Саха литэрэтиирэтин хаапыдырата алтынньы 30 күнүгэр народнай поэт Петр Тобуруокап аатынан анал истипиэндьийэни туттарар бэлиэ тэрээһини ыытта. Быйылгы тэрээһин “Эдэргэ мэниктээн хаалыахха” диэн санаанан салайтаран, көрү-күлүүнү өрө тутта. Биэчэри литературнай үлэһит уонна айар үлэһит салаа 4 кууруһун устудьуоннара тэрийэн ыыттылар. Тэрээһин П.А. Ойуунускай аатынан литературнай музейга буолла.

Литературнай биэчэргэ хаапыдыра бары бөлөхтөрө көхтөөтүк кытыннылар. Эрдэттэн биллэриллибит кэтэхтэн күрэхтэргэ даҕаны, биэчэргэ ыытыллыбыт түһүмэхтэргэ даҕаны олус кыһаллан бэлэмнэммиттэр. Тэрээһин ыалдьыттарынан Петр Тобуруокап аймахтара, үнүстүүппүт салалтата, уһуйааччылара уонна араас үнүстүүттэр устудьуоннара буоллулар. Биэчэри Варя Турнина, Уйгулаана Бурнашова салайан ыыттылар, клоуннар Уйгулаана Портнягина, Юлия Данилова көрү-күлүүнү күөдьүтээччилэринэн буоллулар. Дьүүллүүр сүбэҕэ хаапыдыра профессора В.Б. Окорокова уонна магистраннар Маргарита Иванова, Сардаана Омукова үлэлээтилэр, түмүгү таһаардылар.

Тэрээһин бөлөхтөр видеовизиткаларын көрүүнэн саҕаланна. Манна ЛТ-16 бөлөх устудьуоннарын видеоҕа устуулара бастыҥынан ааттанна. Кинилэр көрдөөх визиткаларын дьон бары кэрэхсээтэ. Иккис миэстэҕэ ЛР-16, үһүскэ ЛР-17 бөлөхтөр тигистилэр.

П. Тобуруокап көрдөөх хоһооннорун ааҕыы күрэҕэр Артем Осипов (ЛР-17) “Устудьуоннар маладьыастар” айымньыны олус үчүгэйдик ааҕан бастаата, биһирэбил бирииһи Валентина Андреева (ЛТ-16) тутта.

Биэчэр сүрүн түһүмэҕинэн Петр Тобуруокап күтүөтэ, суруйааччы Д.Ф. Наумов көрдөөх айымньыларынан уус-уран туруоруу буолла. Оҕолор бары артыыстыыр дьоҕурдаах эбиттэр: олус көрдөөх сценкалары туруоран көрөөччүлэри күллэрдилэр. Түмүккэ ЛР-17 бөлөх “Кынталдьыйан кыыс оҕото” (кыыс оҕотун оруолун Сергей Другин олус бэркэ оонньоото) туруоруунан бастаата, иккис миэстэҕэ ЛТ-16 “Массыына”, үһүскэ ЛР-16 “Дьөгүөр куоска” туруорууларынан таҕыстылар.

Кэтэхтэн күрэхтэргэ устудьуоннар үлэлэрин эрдэттэн туттарбыттара. Түмүк маннык буолла: “Айар үлэ абылаҥа” күрэххэ бастыҥ хоһоон – Валентина Андреева (ЛТ-16), бастыҥ кэпсээн – Дьулустан Кононов (ЛТ-17); “Дьиктини көрөбүн” хаартыска күрэҕэ – Александра Иннокентьева, Сандаара Тобонова (ЛТ-16); “Минньигэс да ырыа үөһэттэн кутуллар” Петр Тобуруокап ырыаларыгар кавер күрэҕэ – Сандаара Тобонова, Валентина Андреева (ЛТ-16). Кэтэхтэн күрэхтэри анал хамыыһыйалар сыаналаатылар. Хас биирдии көрүҥҥэ сыаналыыр киритиэрий тус-туспа, ол эрэн дьүүллүүр сүбэ бастыҥ үлэлэри быһаарарыгар, бастатан туран, үлэ уус-уран уратытын, хаачыстыбатын, толоруллуутун, оҕолор төһө кыһаллыбыттарын уонна кэмигэр туттарыллыбыттарын учуоттаата.

Күрэхтэргэ хайа бөлөх ордук көхтөөхтүк кыттыбытыттан көрөн, “Бастыҥ бөлөх” анал аат быһаарылынна. Бу анал ааты ЛТ-16 бөлөх устудьуоннара ыллылар.

Тэрээһин саамай долгутуулаах уонна күүтүүлээх түһүмэҕинэн истипиэндьийэ туттарыыта буолла. Бүөтүр Тобуруокап кыргыттара Любовь Петровна уонна Саргылаана Петровна, күтүөтэ суруйааччы Дмитрий Федосеевич Наумов үөрүүлээх быһыыга-майгыга анал истипиэндьийэни Кристина Ивановаҕа (ЛР-15) туттардылар.

Үнүстүүт дириэктэрэ Г.Г. Торотоев суруйааччы Д.Ф. Наумовы 70 сааһын туолбутунан эҕэрдэлээтэ уонна П.Тобуруокап дьиэ кэргэнигэр ыччаты өйүүр үтүө үгэһи олохтообуттарыгар махтанна. Профессордар Г.Г. Филиппов, В.Б. Окорокова тэрээһин суолтатын тоһоҕолоон уонна Д.Ф. Наумовы эҕэрдэлээн тыл эттилэр. Биэчэри Хаарчаана Семенова, Саша Мохначевская (НХК-15) ырыанан киэргэттилэр.

Тэрийээччилэр ааттарыттан бары ыалдьыттарбытыгар, чуолаан суруйааччы дьиэ кэргэнигэр, үнүстүүппүт дириэктэригэр Г.Г. Торотоевка, ытыктыыр уһуйааччыбытыгар Г.Г. Филипповка, өр кэмҥэ дириэктэри иитэр үлэҕэ солбуйааччынан үлэлээбит дассыан М.Н. Егоровка, маны таһынан спонсордарбытыгар “Бичик” кинигэ кыһатыгар, визажист Дая Аталлароваҕа (Инстаграм: @daya_make_up_studio), дизайнер Айталыына Ивановаҕа (Инстаграм: @ai_kyn_yakutsk) уонна урбаанньыт А.Д. Рахлеевка (Таатта улууһа) махтанабыт.

Улахан махталбытын тиэрдэбит П.А. Ойуунускай аатынан литературнай музей салалтатыгар (дириэктэр Н.А. Лугиновка, дириэктэри солбуйааччы Л.Н. Ивановаҕа) уонна бары үлэһиттэригэр.