Борисова Настя, ЛҮ-12: Олус үчүгэй, сынньалаҥ, туһалаах өрөбүллэр аастылар. Санкт-Петербург кэрэ, баай историялаах куорат буоллаҕа. Программабыт олус киэҥ этэ. Биир сынньалаҥ күннээх этибит. Ол онно  Российскай национальнай библиотекаҕа уонна Лев Гумилев дьиэтигэр бара сылдьан олус үөрдүм, баҕа санаабын толордум. Библиотекаҕа дипломмар материал көрдүм, регистрацияланным. Лев Гумилев баай библиотекатын, муспут матырыйаалларын, үлэлээн ааспыт хоһун көрүөхпүн баҕарар этим. Пуолкатыгар “Дьулуруйар Ньургун Боотур” олоҥхо турарын бэлиэтии, сөҕө көрдүм. Нэдиэлэ олус түргэнник ааста, “Питер-2016” оҕолоругар эҕэрдэ, ону сэргэ “Светлячоктарга”. Үнүбэрсиэт бастыҥ устудьуоннара баран, сынньанан-дуоһуйан, саҥа үөрэх семестрыгар, саҥа сылга күүс-уох эбинэн, сүргэбит көтөҕүллэн кэллэ. Аан бастакы билим эйгэтигэр киирэрбэр көмө-тирэх, сүбэ буолбут, тулуурга-дьулуурга үөрэппит Левин Герасим Герасимовичка махтаныам этэ. Тапталлаах үнүбэрсиэппэр, үнүстүүппэр – барҕа махтал! 


Бочкарёва Паша, ПО-СА-13: Кэтэһэн, көһүтэн тохсунньу томороон тымныытыгар Дьоллоох Дьокуускай куораттан араҕан, бастаан Москубаҕа дойдубут тэбэр сүрэҕэр - Домодедово аэропорка 6 чааһынан көтөн тиийбиппит. Бастакы көтүүм этэ. Олус үөрбүтүм уонна долгуйбутум. Киһи сатаан тылынан эппэт, киһи иһэ кычыкыланар, дойдуну, халлааны үөһэттэн көрөр-киһи тылынан эппэт кыраһыабайа эбит. Москубаттан 1чаас 10 мүн. Санкт-Петербург куоракка тиийбиппит. Уопсайа 75 оҕо, 3 салайааччы буолан сырыттыбыт. Мин иккис бөлөххө баар этим, оҕолору кытта төһө кыалларынан ыкса билсэ сатаатыбыт, билигин кэлэн баран өссө чугаһыспыт курдукпут.
"Прибалтийское" диэн гостиницаҕа түһэрбиттэрэ. Күҥҥэ иккитэ аһыыр этибит. Бастаан утаа, киэһээҥибитин аһаат, түүҥҥү Питеры көрө, хаартыскаҕа түһэ барбыппыт. Олус кэрэ көстүү, тула өттүҥ, хайа да дьиэ, собор майгыннаспат өттүлээх, бэйэтэ атын, ураты. Васильевскай собор, Спас на крови, Эрмитаж, Царское село, Екатерининский дыбарыас, Кунсткамера, Иллюзия түмэлэ, Океанариум, Аквариум "Питерлэнд" курдук бэлиэ сирдэргэ күүлээйдээбиппит. Ону тэҥэ Саха сирин түмсүүтүн уонна Питерга үөрэнэр саха устудьуоннарын кытта көрсүбүппүт. Санкт-Петербурдааҕы государственнай, Герцен аатынан педагогическай үнүбэрсиэттэри кытта көрсөн сэһэргэспиппит. Уопут атастастыбыт, устудьуоннар актыыптарын кытары көрсөн кэпсэппиппит, хас биирдии көрсүһүүбүт олус сэргэхтик, интэриэһинэйдик ааспыттара. 
Киһи атын сиргэ баран кэллэҕинэ олус сайдар, уларыйар эбит, олох туһунан толкуйдууруҥ кэҥиир, билииҥ эбиллэр. Махтаныам этэ ис сүрэхпиттэн салайааччыларбытыгар эдэрдии эрчимнээхтик салайан илдьэ сылдьыбыттарыгар, таптыыр үнүстүүтүм өрүү өйүүрүгэр, үнүбэрсиэппэр, устудьуоннуур сылларым хаһан да умнуллубаттык, кэрэ өйдөбүллээх ааһалларыгар! 


Потапова Ариадна, ПО-МХК-13: Хотугулуу-Илиңңи бэдэрээссийэлии үнүбэрсиэттэн 75 устудьуон Киэҥ Арассыыйа тэбэр сүрэҕэр, Москуба куоракка, Ороһуоспатааҕы сынньалаңңа баран кэллибит. Хас биирдии күн саҥаттан саҥа арыйыылары, көстүүлэри бэлэхтээбитэ. Ол курдук, Москуба куорат историческай сирдэрин кэрийдибит. Аан дойдуга биллибит Останкинскай башняны, Кириэмили, Кыһыл болуоссаты, Судаарыстыбаннай Третьяковскай галереяны уо.д.а сөҕө-махтайа көрдүбүт. Ону тэңэ, куорат саамай киинигэр турар, Саха представительствотыгар Саха сириттэн үөрэнэр оҕолору кытары билсистибит, санаабытын үллэһиннибит. Аан дойдуга биллибит  РУДН (Российский университет дружбы народов) үлэһиттэрин, устудьуоннарын, үөрэнэр сирдэрин кытта билсэр, уопут атастаһар дьолго тигистибит. 
Нэдиэлэлээх сынньалаңңа хас биирдии күн уратытык, хатыламматтык ааста. Киэһэтин билсии-көрсүү, көрдөөх оонньуулар уонна, биллэн турар, истиҥ доҕордоһуу. 
Убаастабыллаах ректорбытыгар, Евгения Исаевна Михайловаҕа, проректорбытыгар, Надежда Михайловна Зайковаҕа, бары устудьуоннар ааттарыттан дириҥ махталбытын тиэрдэбит. Устудьуоннуур сылларбар Хотугулуу-Илиҥҥи бэдэрээссийэлии үнүбэрсиэт умнуллубат, кэрэ кэмнэри бэлэхтээбитигэр махталым муҥура суох.  


Прокопьева Сааскылаана, ПО-СА-13: Хотугулуу-Илиҥҥи федеральнай университет сылын аайы чулууттан чулуу устудьуоннары дойдубут саамай улахан, киин куораттарыгар Санкт-Петербурга уонна Москваҕа сынньата, күүлэйдэтэ ыытары үгэскэ кубулутта. Ол курдук, мин быйыл маннык улахан чиэскэ тиксэн, дойдубут тэбэр сүрэҕэр улуу Москва куоракка биир нэдиэлэ сынньанан кэллим. Университет туох баар араас экскурсияларбытын, кэлэ-бара сырыыбытын, олорор, аһыыр сирбитин бэйэтэ уйунна. Ол курдук, кылгастык суруйдахха биллэн туран, аан бастаан Кыһыл болуоссакка, Оружейнай палатаҕа, Третьяковскай галереҕа, "Коломенское", "Царицыно" музей уһаайбаларга, Мосфильм студиятыгар, Аан дойду үрдүнэн 4-с миэстэҕэ үрдүгүнэн киирсэр Останкино башнятыгар, планетарийга, океанариумҥа сылдьан, сөҕө-махтайа көрдүбүт, иһиттибит. Куорат килбэйэр киинигэр турар дьиэҕэ Сахабыт сирин представительствотыгар ыалдьыттаан, Москваҕа үөрэнэр устудьуоннары кытта көрсөн, кэпсэтэн аастыбыт. Маны таһынан, Россияҕа, аан дойдуга биллэр Арассыыйатааҕы Норуоттар Доҕордоһууларын университетыгар (РУДН - Российский Университет Дружбы Народов) сырыттыбыт. Биһигини олус истиҥник, эрдэттэн бэлэмнээх көрүстүлэр. Университет иһинэн экскурсия, студеннары кытта көрсүһүү, уопут атастаһыы барыта баар. Уонна бүтэһик күммүтүгэр улуу "Призрак Оперы" (Опера абааһыта) диэн мюзиклы дуоһуйа көрдүбүт. Бу ааспыт күннэр хас биирдии бэйэбитигэр умнуллубат түгэн, өйбүтүгэр-санаабытыгар саамай чаҕылхай, дьоллоох кэм өйдөбүлэ буолан, хаһан да сүппэттии иҥэн хаалла. Бу бэлэх иһин тапталлаах университеппытыгар махталбыт муҥура суох. Түгэнинэн туһанан ректорбытыгар Евгения Исаевна Михайловаҕа, Надежда Михайловна Зайковаҕа, үнүстүүппүт дириэктэригэр Гаврил Григорьевич Торотоевка уонна биһигини харыстаан, бүөбэйдээн илдьэ сылдьыбыт салайааччыларбытыгар Татьяна Ивановна Заболоцкайаҕа, Егор Николаевич Гоголевка уонна Степан Ильич Павловка дириҥ махталбытын тиэрдэбит! "Мин таптыыбын ХИФУ-ну, ХИФУ миигин таптыыр!" 


Тимофеева Сардаана, ПО-СА-13: Быйыл Хотугулуу-Илиҥҥи федеральнай университет актыыбынай оҕолору сынньалаҥҥа ыытар бэлэҕин тутаммын - аатырар Санкт Петербург куоракка 75 оҕону кытары бэртээхэйдик сылдьан кэллим. Биир нэдиэлэ устата араас музейдары, собордары көрөн кыараҕас харахпыт кэҥээтэ, кулгаахпыт өссө чөрөйдө, моойбут эбии уһаата...  
Араас хайысхаҕа: наукаҕа, спорка, общественнай олоххо, культураҕа уонна биллэн турар, үөрэххэ үрдүк ситиһиилээх оҕолор талыллан, сүүмэрдэнэн кэлбиппит. Тапталлаах университеппыт харчыбытын хааччыйан, аспытын- үөлбүтүн дьаһайан, этэргэ дылы, "ытыс үрдүгэр" сырыттыбыт. Оҕолор бачча үчүгэй усулуобуйаҕа оонньоон-көрүлээн, билсэн-көрсөн бардыбыт. Наһаа чаҕылхай оҕолор! 
Саҥа сылбын бэртээхэйдик саҕалаатым, бу сынньалаҥым устудьуоннуур сылларбар хаһан да хатыламмат күндү көмүс кэмнэрим буолан сүрэхпэр-быарбар сөҥөн хаалбытыгар махтаныам этэ Евгения Исаевнаҕа, ХИНТуоКИ-га,  ХИФУ-га, бар дьоммор!