Новости

Ситиһии хантан кэлэрий?

  • 10 Апреля 2019
  • 484

Ситиһии хантан кэлэрий?

Муус устар 5 күнүгэр биһиги үнүстүүппүтүгэр билим нэдиэлэтин иһинэн

«Модель успешного студента» диэн тиэмэҕэ научнай-методическай сэминээр

буолан ааста. Сэминээри саха литературатын хаапыдыратын дассыана,

б.б.х. Архипова Елена Афанасьевна ыытта.

Сэминээр сыала: Ситиһилээх устудьуону билиһиннэрии, үлэ уопутун кэпсээһин.

Киириитигэр сэминээр кыттыылаахтара бары ситиһиилээх устудьуон мадьыалын, кини хайдах буолуохтааҕын оҥорон көрдүбүт. Оннук устудьуон биһиги ортобутугар баар эбит!

Прокопий Софронеев - сэминээр геройа. Кэпсэтиһии кини тула буолла.

Прокопий ПО-МХК-15 бөлөх устудьуона, быйыл 4-с кууруска үөрэнэ сылдьар, 2-с куурустан саҕалаан «Литература тюркских народов» куруһуокка дьарыктанар, билигин бу научнай куруһуок бэрэссэдээтэлэ. Куруһуок үлэтин сырдаттылар, ситиһиилэрин кэпсээтилэр.

Куруһуокка дьарыктанар устудьуоннары кытта билистибит, бары олус иллээх-көхтөөх эбиттэр. Куруһуок 8 чилиэниттэн алтата билимҥэ үрдэтиллибит истипиэндьийэни ылара даҕаны элбэҕи этэр. Прокопий Софронеев бэйэтин туһунан олус сэргэхтик, интэриэһинэйдик кэпсээтэ. Куруһуокка хаһан киирбитин, билимҥэ бастакы холонуутун, үлэлэрин уонна олимпиадаҕа, билимҥэ ситиһиилэрин сиһилии сырдатта. Быйыл эмиэ, үсүһүн, Аан дойду таһымнаах «Ломоносов-2019» форумҥа Москуба куоракка кытта барарын сөҕө, хайҕыы иһиттибит. Прокопий үөрэҕэр, общественнай үлэҕэ, билимҥэ бэриниилээҕэ, идэтин таптыыра барыбытыгар холобур буолар.

Сэминээр биир уратытынан Прокопий Софронеев биир сөбүлүүр тиэмэтин биһиэхэ холобур гынан кэпсээтэ: «Схожие аспекты охотничьих традиций сибирских тюрков», «мастер-класс» биэрдэ. Истээччилэр олус кэрэхсээтилэр, элбэх боппуруоһу ыйыттылар.

Тэрээһин түмүгэр, Елена Афанасьевна урут даҕаны, билигин даҕаны куруһуогар дьарыктаммыт устудьуоннарын, лицеистарын ахтан ааста, үлэтин уопутун сырдатта.

Сэминээргэ кэлбит устудьуоннар, маҕыстырааннар эбии билиини, сонун өйү-санааны ылыммыттара буолуо диэн эрэнэбит.

Прокопий Софронеевка инникитин даҕаны үрдүктэн үрдүк ситиһиилэри баҕарабыт!

Автор: Мария Винокурова, Анастасия Потапова, ЛР-17 устудьуоннара «Ийэ тыл» пресс киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).