- 3 Декабря 2018
- 498
Устудьуоннар олоҥхону тылбаастаатылар
Сэтинньи
28 күнүгэр Олоҥхо дэкээдэтин чэрчитинэн Өрөспүүбүлүкэ бырабыыталыстыбатын
саалатыгар Т.В. Захаров-Чээбий “Ала Булкун бухатыыр” олоҥхотун сүрэхтэниитэ
буолла. Бу дьоһуннаах үлэни “Амма улууһа” МТ сакааһынан ХИНТуоКҮ бэрэпиэссэрэ, биллиилээх учуонай В.В.
Илларионов иилээн-саҕалаан таһаарда. Манна олоҥхо эрэдээксийэлэммит тиэкиһэ,
хос быһаарыыта, комментарийа, улуу олоҥхоһут туһунан билим ыстатыйалар, ону
тэҥэ олоҥхо нууччалыы тылбааһа киирдэ. Тылбааһы саха тылын истилиистикэтин
уонна нууччалыы-сахалыы тылбаас хаапыдыратын устудьуоннара Бурцева Алина,
Гаврильева Ира, Данилова Сардаана, Дягилева Оляна, Игнатьева Зина, Макарова
Варя, Никанорова Алена, Олесова Маша, Попова Ангелла, Сидорова Сандаара,
Соловьева Диалектина оҥордулар. “Бу “Тылбаас кэрэ эйгэтэ” устудьуон билим
куруһуогун үлэтин түмүгэ буолар. Биллэрин курдук, тылбаас норуоттар
алтыһыыларыгар сүдү суолталаах, онон “Ала Булкун бухатыыр” олоҥхо тылбаас киэҥ
араҥаҕа тарҕанарыгар көмөлөһүө диэн эрэнэбин. Ону тэҥэ, тылбаасчыт идэтигэр
үөрэнэр оҕолор быраактыкалыы таһымнарын үрдэтэр, үөрүйэхтэрин сайыннарар,” –
диэн куруһуок салайааччыта, ХИНТуоКҮ дассыана Ирина Владимировна Собакина
билиһиннэрэр. Сахалар улуу олоҥхобут аар-саарга аатырарыгар, тылбаас уустук
үлэтигэр эдэр ыччат кыттыһара кэскиллээх, үтүө түмүктээх.