Алтынньы 22 күнэ

Нэдиэлэ бастакы күнүгэр «Сэргэлээх уоттара» култуура киинигэр «Остуоруйа дойдута» диэн тиэмэлээх үнүстүүппүт бастакы куурустарын сүрэхтэниитэ буолан ааста. Уопсайа 6 хамаанда кытынна. Дьүүллүүр сүбэ састааба: Марфа Александровна Винокурова, ХИНТуоКҮ дириэктэрин иитэр үлэҕэ солбуйааччы; Айыына Сивцева, үнүстүүппүт устудьуоннарын идэлээх сойууһун бэрэссэдээтэлэ, Юрий Романов, үнүстүүппүт выпускнига, «Саха Даймондс» КВН хамаандатын оонньооччута; Саргылана Черкашина, үнүстүүппүт выпускнига, «Disco dolls» үҥкүү бөлөҕүн салайааччыта; Диана Семенова, устудьуоннар идэлээх сойуустарын культурнай-маассабай үлэҕэ хамыыһыйатын бэрэссэдээтэлэ.

«Гран-При» аатын ПО-САО-18, ПО-СО-18 "Мир мелодии" холбоһуктаах хамаандата ылла. Кыайылаахтар уон тыһыынча солкуобай харчынан наҕараадаланнылар.

Түмүккэ маннык анал ааттары туттардылар:

«Лучшая костюмированная команда» - ЯРЯ-18, ПО-МХК-18, НХК-18 «Мир флоры и фауны» холбоһуктаах хамаандата.

«Лучший музыкальный номер» - ОРМ-18, СИМК-18 «Мир Хаколы» холбоһуктаах хамаандата.

«Самая артистичная команда» - ТОТТУ-18, СО-18 «Мир Айси» холбоһуктаах хамаандата.

«Самая креативная команда» - С-18, ЯО-18 «Мир Мегаботов» холбоһуктаах хамаандата.

«Лучший сценарий» - ЛР-16, СП-18 «Мир Кейко» холбоһуктаах хамаандата.

«Лучшая женская роль» - Сандаара Парникова СП-18 бөлөх устудьуона.

«Лучшая мужская роль» - Петр Иванов-Добун ПО-САО-18 бөлөх устудьуона.

Үнүстүүппүт устудьуоннарын идэлээх сойууһа бэрт үчүгэйдик тэрийэн ыыттылар. Сүрдээх талааннаах, чаҕылхай оҕолор үөрэнэ киирбиттэр эбит диэн бэлиэтээн көрдүбүт. Инникилэригэр үрдүк ситиһиилэри баҕарабыт.

Алтынньы 23 күнэ

Оптуорунньукка бэрэпиэссэр, философскай наука дуоктара, култуура хаапыдыратын бастакы сэбиэдиссэйэ Борис Николаевич Попов төрөөбүтэ 80 сылыгар аналлаах кинигэ сүрэхтэниитэ буолан ааста. Кинигэни хомуйан оҥордо - Галина Семеновна Попова-Санаайа. Сүрэхтэниигэ Галина Семеновна чугас дьоно, Борис Николаевич кэргэнэ, бырааттара, уһуйааччылар, устудьуоннар уонна кинини билэр дьон муһунна.

Борис Николаевич Попов чинчийээччи быһыытынан дириҥ санаалаҕын, күүстээх бэлэмнээх уһуйааччытын ахтан-санаан аһардылар. Кини араас сирдэргэ далааһыннаахтык үлэлээбитэ: Дьокуускайдааҕы научнай сыантырга, тыа хаһаайыстыбатын академиятыгар, ону таһынан Саха Өрөспүүбүлүкэтин наукатын академиятыгар уонна Саха судаарыстыбаннай үнүбэрсиэтигэр култуура хаапыдыратын тэрийбитэ.

Кинигэ биһирэмигэр кэлбит ыччат олус сэргэхтик уонна интэриэстээхтик иһиттилэр, улахан учуонай туһунан элбэҕи биллилэр.

Борис Николаевиһы кытта тэҥҥэ алтыспыт дьон истиҥник-иһирэхтик тыл эттилэр: Иван Егорович Алексеев билэлиэгийэ наукатын дуоктара, бэрэпиэссэр; Галина Авксентьева Мординова дассыан, билэлиэгийэ наукатын хандьыдаата; Анатолий Георгиевич Новиков философскай наука дуоктара, бэрэпиэссэр; Михаил Петрович Алексеев-Дапсы тыл наукатын хандьыдаата; Ульяна Алексеевна Винокурова социологическай наука дуоктара, бэрэпиэссэр.

Социология уонна култуура науката Саха сиригэр тэнийэригэр Борис Николаевич Попов улахан кылааты киллэрбитэ. Ол курдук, улахан учуонай аатын үйэтитиигэ анаан араадьыйаҕа биэрии тахсыбыта, киинэ уһуллубута.

Алтынньы 24 күнэ

Сэрэдэҕэ күнүс 16 чаастан үнүбэрсиэт научнай библиотекатыгар Саха Өрөспүүбүлүкэтин народнай суруйааччыта Николай Лугинов “Время перемен” (“Уларыйыы кэмэ”) нууччалыы тылынан тахсыбыт саҥа кинигэтин (романын) биһирэмэ буолан ааста.

Көрсүһүүгэ проректор Н.М. Зайкова, филологическай наука доктора, профессор А.А. Бурцев, уһуйааччылар, магистраннар, устудьуоннар кыттыыны ыллылар. Устудьуоннар роман чаастарыттан быһа тардан ыалдьыттарга аахтылар. Суруйааччы Николай Лугинов, профессор А. Бурцев тыл эттилэр. Айар үлэһит бөлөх 4 кууруһун устудьуона Наталья Данилова роман туһунан санаатын үллэһиннэ. Ырытааччылар роман философскай матыыптааҕын, идеялааҕын бэлиэтээтилэр.

Түмүккэ Николай Лугинов айымньыны суруйарыгар туох ыарахаттары көрсүбүтүн туһунан кэпсээтэ, устудьуоннарга саҥа айымньыны ааҕалларыгар уонна үчүгэйдик үөрэнэллэригэр баҕа санаатын тириэртэ.

Бу күн саха литэрэтиирэтин хаапыдыратын дассыана, билэлиэгийэ билимин хандьыдаата Саргылана Ивановна Егорова ЛҮ-16 бөлөх устудьуоннарыгар «Н.Е.Мординов-Амма Аччыгыйа «Сааскы кэм» романын суруллубут историята» диэн тиэмэлээх аһаҕас лиэксийэ ыытта.

Алтынньы 25 күнэ

Чэппиэр күн үнүстүүккэ билэлиэгийэ билимин хандьыдаата, дассыан, Сардаана Дмитриевна Егинова, төрөөбүтэ 55 сылыгар анаан төгүрүк остуол буолан ааста. Кини бииргэ төрөөбүт балта Мария Дмитриевна Гаврильева, үөрэппит устудьуоннара Алла Божедонова уонна Ольга Павлова, чугас дьүөгэлэрэ Варвара Борисовна Окорокова, Людмила Степановна Ефимова устудьуоннарга Сардаана Дмитриевна туһунан билиһиннэрдилэр.

Мария Дмитриевна эдьиийин олоҕун араас кэрчиктэрин быһа тардан кэпсээтэ, дьиэтээҕи архыыбыттан элбэх хаартыскалары көрдөрдө. Сардаана Дмитриевна устудьуоннара Алла Божедонова уонна Ольга Павлова уһуйааччыларын истиҥ-иһирэх тылларынан ахтан аастылар.

Варвара Борисовна Окорокова: «55 сыл диэн наһаа үчүгэй сыыппара, тоҕо диэтэххэ, Сардаана Дмитриевна үйэтин тухары туйгуннук үөрэммитэ, онон үөрэххэ талаһар оҕолору наһаа убаастыыра. Устудьуоннара кинини олус ытыктыыр этилэр. Кини курдук идэтин таптыыр киһи ахсааннааҕа буолуо. Онон киниттэн холобур ылан, үөрэххитин өрө тутуохтааххыт», - диэн устудьуоннарга баҕа санаатын эттэ. Тэрээһин түмүгэр устудьуоннарга анаан Сардаана Дмитриевна Егинова «Образные прилагательные якутского языка (в сопоставлении с бурятским и киргизским языками)» диэн монографиятын бэлэх ууннулар.

Алтынньы 26 күнэ

Бээтинсэҕэ мэтиэдьикэ хаапыдырата 1-кы кууруска киирбит устудьуоннарыгар анаан биэчэр тэрийдэ. Тэрээһини 2-с куурус устудьуоннара куратордарыныын Захарова Галина Алексеевналыын иилээн-саҕалаан ыыттылар. Бастакыттан бэһис кууруска диэри устудьуоннар бэйэлэрин билиһиннэрдилэр, араас хайысхалаах түһүмэхтэргэ кытыннылар, ол курдук бэйэлэрин талааннарын көрдөрдүлэр уонна Япония, Италия, Туркмения, Россия национальнай бүлүүдэлэрин бэлэмнээн аҕалан амсаттылар. Куратордар устудьуоннарын кытта көхтөөхтүк бары куонкурустарга кытыннылар. Биэчэр уһуйааччылар эҕэрдэлэринэн түмүктэннэ.

Алтынньы 27 күнэ

Субуота күн Былатыан Ойуунускай аатынан Саха академическай тыйаатыра Дмитрий Федосеевич Наумов үбүлүөйдээх 70 сааһыгар анаан «Республика» испэктээкилин туруорда. Үнүстүүппүт устудьуоннара испэктээкили сэҥээрэн көрдүлэр.