Балаҕан ыйын 21 күнүттэн сэтинньи 13 күнүгэр диэри Хотугулуу-Илиҥҥи норуоттар тылларын уонна култуураларын үнүстүүтүгэр үтүө үгэскэ кубулуйбут устудьуон билимин нэдиэлэтэ буолан ааста.

Нэдиэлэ устата араас сэминээрдэр, онлайн-лиэксийэлэр, онлайн квест-оонньуулар, олимпиадалар ыытылыннылар. Элбэх устудьуон көхтөөх кыттыыны ылан билиитин хаҥатынна.

Ол курдук араас хаапыдыра устудьуоннара билим нэдиэлэтин туһунан санааларын бу курдук үллэстэллэр:

“Быйылгы билим нэдиэлэтэ бэрт ураты формалаах буолан, оҕолорго тэҥинэн үгүс тэрээһиҥҥэ кыттар кыаҕы биэрдэ. Мин бэйэм хаапыдырам тэрийбит научнай сэмэнээригэр кыттыыны ылбытым. Науканан дьарыктанар оҕолорго, дьарыктаныан баҕалаах бастакы куурустарга – дьаныары, дьулууру, айымньылаах үлэни баҕарабын”. Данилов Игорь, мэтиэдикэ хаапыдыратын 3 куурсун устудьуона

“Наука нэдиэлэтэ биһиги үнүстүүппүтүгэр төһө да дистанционно үөрэнэ сырыттарбыт бэйэтин чэрчитинэн, сылын аайы буоларын курдук үрдүк таһымҥа ааста. Мин саха тылын олимпиадатыгар кыттыыны ылбытым. Оҕолорго баҕарыам этэ билими кытта бэйэлэрин олохторун ситимнииллэригэр, ону тэҥэ ыалдьыбакка харыстана сылдьалларыгар.” Николаева Уйгулаана, саха салаатын 2 куурсун устудьуона.

“Мин билимҥэ интэриэстээх буоламмын, чуолаан научнай лиэксийэлэри уонна сэминээрдэри иһиттим. Ордук Баһылай Баһылайабыс лиэксийэтин сөбүлээтим. Кини наукаҕа хайдах аан бастаан үктэммитин, онтон салгыы үлэлээн, доктор таһымнаах учуонай буолбутун туһунан сэргээн иһиттим. Ону таһынан кини саха фольклора наука эйгэтигэр оруолун туһунан кэпсээбитин сэргээтим. Баһылай Баһылайабыс Ойуунускай аатынан бириэмийэни ылбытын истэн, олус үөрдүм уонна киниэхэ улахан эҕэрдэбин тиэрдэбин. Хомойуох иһин, мин бу наука нэдиээтигэр туохха да кыттыбатым. Ол гынан баран, сэтинни ыйга буолар 1 куурустарга аналлаах НПКаҕа кыттар санаалаахпын.” Еремеева Дайаана, саха салаатын 1 куурсун устудьуона.

Төһө да ыарахан кэмнэр буола туралларын иһин Устудьуон билимин нэдиэлэтэ бэрт сэргэхтик, өрө көтөҕүллүүлээхтик, үрдүк таһымҥа ааста.