Олунньу 7 күнүгэр үнүстүүт иһинэн Ийэ тыл уонна сурук-бичик дэкээдэтин чэрчитинэн «Сахалыы эйгэ: туруга, кэскилэ» диэн бэрт сэргэх төгүрүк остуол буолан ааста. Манна үнүбэрситиэт сыыппаралаах сайдыыга проректора, сыыппара технологиятын Дэпэртээмэнин дириэктэрэ Петр Петрович Иванов эҕэрдэ тыл эттэ, үнүстүүт дириэктэрэ Гаврил Григорьевич Торотоев, СӨ үөрэх, билим Министиэристибэтиттэн Туйаара Семеновна Абрамова, СӨ култуура уонна духуобунас сайдыытын министиэристибэтиттэн Владислав Валерианович Левочкин, СӨ Тыа хаһаайыстыбатын министиэристибэтиттэн Татьяна Матвеевна Осипова, СӨ Инновацияҕа, сыыппаралаах сайдыыга уонна инфокоммуникационнай технологияҕа Министиэристибэтиттэн Ариан Егорович Протопопов дакылааттарын аахтылар.
Төгүрүк остуол саха тылын билиҥҥи туругун, сайдар кэскилин кэпсэтии тула барда, тирээн турар кыһалҕалар, баҕа санаалар, көрүүлэр этилиннилэр. Оҕону хайдах сахалыы тыыннаах иитэр, туох үлэни ыытан аныгы ыччаты сахалыы саҥардар туһунан санаа үллэстиитэ буолла. Маны тэҥэ Егоров Пантелеймон Романович инклюзивнай үөрэхтээһиҥҥэ бэйэтин кыһалҕатын, баҕа санаатын сырдатта. Бу кэннэ үнүстүүт ыччатын аатыттан бэдэгиэгикэ үөрэхтээһинин салаатын устудьуона Игорь Данилов сахалыы тыллаах билим туһунан эдэр чинчийээччилэр ситиһиилэрин кэпсээтэ.  Онтон СӨ Барабыыталыстыбатын иһинээҕи тылы сайыннарар салаа салайааччыта Римма Романовна Жиркова көрүллүбүт боппуруостарга хоруйдаата, бэйэтин сүбэтин эттэ.
Төгүрүк остуол түмүгэр куйаар ситимигэр саха тыла күүскэ киирэрэ, Instagram ситимигэр ыраастык сахалыы саҥарар блогердар, You Tube-ка сахалыы мультиктар элбииллэрэ, оҕону кыра сааһыттан дьиэ кэргэнтэн саҕалаан сахалыы иитэр, төрөппүтү кытта ыкса алтыһар, киниэхэ быһаарар үлэни ыытар тоҕоостооҕун ыйдылар уонна ону былааҥҥа киллэрдилэр.