Новости

  • 22 Сентября 2020
  • 106

Устудьуон билимин нэдиэлэтэ саҕаланна!

Балаҕан ыйын 21 күнүттэн сэтинньи 13 күнүгэр диэри хас биирдии үнүстүүт үөрэҕэр маҥнайгы кууруска киирбит устудьуоннарга сиһилии билим эйгэтин арыйар, билиһиннэрэр, науканы интэриэһиргээн үөрэтэр, чинчийэр устудьуоннарга билим нэдиэлэтин саҕалаата.

            Ол курдук, Хотугулуу-Илиҥҥи норуоттарын тылларын уонна култуураларын үнүстүүтэ эмиэ бу тэрээһиҥҥэ көхтөөх кыттыыны ылан саҕалаата. Бүгүн, балаҕан ыйын 21 күнүгэр, 10 чааска “Билим чинчийии бастакы хардыыта” диэн маҥнайгы куурус устудьуоннарыгар уонна маҕыстырааннарыгар аналлаах сэминээр буолла. Оксана Афанасьевна Лугинова биһиэхэ билим диэн тугун, сылын аайы ханнык научнай-практическай тэрээһиннэр, куонкурустар ааһалларын, үрдүк истипиэндийэни хайдах ылыахха сөбүн, ону кытары устудьуоннарга анаан научнай куруһуоктар баалларын кылгастык сиһилии билиһиннэрдэ. Бу сэминээри Матрена Петровна Попова иилээн-саҕалаан ыытта, бэйэтэ алта ый иһигэр үнүстүүппүт үрдүк ситиһиилэрин, ханнык күрэххэ кимнээх миэстэлэспиттэрин, үнүстүүт бэйэтин иһигэр билим кэмпириэнсийэлэри ыытарын, устудьуоннар хайдах билим ыстатыйа суруйуохтарын сөбүн туһунан кэпсээтэ. Салгыы хас биирдии хаапыдыра бэйэтин билим куруһуогун билиһиннэрдэ. Тугунан дьарыктаналларын, тугу үөрэтэллэрин, маҥнайгы куурус устудьуоннара билим эйгэтигэр үлэлэһэр чинчилээх буоллахтарына, хайдах сөптөөх тиэмэни талыахтарын сөбүн, онно кимнээх көмөлөһөллөрүн, иилээн-саҕалаан ыыталларын туһунан сүбэ-ама биэрдилэр. Сэминээр түмүгэр, билимҥэ бэйэтин кыаҕын көрдөрбүт, оскуола саҕаттан элбэх кэмпириэнсийэлэргэ кыттыбыт, кыайыы өрөгөйүн туппут, хас да анал истипиэндийэ хаһаайына буолбут, үнүстүүппүт педагогическай үөрэхтээһинин үһүс куурсун устудьуона Игорь Данилов билим үлэнэн дьарыктанар, дириҥник үлэлэһэр буоллаххына, бастатан туран, бэйэ баҕата уонна интэриэс баар буолуохтаах, оччоҕо эрэ үчүгэй, туһалаах үлэни суруйан, үрдүк ситиһиилэри көрсөҕүн диир. Хас биирдии киһи билим эйгэтигэр бэйэтин холонон көрөн билиитин кэҥэтэр, өйүн-санаатын сайыннарар, ону кытары төрөөбүт тылын уонна литэрэтиирэтин ырытан улахан туһаны, саҥа арыйыыны аҕалар. Өрөспүүбүлүкэ, Арассыыйа, Аан дойду таһымыгар ыытыллар кэмпириэнсийэлэргэ кыттан, билиигин хаҥатаҕын, атын дьон үлэлэрин көрөн, үөрэтэн сөптөөх түмүккэ кэлэҕин, төрөөбүт дойдугун ааттатаҕын, ону кытары бэйэҕэр үчүгэйэ диэн сири-дойдуну кэрийэҕин диэн кэпсиир. Ол курдук, билигин талан ылбыт тиэмэҕин сайыннаран инникитин кандидатскай, докторскай үлэ оҥорон таһаарыаххын сөп диэн этэр.

            Ити курдук, биһиги үнүстүүппүтүгэр билим нэдиэлэтин үөрүүлээх арыллыыта, устудьуону билим эйгэтигэр көҕүлүүр сэминээр буолан ааста. Сыл ахсын ыытыллар устудьуон билимин нэдиэлэтигэр үнүстүүппүтүгэр араас таһымнаах, атын-атын хайысхалаах олимпиадалар, сэминээрдэр, куонкурустар, ону тэҥэ научнай-практическай кэмпириэнсийэлэр ыытыллыахтара. Бука барыгытын билим нэдиэлэтэ саҕаламмытынан эҕэрдэлиибит, үрдүк ситиһиилэри, көхтөөх кыттыыны баҕарабыт.

Автор: Егорова Кристина, Архипова Айсаана, саха салаатын 2 куурсун устудьуоннара.

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).