Алтынньы 14 күнүгэр Өрөспүүбүлүкэтээҕи медиа-кииҥҥэ “Тыл култуурата куйаар ситимигэр” (“Культура речи в киберпространстве”) диэн тиэмэҕэ төгүрүк остуол буолан ааста. Төгүрүк остуолу “Саха сирэ” хаһыат эрэдээксийэтэ, Саха сиринээҕи төрүт омуктар оскуолаларын чинчийэр үнүстүүт, М.К. Аммосов аатынан Хотугулуу-Илиҥҥи бэдэрээлинэй үнүбэрситиэт тэрийдилэр. Кэпсэтиини “Саха сирэ” хаһыат сүрүн эрэдээктэрэ Чокуур Гаврильев иилээн ыытта. Төгүрүк остуол аныгы кэмҥэ саамай тоҕоостоох тиэмэҕэ туһаайыллыбыт буолан, кыттааччылар бары баар кыһалҕалары аһаҕастык дьүүллэстилэр. Оскуолаҕа оҕону иитии, үөрэтии боппуруостарыттан саҕалаан, тиэрмини оҥоруу, сахалыы тыллаах хаһыаты, кинигэни интэриниэт ситимигэр киллэрии, араас социальнай ситимнэргэ (фэйсбук, вконтакте, ватсап) кэпсэтии тылын култууратын, оҕону-ыччаты уус-уран айымньыны ааҕарга көҕүлээһин, ааптар бырааба курдук кыһалҕалары ырыттылар.

“Чуораанчык” сурунаал сүрүн эрэдээктэрэ Татьяна Жиркова алын сүһүөх үөрэнээччитэ кинигэни тутан-хабан ааҕара ордук көдьүүстээҕин тоһоҕолоон бэлиэтээтэ. Онон сурунаал бэчээттэнэр кээмэйин улаатыннарар туһунан туруорсарын кэпсэтии кыттыылаахтара өйөөтүлэр. ТООЧИ дириэктэрэ Светлана Семенова оскуолаҕа саха тылын көдьүүстээхтик үөрэтиигэ анаан элбэх үөрэх кинигэлэрэ уонна мэтэдиичэскэй  босуобуйалар, ол иһигэр электроннай кинигэлэр оҥоһуллалларын эттэ. Бу барыта үөрэтиигэ сөптөөхтүк, көдьүүстээхтик туһаныллыахтааҕын, онно учуутал толору бэлэмнээх буолуохтааҕын бэлиэтээтэ. ”Сахабикипиэдьийэ” салайааччыта Николай Павлов-Халан саха тылын интэриниэккэ киллэрии кыһалҕаларын, харгыстарын кэпсээтэ, бу үлэ өрөспүүбүлүкэ салалтатын таһымыгар ыытылыннаҕына эрэ үтүө түмүктээх буолуоҕун эттэ. Тиэрмин, тылбаас, таба суруйуу курдук билиҥҥи кэм тоҕоостоох кыһалҕаларын боппуруостарыгар Арассыыйа бэдэрээссийэтин Хотугулуу-Илиҥҥи норуоттарын тылларын, култуураларын үнүстүүтүн дириэктэрэ Гаврил Торотоев,  маҕыстырааннар, устудьуоннар санааларын эттилэр. Аныгы кэмҥэ ыччаты уус-уран литэрэтиирэҕэ хайдах угуйабыт, хайдах көҕүлүүбүт диэн боппуруоска ТООЧИ научнай үлэһиттэрэ Надежда Васильева, Анна Васильева, ХИБҮ саха литэрэтиирэтин хаапыдыратын дассыана Людмила Григорьева тус көрүүлэрин үллэһиннилэр.

Онон төгүрүк остуол кыттыылаахтара бары түргэн тэтимнээхтик сайдар үйэҕэ төрөөбүт тылбыт чөл хаалара омукпут тыын боппуруоһа буоларын тоһоҕолоон бэлиэтээтилэр. Төгүрүк остуол кыттыылаахтара маннык кэпсэтиилэри элбэхтик тэрийиэҕиҥ, салалтаны, дьону-сэргэни кытта бииргэ айымньылаахтык үлэлиэҕиҥ диэн түмүккэ кэллилэр.