Н.С. Григорьев аатынан саха тылын хаапыдырата:

Алтынньы 2 күнүгэр П.А. Ойуунускай аатынан Саха литэрэтиирэтин түмэлигэр саха тылын хаапыдыратын устудьуоннарын көрсөр, түмэр, бастакы кууруһу сүрэхтиир тэрээһин буолла.

Хас биирдии бөлөх түүрдүү норуот тылын-өһүн, төрдүн-ууһун, устуоруйатын, култууратын билиһиннэрдэ. Манна татаар, казаах, туурак, саха омугун туһунан сиһилии көрдөрдүлэр. Тэрээһин түмүнэн бөлөхтөргө анал ааттары иҥэрдилэр:

«Үҥкүү-битии үктэллээх бастыҥ көрдөрүү» - Б-ЯО-16, Б-ЯО-17

«Дириҥ ис хоһоонноох сэһэргээһин» - Б-ЯО-18

«Ырыа-тойук аргыстаах ураты дьүһүйүү» - М-ЯНРФ-18, М-СИТСЯ-18

«Хомоҕой хоһоонноох умсугутуулаах көрдөрүү» - М-ЯНРФ-17

Саха литэрэтиирэтин хаапыдырата:

Алтынньы 9-10 күннэригэр «Современные проблемы исследования национальной классики» диэн Бүтүн Арассыыйатааҕы научнай-практическай кэмпириэнсийэ буолан ааста. Бу тэрээһиҥҥэ хаапыдыра уһуйааччылара, устудьуоннара көхтөөхтүк кытыннылар.

Хаапыдыра бэрэпиэссэрэ Зоя Константиновна Башарина Сочига бу күннэргэ сылын ахсын ыытыллар «Формирование трезвого образа жизни среди подрастающего поколения» диэн аан дойдутааҕы форумҥа кыттыыны ыла сылдьар. Бу форум быйыл 27-с төгүлүн ыытыллар.

Хаапыдыра иһинэн үлэлиир билим куруһуоктара үлэлэрин саҕалаатылар. Устудьуоннары кытта үлэ сыллааҕы былаана бигэргэтилиннэ.

Болкулуор хаапыдырата:

Алтынньы 6 күнүгэр Светлана Ивановна Петрова-Уран Хатын «Өбүгэ таҥаһа: бэлиэлэр, ымыылар» кинигэтин сүрэхтэниитигэр НХК устудьуоннара бары кыттыыны ыллылар. Быыстапка турда уонна муода көрдөрдүлэр.

Алтынньы 11 күнүгэр саха биллиилээх этнограф-учуонайа, история билимин кандидата, М.К.Аммосов аатынан ХИФУ дассыана, Саха Өрөспүүбүлүкэтин үөрэҕин уонна анал үөрэхтээһинин туйгуна, Нам уонна Хатырык нэһилиэгин ытык киһитэ Платон Алексеевич Слепцов аатынан «Сыл туйгун устудьуона» анал аат кыайыылааҕар НХК-16 бөлөх устудьуонугар Дорофеева Дианаҕа стипендия туттарылынна. Ону таһынан, НХК-15 устудьуоннара «Сыл бастыҥ бөлөҕө» ааты ыллылар.

Култуура хаапыдырата:

Ааспыт нэдиэлэҕэ хаапыдыра дассыана, култуура кандидата Семен Семенович Протопопов Москваҕа "Билим бэстибээлигэр" кыттыыны ылла.

Ректорскай көрүүгэ устудьуоннар "Хорохаан" диэн бөлөҕүнэн инструментальнай толорууга маҥнайгы миэстэни ыллылар.

Алтынньы ый 11 күнүгэр "Суздаль 2018" бэстибээлгэ хаапыдыра уһуйааччыта Саргылаана Валентиновна Никифорова уонна Ия Володаровна Покатилова төгүрүк остуолга дакылааттарынан кыттыбыттарыгар "Душа России" дирекцията махтал сурук ыытта.

Конвергентнай наукалар түмсэн алтынньы ый 12 күнүгэр симпозиум ыыттылар. Соҕуруу Кореяттан биэс наука дуоктара, бэрэпиэссэрдэр кэллилэр. Сукмён үнүбэрситиэтиттэн сылдьар, култууранан дьарыгырар бэрэпиэссэри Нөмүгүгэ сахалыы сиэринэн-туомунан балаҕаҥҥа көрсүһүү тэрийдилэр. Саха мааны аһынан күндүлээн, ирэ-хоро кэпсэтэн тарҕастылар.

Саха тылын истилиистикэтин уонна нууччалыы-сахалыы тылбаас хаапыдырата:

Саха тылын истилиистикэтин уонна нууччалыы-сахалыы тылбаас хаапыдырата И.Н.Жирков аатынан Дүпсүн орто оскуолатын кытта бииргэ үлэлиир туһунан сөбүлэҥ түһэристилэр. Сөбүлэҥ быйыл саас оҥоһуллубут уонна алтынньы ыйтан үлэтин саҕалаата. Бээтинсэҕэ Дүпсүнтэн дириэктэри үөрэх чааһыгар солбуйааччы Сивцева Ньургуйаана Алексеевна уонна саха тылын, литэрэтиирэтин учуутала Михайлова Тамара Семеновна кэлэн көрөн-истэн бардылар. Оскуола оҕолорун үөрэххэ, билимҥэ, инновационнай үлэҕэ сыһыарар, талааннаах оҕолору өйүүр, профориентационнай үлэлэри ыытарга сүбэлэстилэр. Кэлэр өттүгэр хаапыдыра идэни үрдэтинэр куурустары, тылбаас олимпиадатын ыытарга былаанныыр. Уһуйааччылар билимҥэ салайааччы, консультант быһыытынан үлэлэһиэхтэрэ. Инникитин таһаарыылаах үлэ барыа диэн икки өттүттэн бигэ эрэллээхтэр.