Новости

“Чолбон” уонна “Полярнай звезда” сурунааллар үбүлүөйдэригэр аналлаах кэмпириэнсийэ: устудьуон санаата

  • 21 Ноября 2016
  • 916

“Чолбон” уонна “Полярнай звезда” сурунааллар үбүлүөйдэригэр аналлаах кэмпириэнсийэ: устудьуон санаата


Сэтинньи 17 күнүгэр Бэчээт дьиэтигэр “Чолбон” сурунаал тэриллибитэ 90 сылыгар уонна “Полярная звезда” 60 сылыгар аналлаах  «Чолбон» уонна «Полярная звезда» сурунааллар – Саха сирин духуобунай баайа” диэн ааттаах научнай-практическай кэмпириэнсийэ буолан ааста. 

Кэмпириэнсийэ үөрүүлээх арыллыытыгар «Сахабэчээт» СӨ АТ генеральнай дириэктэрэ Ф.П. Пестряков,  М.К.Аммосов аатынан ХИФУ суруналыыстыкаҕа хаапыдыратын сэбиэдиссэйэ, “Саха сирин суруйааччылара” ассоциация бэрэссэдээтэлэ О.Г. Сидоров,  суруйааччы П.А. Ойуунускай аатынан судаарыстыбаннай бириэмийэ лауреата Н.Е. Винокуров-Урсун, билэлиэгийэ билимин дуоктара, академик, тыл үөрэхтээҕэ П.А. Слепцов,  П.А.Ойуунускай аатынан судаарыстыбаннай бириэмийэ лауреата, саха литературатын хаапыдыратын дассыана В.Н. Протодьяконов  өрө күүрүүлээх, дириҥ ис хоһоонноох тыллары эттилэр.

«Чолбон» уонна «Полярная звезда» сурунааллар – Саха сирин духуобунай баайа» кэмпириэнсийэҕэ барыта отучча дакылааты иһиттибит. Мин санаабар, биллэр учуонайдары сэргэ устудьуоннар эмиэ кыттыбыппыт олус үчүгэй. Тоҕо диэтэххэ, сүдү билиилээх үөрэхтээхтэр, ытыктанар дьон (тыл үөрэхтээҕэ М.П. Алексеев-Дапсы, народнай суруйааччы Сэмэн Тумат, учуонайдар А.А. Бурцев, Л.Н. Романова, Л.И. Винокурова, М.А. Кириллина о.д.а.) олус интэриэһинэй, кэрэхсэбиллээх дакылааттары оҥордулар. Биһиги үнүстүүппүтүттэн профессордар В.В. Илларионов, Г.Г. Филиппов, дассыаннар В.Г. Семенова, Л.П. Григорьева, магистраннар Анна Прудецкая, Любовь Уарова, Любовь Андреева, Наталья Тимофеева, Саргылаана Маркова  уонна саха литературатын, тылбаас, педагогическай үөрэхтээһин салааларын устудьуоннара кытыннылар. Устудьуоннар тиэмэлэрбитин тэрийээччилэр сэргээтилэр, сэҥээрдилэр, чинчийэр үлэбитигэр ситиһиини баҕардылар. Оттон биһиги хас биирдии дакылааты умсугуйан иһиттибит, билиибитин хаҥаттыбыт. Устудьуоннар маннык тэрээһиннэргэ сылдьан, киһи быһыытынан сайдабыт, үүнэбит, тупсабыт.

Устудьуон аатын сүгэн баран, аан бастакытын кэмпириэнсийэҕэ кыттыбыт 1 куурус устудьуонуттан Яна Артемьеваттан аҕыйах боппуруоска эппиэттииригэр көрдөстүм.

- Яна, үтүө күнүнэн!

- Үтүө күнүнэн.

- «Чолбон» уонна «Полярная звезда» сурунааллар – Саха сирин духуобунай баайа” конференцияҕа ханнык тиэмэнэн кытынныҥ?

- Мин бу кэмпириэнсийэҕэ “Чолбон сурунаал маҥнайгы нүөмэрэ” диэн тиэмэҕэ дакылаат оҥордум.

- Үлэҕин суруйаргар ким эйиэхэ сүбэ-ама биэрдэ, салайда?

- Салайааччым - саха литературатын кафедратын сэбиэдиссэйэ, филологическай наука кандидата Валентина Григорьевна Семенова.

- Эн санааҕар тэрээһин төһө бэркэ ааста?

- Олус үчүгэй тэрээһини толкуйдаабыттар.

- Ким дакылаатын ордук сэҥээрэн иһиттиҥ?

- Мин “Полярная звезда” сурунаал редакторын Пестерев Владимир Ильич дакылааттарын - «62-х летняя история “Полярной звезды”» уонна “Редакция “Полярной звезды” в борьбе за реабилитацию В.В.Никифорова-Күлүмнүүр” интэриэһиргээн иһиттим.

- Инникитин билиминэн дьарыктанар баҕа санаа үөскээтэ дуу?

- Үөскээтэ, өссө элбэх үлэ суруйан кэмпириэнсийэлэргэ кыттыам.

- Маладьыас. «Чолбон» сурунаал үлэһиттэригэр тугу баҕарыаҥ этэй?

- «Чолбон» сурунаал үлэһиттэригэр дьолу, таһаарыылаах үлэни, элбэх ааҕааччыны баҕарабын.

- Яна, эйиэхэ хоруйуҥ иһин махтанабын. Ситиһиини!

Бу курдук «Чолбон», «Полярная звезда»  сурунааллар үбүлүөйдэригэр анаммыт кэмпириэнсийэ үрдүк таһымнаахтык ааста. Мин бу бэлиэ күн тэрийээччилэр, кыттааччылар, үлэлэспит дьон өйдөрүгэр-санааларыгар үтүө өйдөбүл буолан өр сылларга хаалыа диэн эрэнэбин.

 
 
 
 
 
 
 
 

                                                                                   


Автор: Сардаана Кондратьева, “Ийэ тыл” пресс-киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).