Новости

Устудьуоннарга аналлаах күрэх уонна сатабыл кылааһын ыытыы күнэ.

  • 14 Февраля 2019
  • 630

Устудьуоннарга аналлаах күрэх уонна сатабыл кылааһын ыытыы күнэ.

Олунньу ыйга «Тыл күнүн» дэкээдэтин чэрчитинэн араас тэрээһиннэр ыытыллан бара тураллар. Бу ый 6 күнүгэр «Болкулуор уонна култуура» хаапыдыратын иһинэн олонхоҕо, тойукка, норуот ырыатыгар, хомуска, саха таңаһыгар сатабыл кылаастара ыытылыннылар. Барыта 78 устудьуон көхтөөх кыттыыны ылбыта.
Оһуохай таһаарыытыгар  8 кыттааччы, үс үөрэх кыһатыттан кэлэн күөн көрүстэ. Этээччиллэр тыллара-өстөрө, таҥастара-саптара, куоластара, тэтимнэрэ, кылыһахтарын кэрэтэ киһини эрэ барытын умсугутуох курдук. Муусука коллеһыттан Нарыйаана Николаева (Үөһээ Бүлүү) «Дьыл» кэмин арыйан иһитиннэрдэ, Вольдемар Львов Култуура коллеһыттан «Бүлүү эбэни» бэрт үчүгэйдик ойуулаан таһаарда, Хаарчаана Семенова ХИФУттан «Тиит маһы» бэркэ табыллан хоһуйан этэн 1 миэстэни ылла.
Бу сатабыл кылаастары тэрийиигэ Муусука коллеһын Болкулуор салаатын уһуйааччылара кэлэн  бэрт көхтөөхтүк кытыннылар. Ол курдук, Варвара Александровна Степанова - уһуйааччы, импровизатор – хомусчут, СР култууратын туйгуна; Элла Кулагиновна Соколова - бу салаа сэбиэдиссэйэ, СР култууратын туйгун; Артур Ньургустанович Семенов  - уһуйааччы, импровизатор – хомусчут.
«Тойук» уонна «Норуот ырыалара» сатабыл кылаастара холбуу ыытылынна. Манна барыта 28 устудьуон кэлэн кытынна. Варвара Александровна уонна Элла Кулагиновна устудьуоннарга бэйэлэригэр холобурдаан көрдөрөн тойук араас матыыбын үөрэттилэр, тыыныы арааһын билиһиннэрдилэр.
«Хомус» сатабыл кылааһыгар 26 устудьуон кытынна. Артур Ньургустанович сахалыы сыыйа тардыы ньыматыгар истээччилэрин үөрэттэ.
«Олоҥхо» сатабыл кылааһыгар уһуйууну ыытта - Юрий Петрович Борисов, билэлиэгийэ билимин хандыдаата, Олонхо үнүстүүтүн идэлээх үлэһитэ. Сатабылга 16 устудьуон кэлэн кытынна. Кини Олоҥхо геройдарын матыыбын арааһын иһитиннэрэн устудьуоннар сэҥээриилэрин тарта.
«Саха таҥаһа» сатабыл кылааһы устудьуоннарга көрдөрөн, билиһиннэрэн кэпсээтэ Светлана Ивановна Петрова, история билимин хандыдаата, «Болкулуор уонна култуура» хаапыдыратын дассыана. Саха таҥаһын  арааһын, уратытын кэпсээн, быыһыгар оонньуу ыытан, бэрт көхтөөхтүк ааста. Бу манна уопсайа 8 устудьуон кыттыыны ылла.
Бу күннээҕи тэрээһини барытын НХК устудьуоннара бэйэлэрэ иилээн – саҕалаан, Светлана Ивановна Петрова салалтатынан тэрийдилэр. Устудьуоннар маннык тэрээһиннэри тэрийэн ыытыылара - инники идэлэригэр туһаайыылаах  (практико-ориентированнай) буолар.

Автор: Уйгуров Афанасий Афанасьевич

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).