Новости

Хоһоон күрэҕэ түмүктэннэ

  • 20 Ноября 2018
  • 720

Хоһоон күрэҕэ түмүктэннэ

Сэтинньи 16 күнүгэр  «Үс саха төрүөҕэр, үөрүүлээх күнүгэр мин ырыам ылланыа, мин аатым ааттаныа» диэн саха биллиилээх государственнай уонна общественнай деятелэ, саха литературатын төрүттээччилэртэн биирдэстэрэ Платон Алексеевич Ойуунускай төрөөбүтэ 125 сылыгар аналлаах хоһоон ааҕыы күрэҕин түмүктүүр түһүмэҕэ буолла. Бу үнүбэрситиэт үрдүнэн ыытыллар күрэҕи иккис сылын саха литэрэтиирэтин хаапыдырата үрдүк таһымнаахтык тэрийэн ыытта.

Күрэх иккис түһүмэҕэр 25 кыттааччыттан 17 кыттааччы ааспыта. Бары дьүүллүүр сүбэ бэлиэтээһиннэрин ылынан, үчүгэйдик бэлэмнэнэн кэлбиттэр.

Дьүүллүүр сүбэҕэ СӨ суруйааччыларын сойууһун чилиэнэ, Былатыан Ойуунускай хаан уруу аймаҕа Елена Васильевна Слепцова-Куорсуннаах, Саха АССР үтүөлээх артыыһа, СӨ норуодунай артыыһа Зоя Петровна Багынанова, СӨ суруйааччыларын сойууһун чилиэнэ, поэт Ангелина Щадринова-Суоһааны, Арассыыйа суруйааччыларын сойууһун чилиэнэ, поэт Рустам Николаевич Каженкин, СӨ үүнэр көлүөнэ тыйаатырын режиссера Алексей Амбросьев үлэлээтилэр.

 

Кыттааччылар санаалара:

София Попова, ФТИ 2 куурус: «Мин бу куонкуруска бэйэм баҕабынан кыттыбытым, тоҕо диэтэххэ, Ойуунускай айымньыларын олус таптыыбын. Саамай сөбүлүүр айымньым «Дьулуруйар Ньургун Боотур» олоҥхото буолар, ол иһин олоҥхоттон быһа тардыыны аахтым. Саха тылын үөрэппитим үс эрэ сыл буолла, ол иннинэ сахалыы аахпат да, суруйбат да этим. Бэйэм төрүт тылбын сайыннараары, байытаары маннык куонкурустарга кытта сатыыбын».

 

Иван Старостин, ПИ, 1 куурус, магистрант: «Мин Ойуунускай «Муора» хоһоонун оскуолаттан билэр буоламмын, кыттарбар уустуктары көрсүбэтим. Бу куонкуруска дьон сүбэтинэн кытынным».

 

Соня Гоголева, ИЯКН СВ РФ, 2 куурус: «Бу күрэххэ Ойуунускай «Ийэм Дьэбдьэкиэй уҥуоҕар» диэн хоһоонун бэйэбэр чугастык ылынаммын аахтым. Тэрээһин бэрт таһаарыылаахтык ааста, кытааччылар бары олус бэлэмнээхтэр дии санаатым».

 

Дьүүллүүр сүбэ быһаарыытынан маннык түмүк таҕыста:

«Кэскиллээх ааҕааччы» - Уйгулаана Портнягина, ИЯКН СВ РФ, 4 куурус.

«Иэйиилээх ааҕааччы» - Петр-Добун Иванов, ИЯКН СВ РФ, 1 куурус.

«Күүрээннээх ааҕааччы» - Сандаара Порнякова, ИЯКН СВ РФ, 1 куурус.

«Вдохновенное чтение» - Михаил Донской, ФЛФ, 1 куурус.

«Лирическое исполнение» - Майя Геворгян, ФЛФ, 1 куурус.

3 истиэпэннээх диплом - Артем Осипов, ИЯКН СВ РФ, 2 куурус, Иван Старостин, ПИ, магистрант, Виктория Попова, ФЛФ, 2 куурус.

2 истиэпэннээх диплом - Татьяна Лубина, ЮФ, 4 куурус, Иван Бушуев, ИЯКН СВ РФ, 1 куурус.

Кыайыылаах үрдүк аатын Дайаана Тоскина (ИЯКН СВ РФ 1 куурус)  ылла. Куонкурус кыайыылааҕа 2019 с. Бүтүн Арассыыйатааҕы ыччат форумугар кытта барар чиэскэ  тигистэ.

 

Күрэх кыайыылааҕа Дайаана Тоскина үөрүүтүн үллэһиннэ: «Ойуунускай «Сүрэх» айымньытын оскуолаҕа үөрэтэрбитигэр бэйэбэр чугастык ылыммытым. Бу кэпсээнинэн Ойуунускай ааҕыыларыгар ситиһиилээхтик кыттыбытым. Онтон манна кыттарбар өссө эбии чочуйан, итэҕэтиилээхтик ааҕарга, киэҥ публиканы кытары үлэлииргэ саха академическай тыйаатырын артыыската Татьяна Легантьева үөрэппитэ. Ааҕарга олус диэн долгутуулаах этэ. Ойуунускай хоһоонноро билиҥҥэ диэри өрө күүрүүлээхтик ааҕылла сылдьалларыттан үөрэбин уонна долгуйабын. Кыттааччыларга инникитин үрдүктэн-үрдүк дабайыылары баҕарабын».

 

Күрэх туһунан Дьүүллүүр сүбэ бэрэссэдээтэлэ, Елена Васильевна Слепцова-Куорсуннаах: «Куонкуруска оҕолор бары көхтөөхтүк, бэлэмнэнэн кэлэн кыттыбыттара биһиги ыччаппытыгар Платон Алексеевич Ойуунускай поэзията, айымньылара билигин даҕаны сонун, сэргэх эбит диэн толкуйга аҕалла. Уонна оҕолор өрө күүрэн ааҕыылара Ойуунускай оччотооҕу бэйэтин пафоһын, үрдүк күүрүүтүн олус үчүгэйдик тиэртилэр. Инньэ гынан олус астынныбыт. Маладьыастар. Биһиги үтүө дьоммут, биллиилээх суруйааччыларбыт, поэттарбыт айымньыларын ыччакка ыччат бэйэтэ аахтаҕына ордук үчүгэйдик тиийэр. Ити курдук ааҕа турдахпытына үтүө дьоммут ааттарын өссө да үйэтитэ туруохпут. Баҕарабыт эһиги бэйэҕит историяҕытын, литератураҕытын күндүтүк санааҥҥыт ааҕаргытыгар».

 

         Күрэх түмүктүүр түһүмэҕэ СӨ Национальнай художественнай музейын быыстапкалыыр саалатыгар буолбута кэрэхсэбиллээх. Бу күрэҕи өйөөбүт спонсордарбытыгар тэрийээччилэр ааттарыттан улахан махталбытын тиэрдэбит.

Автор: Ася Иванова, Настя Местникова (ЛҮ-16) “Ийэ тыл” пресс-киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).