн ааты Тимур Софронов ыллылар.

Биэчэрбит саамай долгутуулаах чааһа стипендияны туттарыы буолла. Быйыл ЛР-13 бөлөх устудьуона Айыына Трофимова үчүгэй үөрэҕин, үнүстүүт уонна үнүбэрсиэт олоҕор көхтөөх кыттыытын, общественнай үлэҕэ ситиһиилэрин иһин П.Н. Тобуруокап аатынан стипендияны ылла. Эһиил  бу тэрээһин суруйааччы төрөөбүтэ 100 сылыгар анаан өссө үрдүк таһымнаахтык 15-с төгүлүн ыытыллыаҕа.