Новости

  • 8 Февраля 2016
  • 1071

«Сэргэлээх уоттара» литэрэтиирэ түмсүүтүн дьоро киэһэтэ

Тохсунньу 29 күнүгэр «Сэргэлээх уоттара» литэрэтиирэ түмсүүтэ Литэрэтиирэ сылын түмүктүүр дьоро киэһэни Саха Өрөспүүбүлүкэтин национальнай бибилэтиэкэтин устуоруйа саалатыгар тэрийдэ. Бу киэһэ сүрүн уратыта – араас сылларга «Сэргэлээх уоттарыгар» сылдьыбыт көлүөнэ дьон алтыһыыта буолла! Көрсүһүүнү М.К Аммосов аатынан Хотугулуу-Илиҥҥи бэдэрээссийэлии үнүбэрсиэт саха литэрэтиирэтин хаапыдырата, «Сэргэлээх уоттара» түмсүүгэ билигин дьарыктанар устудьуон-ыччат уонна бибилэтиэкэ кыраайы үөрэтэр салаата тэрийдилэр. Куруһуок салайааччылара бэйиэт, “Айыы кыһата” оскуола учуутала Рустам Каженкин уонна үнүбэрсиэт дассыана Матрена Попова тэрээһини ыыттылар.
«Сэргэлээх уоттара» литэрэтиирэ түмсүүтэ саха народнай поэта Сэмэн Данилов салайыытынан өссө 1948 сыллаахха үлэтин саҕалаабыт эбит. М. Попова ону бигэргэтэр туоһу сурук көстүбүтүн туһунан үөрүүлээх быһыыга-майгыга иһитиннэрдэ.
«Сэргэлээх уоттара» түмсүүттэн араас көлүөнэ дьон айар үлэ уус-уран маастарыстыбатыгар уһуйуллан, саха киэн туттар бэйиэттэрэ, суруйааччылара буола үүнэн тахсыбыттара. Дьоро киэһэҕэ Саха сирин суруйааччыларын ассоциациятын бэрэсэдээтэлэ, суруналыыс, суруйааччы Олег Сидоров, саха народнай бэйиэтэ Уйбаан Мигалкин, саха народнай суруйааччыта Сэмэн Тумат, Н. Винокуров-Урсун, Саргы Куо, “Күрүлгэн” альманах эрэдээктэрэ, суруйааччы, кириитик Афанасий Гуринов-Арчылан, эдэр бэйиэттэр Г.Андросов, Дорҕоон Дохсун, литературоведтар В.Н. Протодьяконов, В.Г. Семенова, В.Б. Окорокова, Л.П. Григорьева уонна түмсүүгэ араас сылга дьарыктаммыт айар куттаах дьон, учууталлар, устудьуоннар кытыннылар, айар үлэ уонна литэрэтиирэ сайдыытын туһунан кэпсэттилэр, хоһооннорун аахтылар. 20 сыл түмсүүнү салайбыт, айар үлэҕэ ыччаты кынаттаабыт Е.П. Шестаков-Эрчимэн аатыгар туһаайан элбэх киһи махтал тылын эттэ. Истиҥ кэпсэтиини АБ Хотугулуу-Илиҥҥи олохтоох омуктарын тылларын уонна култуураларын үнүстүүтүн устудьуоннара ырыанан-тойугунан киэргэттилэр.
«Сэргэлээх уоттара» түмсүү кыттыылаахтара кэлбит ыалдьыттарга “Айар тыл абылаҥа, уран тыл умсулҕана” (2016) диэн хомуурунньуктарын бэлэх ууннулар. Түмсүүгэ билигин сылдьар ыччат иэйиитэ манна номоҕон хоһоон буолан кутуллубут.
Тэрээһин кыттыылаахтара 2018 сылга «Сэргэлээх уоттара» тэриллибитэ 70 сылын бэлиэтиир туһунан быһаарыныы ылыннылар.

 
 
 
 
 
 
 
 
 
 

Автор: Анна Аманатова, ЛҮ-15, “Ийэ тыл” пресс-киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).